Uwo Mwunganizi mushasha wa Patiri Dieudonné Niyibizi yakoreye mu ngata Patiri Olivier Ndayisaba yarungitswe kubandanyiriza ivyigwa hanze mu gihugu c'Ubutaliyano, muri ino nkuru tukaba tugaruka ku vyaranze umugoroba wo kwakira icese Patiri Davy Christophe Niyomuhoza be no gusezera uwo asubiriye

Inyuma y'imisi yababa 10 yari iheze umwunganizi mushasha w'Umuyobozi w'ikigo CEDICOM ca Diyoseze Nkuru ya Bujumbura c'ukumenyesha amakuru, Patiri Davy Christophe Niyomuhoza, atanguye ubutumwa muri ico kigo, Ubuyobozi bw'ico kigo bwarifatanije n'abakozi baco be n'abagenzi b'ikinyamakuru «Kw'Isoko ry'ubuzima» candikwa n'ico kigo, aho batunganije umugoroba w'ukwakira icese mu butumwa uwo musaserdoti, ku wa Kabiri igenekerezo rya 12 Nyakanga 2023.

Karabaye n'akaryo ko gusezera uwo yakoreye mu ngata, Patiri Olivier Ndayisaba, yarungitswe kubandanya ivyigwa mu gihugu c'Ubutaliyano. Ibirori bikaba vyabereye Mu kigo «Marana Tha» kiri muri Karitiye Rohero, i Bujumbura.

Ifoto y'umuryango: abayobozi b'ikigo CEDICOM, abakozi n'abagenzi  b'ikinyamakuru «Kw'Isoko ry'ubuzima» Â© Ifoto ya Michel Nibitanga, CEDICOM

Patiri Dieudonné Niyibizi aramutswa ikigo CEDICOM ni we yari ahagarariye ico gikorwa. Yagize ati: «Uyu musi twaje duhuriye kw’ijambo ryo gusezera Patiri Olivier Ndayisaba, tumwipfuriza ubutumwa bushasha bwiza […]; Umwepiskopi mukuru yashimye ko yoja kubandanya ubutumwa bwo kw’ishure.» Yabandanyije avuga ukuntu Imana yabikoze, ikaba yari yarategekanije uwo wundi, Patiri Davy Christophe Niyomuhoza, wo kumusubirira.

Umuyobozi w’ikigo CEDICOM yaragarutse kuri vyinshi basangiye mu butumwa na Patiri Olivier Ndayisaba, araheza aramukengurukira ku vyo yaterereye vyose ngo ubutumwa bugene neza, be no ku kuntu bakoranye neza. Araheza amwipfuriza ivyigwa vyiza, iyo agiye kuri kaminuza na we ngo yizemwo y’umuryango w’abamisiyonari b’abasaleziyano, mbere yashingiye intahe ko itanga ubumenyi bw’akanovera, ari na co gituma amwitezeko ivyamwa vyiza.

Uwo muyobozi w'ikigo CEDICOM yabandanije ijambo ryiwe ashikiriza ukwipfuriza ikaze ryiza Patiri Davy Christophe Niyomuhoza, Umwunganizi wiwe mushasha. Yagize ati: «Ni iteka ko muri CEDICOM turonse uwuje yarize ibijanye n’ubuhinga dusanzwe dukenera, atakiri umunyeshure!» Arongera ati: «Jewe ndamaze kubona ko afise umwete mwinshi, arashaka kwitanga koko mu butumwa […], numva umenga hariho ikintu tugiye kwunguka, tugatera imbere gusumba!»

Bamwe mu bakozi b'ikigo CEDICOM Â© Ifoto ya Michel Nibitanga, CEDICOM

Nguyo Patiri Davy Christophe Niyomuhoza arahejeje kwakirwa icese. Mbega wewe agona iki kuri ubwo butumwa agenwemwo?  Mu nyishu yiwe agira ati: «Ku mwete numva mfise, icipfuzo kiri muri jewe ni uko ikigo CEDICOM cobandanya gitera imbere.» Yarakengurutse ku butumwa Umwepiskopi Mukuru yamuhaye, arakenguruka ko muri iyo misi amaze yakiriwe neza, akinjizwa mu kigo CEDICOM, akerekwa ibiharangurirwa, arumva nyene ko yisanze.

Patiri Davy Christophe Niyomuhoza aripfuza ko ikigo CEDICOM cotera imbere. Aripfuza ko ikinyamakuru «Kw’isoko ry’Ubuzima» cohurumbirwa n’abantu benshi, kigafasha abakristu kubandanya bazirikana ijambo ry’Imana mu gusoma ico kinyamakuru. Atera akamo amaparuwase ko yoja aritura ikigo CEDICOM mu bikorwa kirangura, gutyo bikazoheza bikagifasha gutera imbere, eka n’ibirangurirwa mu maparuwase bikamenyekana biciye muri ico kigo.

Na we Patiri Olivier Ndayisaba, wewe ngo Ubukengurutsi afise ni uko muri CEDICOM yahamenyeye vyinshi atari yarigeze agira ahandi ahurira na vyo akiri mw'iseminari. Ngo ibikorerwa muri ico kigo yagiye guhurira na vyo aho yiga muri kaminuza, maze agaheza akabizana mu butumwa, ngo abishire mu ngiro.

Yarakengurukiye Umuyobozi n’abakozi b’ico kigo, eka mbere n’abagenzi b’ikinyamakuru «Kw’isoko ry’Ubuzima» ku kuntu bakoranye neza be no ku mutima wo gufashanya mu butumwa. Akaba yarabasezeraniye ko aho agiye mu vyigwa kwongererezwa ubumenyi, ico azobona yofasha cose azogikora ngo ubutumwa bwa CEDICOM bubandanye butera imbere.

Ibubamfu, bamwe mu bakozi b'ikigo CEDICOM, iburyo, umwe mu bagenzi b'ikinyamakuru «Kw'Isoko ry'ubuzima» Â© Ifoto ya Sélécous Ndihokubwayo, CEDICOM

Tubibutse ko uwo Patiri Olivier Ndayisaba yahora ari umwunganizi w'Umuyobozi w'ikigo CEDICOM yari yakiriwe muri ico kigo mu kwezi kwa Nyakanga mu mwaka w'2020, abo muri ico kigo bakaba ico gihe bavuga ko aje hageze, kuko uwo yari yaje kwunganira yayobora ico kigo ari umwe, kuva cuguruwe muri Munyonyo 2017, kandi akabibangikanya n'ubundi butumwa mu bisata bitandukanye vya Diyoseze, ugasanga amabanga amubana umurengera.

Eka na  Patiri Davy Christophe Niyomuhoza, na we nyene aje asanga n'ubu ibintu ari uko bikiri: uwo yunganira asanganzwe ari na Patiri mukuri w’iparuwase, akongera akaba n’umuyobozi mu bisata bitandukanye vy’ubuzima bwa Diyoseze, vyumvikana ko uwo mwunganizi mushasha wiwe ari we azomarana umwanya munini n’abakozi n’abagenzi b’ikigo CEDICOM.

Michel NIBITANGA, CEDICOM

Ivyiyumviro

Rondera

Urutonde rw'Imisa

Mwoba mufise ico mubaza?

Tanga