Amajambo n’inyigisho vyarashikirijwe n'abasaserdoti bakurikiraniye hafi ishirwaho ry'imigwi nk'iyo mu bindi bihugu, eka n'intahe mu buryo bwa vidéo zarashinzwe n'urwaruka rwo muri ivyo bihugu, be n'amajambo yo gutera intege yarungitswe n'abahagarariye ubwo butumwa kw'isi

Urwaruka Katolika rwo muri Diyoseze Nkuru ya Bujumbura rukoresha imbuga ngurukanabumenyi rwaritavye ubutumire bw’ikigo CEDICOM, mw’ihwaniro ryabaye ku w’Imana igenekerezo rya 05 Munyonyo 2023, kugira ngo hatanguzwe icese ubutumwa bushasha bw’Ekleziya bw’ukumenyesha Inkuru Nziza umugabane mushasha w’isi, ugizwe n’abantu bakoresha imbuga ngurukanabumenyi (Continent digital mu gifaransa).

Iryo hwaniro ryabereye muri imwe mu nyubakwa z’amahwaniro za Paruwase yitiriwe Mikaheli mweranda y’i Bujumbura, «Cercle Saint Michel», urwaruka Katolika rwababa 100 rukaba ari rwo rwitavye iryo hwaniro, urundi na rwo mu rushika 1700 rurikurikiranira ikibiriraho ku muhora ngurukanabumenyi Facebook wa Diyoseze Nkuru ya Bujumbura.

Ubwo butumwa bushasha, amamuko yabwo muri Ekleziya

Umusaserdoti ajejwe igisata c’ukumenyesha amakuru muri Diyoseze Nkuru ya Bujumbura, akaba n’umuyobozi w’ikigo CEDICOM, Patiri Dieudonné Niyibizi, yasiguye ubwo butumwa, igituma ari nkenerwa mw’isi ya none, be n’ukuntu bwinjijwe muri Ekleziya kw’isi.

Ubwo butumwa ngo bufise amamuko muri ya nama nsangizangendo igira iya 16 y'Abepiskopi i Roma, yatanguye mu mwaka w'2021. Iyo nama yahamagarira abakristu bose kuja hamwe n'abungere babo ngo bafashanye kuyitegura, basangizanye ingene bogenda bagana Kristu bongera bagendana hagati yabo (synode sur la synodalité), nk’uko vyasabwe na Nyenubweranda Papa Fransisko.

Intumbero y'iyo nama yari iy'ukwihweza ukuntu Ekleziya igenda nk'umuryango, be n'ukuntu ukwo kujana kwiserura mu buzima mu bantu bose, aba-Katolika n'abatari aba-Katolika, «Kugira ngo habe Ekleziya irangwa n'ukuja inama nsangizangendo: Isangiramutima, ukugira uruhara mu muryango n'ubutumwa».

Ibikorwa vyatanguriye mu maparuwase, ivyegeranyo bishirwa hamwe ku rwego rw’amadiyoseze, hanyuma ku rwego rw’ibihugu, ivy’imigabane, ubu bikaba bigeze ku rwego rw’isi yose (Gitugutu 2023). Ni ho rero i Vatikano ngo basanga hari uwundi mugabane wibagiwe, umugabane w’abakoresha imbuga ngurukanabumenyi bagwiriyemwo urwaruka. Haba rero hiyumviriwe ubwo butumwa. Mu bindi bihugu bumaze umwaka.

Patiri Dieudonné Niyibizi, amaze gusigura ukuntu ubutumwa buzoba butunganijwe (gushiraho inzego, gutunganya amahwaniro n’inyigisho, gushiraho imihora y’umugwi ikoresha imbuga zihurumbirwa n’urwaruka rw’i Burundi nka WhatsApp, Facebook, YouTube, Tiktok, blogs, na Instagram, rushireko amajwi, amasanamu, vidéos n’ibisomwa bigufi, bimenyesha Inkuru Nziza), yarunganiwe na Patiri Léonidas Nayuburundi, umusaserdoti wo mu muryango w’abamisiyonari b’Abasaveriyano, yibukije urwo rwaruka ko, nk’abatijwe, bose ari abatumwa.

Ubumwa burashoboka: intahe zivuye mu bindi bihugu

Urwaruka rwari rwaje muri iryo hwaniro, hejuru y’intahe zo mu buryo bwa vidéo rwatungikiwe ku muhora WhatsApp n’urundi rwaruka rwamaze kwinjira muri ubwo butumwa irya n’ino kw’isi (Malawi, Congo Brazzaville na Cameroun), be n’akamo k’abihebeye Imana bakurikirana ubutumwa bw’urwo rwaruka muri Afrika, Mama Leonida Katunge na Patiri Pascal Mwambi, bo mu gihugu ca Kenya.

Rwarashoboye no kwumviriza kandi n’utundi tu-video tw’abahagarariye ubwo butumwa muri Ekleziya baruteye intege, umwe wo mu gisata c’amakuru i Vatikano, uwundi wo mu runani Katolika PACTPAN rwo kumenyesha Inkuru Nziza n’inyigisho ndoramana biciye ku mbuga ngurukanabumenyi.

Nyenicubahiro Musenyeri Lucio Adrian Ruiz, Umuyobozi w’iyandikiro ry’amakuru mu gisata c’ukumenyesha amakuru i Vatikano, yavuze ko ari mu kanyamuneza ntangere yakiranye ukumenya iryo hwaniro, igikorwa yise ica Mutima-Mweranda, ko ari co gituma ata wogisha ako karyo Mutima-Mweranda atanze kuri Ekleziya.

Yagize ati: Â«Ndabatumiriye kugira umwete mu kurangura ubu butumwa. Zaba intambamyi z’ubutunzi, iz’ubuhinga canke iz’ukwitunganya, ntimuze muzireke ngo zibakure ku rukundo mufitiye Umukama na Ekleziya, na cane cane urwo mufitiye urunganwe rwanyu rurindiranye igishika ijambo ry’ihumure rya Yezu, rwiteze ko murugororera ukuboko kwanyu ngo murukirurutse, ruriko rurondera umugenzi yorwumviriza, mbere usanga rukeneye rutanabizi umwizero wo kubaho ubuzima bw’umwuzurira.» Araheza abaha ikaze mu muryango wagutse w’abamisiyonari Katolika bo ku mbuga ngurukanabumenyi.

Furera Stan Ilo Chu, Umuhuzabikorwa mu runani Katolika PACTPAN, wewe yabanje kwibutsa amajambo ya Nyenubweranda Papa Fransisko yibutsa urwaruka ko ari Ekleziya y’ubu, y’uyu musi, ko atari gusa iy’ejo, iyo muri kazoza. Ati: «Ekleziya iri mu minwe yanyu, na Afrika nyene iri mu minwe yanyu, kandi n’Imana iri kumwe namwe; mugiye hamwe murashobora guterera mu kugira Uburundi na Afrika ahantu heza, mu kwubaka Ekleziya ijana igana ejo heza!» Araheza abipfuriza ihwaniro ryiza no kugira ibihe vyiza vy’akanyamuneza.

Mwomenya ko muri Ekleziya yo mu Burundi, Diyoseze Nkuru ya Bujumbura ari yo ibaye iya mbere mu gutanguza ico gisata c’ubutumwa. Ikigo CEDICOM caburahuye ahandi buri kw’isi, kimaze kubwiyumvira mu ntango y’uyu mwaka w’ubutumwa w’2023-2024, caciye gitanguza umugwi WhatsApp w’urwaruka rwo muri iyo Diyoseze, haraheze ukwezi. Ihwaniro ryasozerewe ku Nkuka y’imisa.

Michel Nibitanga, CEDICOM

Ivyiyumviro

Rondera

Urutonde rw'Imisa

Mwoba mufise ico mubaza?

Tanga