Aboro bo mu Nyakabiga barahawe impuzu nshasha, bongera barasangira infungurwa n’abandi banyamuryango ba Paruwase, gutyo baragaragarizwa ko bazirikanwa ko na bo ari abakristu mu bandi, basangiye iteka n’abandi ryo kuba abana b’Imana n’ab’Ekleziya

Umusi mpuzamakungu wahariwe aboro warahimbajwe no muri Paruwase Mukiza Mweranda yo mu Nyakabiga, ku musi w'Imana igenekerezo rya 13 Munyonyo, mu nkuka ya misa yaherejwe na patiri mukuru w’iyo Paruwase, Patiri Désire Ninahazimana, ku gihe c'isaha zine n'igice zo mu gitondo (10h30).

Patiri Désire Ninahazimana yatanguye yibutsa uwo musi mukuru uko washinzwe. Yagize ati: «Papa Fransisko, mu gushinga uwo musi wahariwe aboro, yashatse ko aboro na bo bagira ikibanza mu kibano, bakibukwa, bagashirwa imbere!»

Yasavye abakristu bo mu Nyakabiga ko mu kwifatanya n’aboro mu guhimbaza umusi wabahaiwe, kitoba ikimenyetso gusa, ahubwo ko umuntu yobigira azi ko ari uburyo bwo guha iteka ikiremwa c’Imana no kuyubaha. Yisunze amajambo ya Yezu Kristu, aho agira ati: «Ico cose mwagiriye umwe umwe muri abo bato bato tuvukana, ni jewe mwakigiriye!»

Uwo musaserdoti yabandanije avuga ko umuntu yokwumva yuko ukwo kwubaha Imana ari kandi n’ukwubaha n’abo Imana yaremye bose, abakuru n'abato.

Ku bwiwe ariko, ngo muri abo bato bato ni ho usanga abantu basamarira, ntibabahe iteka ribakwiye. Ngo ni na ho Nyenubweranda Papa aheza akibutsa ko Yezu Kristu, n’ubwo yari umutunzi, yigize umworo ku bw’abantu, ngo abatungishe.

Patiri Désire Ninahazimana yasozereye asaba abakristu bo mu Nyakabiga ko mu buzima bwabo no mu mibano yabo boguma bakuza umutima wo gufasha aboro, kubitaho no kubaremesha. Ngo ni ho bazoba bariko baraca mu makanda ya Yezu Kristu.

Ngo ntibokwumva ko aboro ari abo gukurira impuzu zamaze kwambarwa, ahubwo riho ngo na bo nyene bakwiye kwambara impuzu nshasha. Ywo musaserdoti akaba yatumiriye abakristu kuja baribuka kubagurira impuzu nshasha no kuja barababatumira mu manza, bagasangira mu miryango iwabo, mbere abo bikunda bagasangira n'igisabisho, kuko ngo babana mu makaritiye iwabo.

Mwomenya ko aboro bo muri Paruwase Nyakabiga, kuri uwo musi bahawe impuzu nshasha, bongera barasangira n’infungurwa n’abandi banyamuryango ba Paruwase, ngo basubire bagaragarizwe ko na bo nyene bazirikanwa ko ari abakristu mu bandi, basangiye iteka n’abandi ryo kuba abana b’Imana n’ab’Ekleziya-muryango.

Marie Chantal Nzeyimana, Paruwase Nyakabiga

Ivyiyumviro

Rondera

Urutonde rw'Imisa

Mwoba mufise ico mubaza?

Tanga