Patiri Venuste Niyontore yaripfurije abo bagira banagurwe muri Mutima Mweranda kugira ubuzima bwuzuye Mutima Mweranda, kugira ngo babufise na bo bashobore kuja kubuha abandi, kw'isi harangurwe ibikorwa Umukama ashaka

Ku musi wa Gatandatu igenekerezo rya 27 Nzero 2024, muri Paruwase Mukiza Mweranda yo mu Nyakabiga, abakristu 421 baranaguwe muri Mutima Mweranda. Uwo mugirwa wabereye mu nkuka y’imisa yaherejwe ku gihe c'isaha zitanu z’umusase (11h00), iherejwe na Patiri Venuste Niyontore, umwibutsamana w'abanaguwe muri Mutima-Mweranda.

Abanaguwe muri Mutima-Mweranda ni abari bamaze igihe bavyitegurira, muri bo 28 bakaba ari abanyeshure bo kw’ishure ryisumbuye Lycée Scheppers, abandi 118 na bo bakaba abavuga ururimi rw'ikirundi bo muri iyo Paruwase, n’abandi 129 bo mu mubano w’abavuga igiswahili, na 146 bavuye mu yandi maparuwase.

Patiri Venuste Niyontore yabwiye abo bagira banagurwe muri Mutima Mweranda ko igikorwa ca Mutima Mweranda ari ugusubiza ubuzima abariho, abapfuye bagenda, eka mbere n'abapfuye bagashika.

Ni ukuvuga ko ico gikorwa ngo akirangura ku muntu wese, haba mu muryango w'Ekleziya canke mu miryango yabo. Vyongeye, ico gikorwa, Mutima-Mweranda ngo ashaka kukirangura aciye ku banaguwe, ngo bakirangure mu bandi.

Patiri Venuste Niyontore, mu gusigura ivyo vy’ukubura ubuzima na vyo, yavuze ko bivuze ukutama ivyamwa vya Mutima Mweranda, haba muri bo nyene canke mu miryango yabo, canke mu butumwa bajejwe, eka aho bagendera hose n’aho bakorera.

Ku bwiwe rero ngo ukunagurwa muri Mutima Mweranda ni ugukabura Mutima Mweranda ari muri bo. Kukaba nka ko, ngo baja baramuhawe mw'ibatisimu no mw’isakramentu ry’ugukomezwa. Ikibazo ngo ni ukugira ingabirano ya Mutima Mweranda ntibamenye ko bayifise, canke ntibamenye n'ingene boyikoresha, n'aho boba bazi kubona, ntibayikoreshe.

Uwo musaserdoti akaba rero yaramenyesheje ko ukwo kunagurwa muri Mutima Mweranda bagira bagirirwe ari ugukabura muri bo ingabirano za Mutima Mweranda baronse igihe bubikwako ibiganza bakomezwa muri Mutima Mweranda, gutyo rero ngo bazoheza basubire bagire ubuzima muri bo.

Akaba yarangije abipfuriza kugira ubuzima bwuzuye Mutima Mweranda, kugira ngo babufise na bo bazoshobore kuja kubuha abandi, kubutanga ahandi, mu kurangura ibikorwa Umukama ashaka guha umuryango, waba umuryango wa Paruwase canke imiryango babamwo.

Marie Chantal Nzeyimana, Paruwase Nyakabiga

Ivyiyumviro

Rondera

Urutonde rw'Imisa

Mwoba mufise ico mubaza?

Tanga