Umunyamabanga wa Diyoseze Nkuru ya bujumbura, Musenyeri Gabriel Baregensabe, ku wa Gatandatu igenekerezo rya 18 Ruhuhuma 2023, yarahimbaje yubire y’imyaka 50 amaze mw’ibanga ry’ubusaserdoti-busuku, uwo musi mukuru wiwe akaba yawuhimbarije muri paruwase yitiriwe umwerenda Yohani Batista yo mu Gihosha, ahari umuryango «Chemin Neuf» asanzwe ahurikiyemwo.

Ihimbazwa ry’iyo yubile ryatanguriye mu nkuka y’imisa yo gukengurukira Imana yari irongowe na Nyenicubahiro Musenyeri Gerevazi Banshimiyubusa, Umwepiskopi Mukuru wa Diyosese Nkuru ya Bujumbura, ari kumwe na Nyenicubahiro Musenyeri Evariste Ngoyagoye, Umwepiskopi Mukuru w’inararibonye w’iyo Diyosese.

Mu bandi bari bateye iteka Musenyeri Gabriel Baregensabe mu guhimbaza uwo musi mukuru harimwo na Musenyeri Anatole Ruberinyange, icariho gikuru c’Umwepiscopi Mukuru, n’abasaserdoti batari bake, n’incuti n’abagenzi ba Musenyeri Gabriel Baregensabe, hamwe n’abakristu, cane cane bo muri Paruwase Yohani Batista Mwerandanda bari baje kumushigikira.

Musenyeri Gerevazi Banshimiyubusa yarakeje Musenyeri Gabriel Baregensabe, yongera aranakenguruka ku vyiza vyose Imana yagabiye igihugu cayo iciye kuri uwo  musuku wayo. Yagize ati: «Iyo umuntu yiyumviriye gusa imyaka 50 ubwayo umuntu akiri mw’ibanga kandi akirangura n’ubutumwa, ivyo vyonyene birakwiye gukengurukwa, n’imbere yo kudondagura ibiba vyarangutse.»

Ku bw’uwo Mwepiskopi wa Diyoseze Musenyeri Gabriel Baregensabe asanzwe akukira, ngo nta muntu yodongura ivyiza bica mu bikorwa umusaserdoti aba yaranguye mu myaka ingana ityo, ngo abiheze, na cane cane ko ivyiza bikuru Imana igira usanga ari ibitabonwa n’amaso y’abantu.

Akarorero Nyenicubahiro Musenyeri Gerevazi Banshimiyubusa yatanze ku muherezankuka nka Musenyeri Gabriel Baregensabe ni ak’ivyiza bica mu nkuka z’imisa. Yavuze ko umusaserdoti amaze imyaka 50 yose ahereza inkuka z’imisa, usanga ivyiza yashikanye ku gihugu c’Imana ari vyinshi cane: uri ibica mu masakaramentu ashikiriza, uri ibica mu nyigisho atanga, hatibagiwe n’ibikorwa vy’urukundo, ndetse no mu bisabisho avuga asabira igihugu c’Imana ashinzwe, n’isi yose.

Uwo mwepiskopi yagiriyeko yibutsa abari aho bumwe mu butumwa Musenyeri Gabriel Baregensabe yagiye arashingwa, bwaba ubwo mu maparuwase yabayemwo, canke ubwo mu gisata c’indero, nko mu maseminari mato mato na makuru, eka no mu butumwa bwo kuba umunyamabanga mu nama y’Abepiscopi Katolika b’i Burundi (CECAB), ukuba icariho gikuru c’Umwepiskopi wa Diyoseze Nkuru ya Bujumbura, n’ubundi butumwa bwinshi, mbere gushika n’ubu akiriko, aho ari umunyamabanga mukuru wa Diyoseze.

Yarangije agakenguruka cane umutima w’ukwemera, w’urukundo, n’ubwitonzi Musenyeri Gabriel Baregensabe yaranguranye ubwo butumwa bwose yagiye arashingwa. Akaba yamusabiye ku Mana ko yobandanya imuzigama kandi imukomeza, kugira ngo arambane iteka n’ubukristu yamanye.

Na we Musenyeri Gabriel Baregensabe, ari na we yashikirije insiguro y’ijambo ry’Imana ryasomwe muri iyo nkuka y’imisa, yaboneyeho akaryo ko kugaragaza ubukengurutsi afitiye Imana, yo ngo yamuteye iteka nta ngere mu kutorera ibanga ry’umusaserdoti.

Musenyeri Gabriel Baregensabe yarashinze intahe ko mu myaka 50 yose amaze muri iryo banga yiboneye ubuntu bw’Imana, yo ngo itora uwo yishakiye, ikamurungika kuyiserukira mu bana bayo no kubasangiza ivyiza vyayo. Ngo yarabonye kandi ko Imana ari Umuvyeyi akunda abana biwe kandi adatana mu ndagano. Na co icamutumye yihebera Imana, yavuze ko ari uko yabona ko iterambere ry’ukuri ry’Uburundi rikeneye n’abafasha igihugu kumenya neza Imana n’imigambi yayo.

Abandi Musenyeri Gabriel Baregensabe yashimiye ni abavyeyi biwe. Ngo itorwa ryiwe bararigizemwo uruhara runini, kuko ngo mu kumusabira ibatisimu ata n’indwi arakwiza avutse vyamwugururiye n’ayandi masakramentu yose amaze kuronka, harimwo n’iryo ry’ubusaserdoti bwiwe yari aramutse yibuka kuri iyo yubile yiwe. Hari ikintu yibuka bamuyagiye: ngo bama basaba Imana ko mu bana bibarutse hovamwo uwuyihebera.

Iruhande y’abavyeyi biwe, Musenyeri Gabriel Baregensabe yarashimiye n’abandi bamufashije kwumvira ijwi ry’Umukama ryamuhamagarira kuyihebera. Ntiyibagiye n’abakuru bagiye baramwizigira mu kumuha ubutumwa babona bubereye. Ku bwabo akaba yarasubiriye gushimira Umukama yamuhumuye amaso akabona ivyiza arangura mu muryango wiwe w’EZkleziya.

Ibirori vyo kwiginana no gusangira inzimano vyabereye mu kigo c’umuryango «Chemin Neuf», aho Musenyeri Gabriel Baregensabe asanzwe aba muri kino kiringo. Ni na ho abatari bake mu baje kumushigikira bashikiririje akari ku mutima, harimwo n’abo mu muryango wiwe w’amaraso.

Abo mu muryango w’amaraso wa Musenyeri Gabriel Baregensabe bagize ico bashikiriza kuri we baremeje ko kuva mu buto bwiwe yarangwa n’ubwitonzi n’ubukerebutsi, kugeza n’aho umwana wese akarebutse mu muryango baca bavuga ko azoba nka Gabriel.

Na bo bakaba barakengurukiye Imana kw’iteka yateye umuryango wabo mu kuwutoramwo uwuyihebera. Barayikengurukiye kandi no ku migisha n’imihezagiro baronse biciye kuri uwo musavyi w’Umukama, bongera bayisaba ngo ibandanye ishoboza uwo musuku wayo kugumya iryo banga.

Musenyeri Gaburiyeri Baregensabe rero yatiwe mw’ibanga ry’ubusaserdoti kw’igenekerezo rya 6 Nzero 1973, na Nyenubweranda  Papa Paulo-VI, mw’isengero nkuru y’i Roma yitiriwe Petero mweranda.

Mu gihe na ho muri kino kiringo ahimbaje yubile y’imyaka 50 y’ubusaserdoti-busuku aba mu kigo c’umuryango «Chemin Neuf», kuko ku bwo gukunda ubutumwa buharangurirwa yari yarabisavye Umwepiskopi Mukuru wa Diyoseze Nkuru ya Bujumbura asanzwe akukira, na we akabimwemerera, Nyenicubahiro Musenyeri Gerevazi Banshimiyubusa akaba yaramumenyesheje ariko ko akazoguma ari umusaserdoti akukira iyo Diyoseze.

Sélécous Ndihokubwayo, CEDICOM