Abo bakenyezi bo ngaho mu Kamenge bahawe uwo muhango ni abahurikiye mu mashirahamwe y’ukwiteza imbere basanzwe baronswa inyigisho rukristu na Paruwase Kamenge, bakaba barakengurukiye Imana kw’iteka ibatera mu bikorwa barangura

Umusi mpuzamakungu wahariwe umukenyezi warahimbajwe na bamwe mu bakenyezi bo muri Paruwase Kamenge, abo bakenyezi bakaba bawuhimbaje rukristu ku w'Imana igenekerezo rya 10 Ntwarante 2024, bakengurukira Imana mu kuka y’imisa, kw’iteka ibatera mu bikorwa basanzwe barangura mu mashirahamwe yo kwiteza imbere. Ni mu gihe ku rwego rw’isi wari wahimbajwe imisi ibiri imbere, ku wa Gatanu igenekerezo rya 08 Ntwarante.

Abo bakenyezi batanguriye guhimbaza uwo musi mukuru mu nkuka y'imisa yaherejwe ku gihe c'isaha zitanu irongowe na Patiri mukuru w'iyo Paruwase, Patiri Philbert Ntahimpera, uwo musaserdoti, yisunze ibisoma vyeranda, akaba yahanuye abo bakenyezi abibutsa ko umugore w'ubwenge yubaka urugo rwiwe akoresheje amaboko yiwe, umugore w'ikijuju na we agasambura urugo rwiwe akoresheje akarimi.

Yaciye asaba bano bakenyezi bo mu Kamenge kwama birinda kwisamburirako, ahubwo barangwe n'ibikorwa vyiza mu muryango. Yisunze amajambo y’ijambo ry’Imana ari mu gitabu ca mwene Siraki, aca abahanura kuba riho abapfasoni bicisha bugufi, ntibabe abashira isoni.

Mu mwanya w'ugukenguruka mu misa, abo bakenyezi barashikaniye Imana mu vyo yabahezagije, aho bashikanye ibintu vyinshi kandi bitandukanye. Inkuka y'imisa irangiye, baciye baja kwiginana, nk'uko bari baravyiteguriye, bakaba bakoraniye mu nyubakwa ya paruwase Kamenge yahariwe imisi mikuru yitiriwe Umweranda Guido Maria Conforti, aho bari batewe iteka na Patiri Mukuru ari kumwe na Diyakoni Jean Paul Majambere asanzwe arongoye imihari n'imigwi muri iyo Paruwase, eka mbere n'abandi batumire batandukanye.

Abo bakenyezi barakengurukiye Imana kubona yarabateye iteka ikabashira hamwe ngo baje bariteza imbere. Barakengurukiye kandi na Patiri mukuru wabo ingene adahengeshanya kubitwararika. Eka na Patiri Mukuru yarabakengurukiye cane ku ntambwe bagezeko, aca agirako anabamenyesha ko azobandikira ikete ry'ukubaha uruhusha rwo gukorera mu nyubakwa ya Paruwase, nk'uko bari barabimusavye, kugira ngo n'uwoza mu nyuma kubabaza bazobe bafise icanditse bamwereka.

Twobamenyesha ko abo bakenyezi basanzwe bama bahuzwa n'ugushira hamwe mu kwiteza imbere, bakongera bakaronswa na paruwase inyigisho zibafasha ku mutima no ku mubiri. Ariko kandi si abakenyezi  gusa, harimwo n'abigeme, mbere n'abo mu yandi madini.

Pierre Nduwayezu, Paruwase Kamenge

Ivyiyumviro

Rondera

Urutonde rw'Imisa

Mwoba mufise ico mubaza?

Tanga