Mu kiringo Ekleziya yegereje guhimbaza umusi mukuru wa Pasika, abakristu bo muri Paruwase yitiriwe Umuryango mweranda yo mu Kinama baritavye akamo bama baterwa na Ekleziya ko gushira mu ngiro imwe mu ngingo nkuru zitatu abakristu bagirako mu gihe c’Ikarema, yo kugendera urukundo no kubabarana. Ni na ho ku w’Imana igenekerezo rya 17 Ntwarante 2024 bifatikanije na Ekleziya yose mu gushikana mu nkuka y’imisa ivyo begeranije mu ndwi y’urukundo.

Ico gikorwa c’urukundo no kubabarana co gushikana mu nkuka y’imisa iyo mfashanyo yo mu ndwi y’urukundo cabereye mu nkuka y’imisa igira iya gatatu mu zisanzwe ziherezwa buri ku musi w’Imana, iy’uwo musi w’Imana ugira uwa 5 wo mu gihe c’ikarema ikaba yaherejwe na Patiri mukuru w’iyo Paruwase, Patiri Jean Martin Nzirubusa. Ico gikorwa cararanguwe kandi no ku mashure tabariro ya Gasenyi na Carama-Gahahe-Gatunguru. Muri rusangi abakristu bitabiriye ubwo butumwa ari benshi muri izo nkuka z’imisa

Patiri Jean Martin Nzirubusa, mu mwanya w’insiguru y’ijambo ry’Imana, yaribukije izo ngingo zitatu z’inyifato abakristu baba bakwiye kurushirizaho gukomeza ko mu kiringo c’Ikarema, ko ari igihe co kurushirizaho gusenga, kwipfunga ndetse no kubabarana.

Ivyegeranijwe mu ndwi y’urukundo vyashikirijwe Paruwase mu mwanya w’ihereza, aho abakristu isinzi babicana imbere ya Altari ngo bihezagirwe, bigaheza bigashirwa ahari hateguriwe ubwo butumwa. Baja baraza batonze umurongo, bagashikana ivyo begeranije mu mice itandukanye: imibano mito mito rukristu, imihari n’iyindi migwi y’ubutumwa, amashure akukira Ekleziya Katolika, ndetse n’abandi bakristu muri rusangi. Na vyo ivyo bashikanye vyari bigizwe n’impuzu, ibipfungurwa, ibirato, amahera n’ibindi.

Ivyashirikirijwe vyose bizoca vyegeranyirizwa hamwe, birungikwe mu gisata Caritas Burundi c’Ekleziya y’i Burundi c’urukundo n’ukubabarana, ngo igice kimwe kigaburirwe amaparuwase, kizokoreshwe mu kugarukira no gufasha abantu bakeneye guhabwa imfashanyo kuruta abandi.

Urukundo n’ukubabarana, ubutumwa bugamburukwa n’Ekleziya kuko bwashinzwe na Kristu we nyene

Kuva mu ntango z’Ekleziya ya mbere y’abatumwa, abakristu bari basangiye umutima n’ubuzima mu kumenyesha Inkuru Nziza. Icabaranga ni isangiramutima mw’isangirabutumwa, bijanye n’ugusangira ivyo bari bafise vyose, ukubabarana n’ukwitwararikana, kuko ni co ibwirizwa ry’Urukundo barazwe n’Umukama wabo Yezu Kristu ryabategereza.

Iyo ngendo nziza na Ekleziya yarayibandanije gushika n’ubu: gusukurira abandi ku mubiri, mu vy’ukubafungurira, kubuhagira, kuvura abarwaye no kuremesha abababaye. Ivyo turabisanga muri kahise k’Ekleziya, aho n’imbere y’uko habaho amaparuwase, hari hasanzweho ibimeze nk’imibano mito mito rukristu, Ekleziya yo mu kibano yubakiye ku gusukuriranira («diaconies» mu gifaransa – ijambo rivuye mu kigiriki «Diakonia», risigura «ubusuku».

Iyo Ekleziya yo mu kibano yari itunganije ku buryo ibikorwa vy’urukundo vyari vyarabaye umuco, na cane cane ku bakeneye gufashwa gusumba abandi mu kibano (aboro, abarwaye, abageze mu za bukuru, abapfakazi batagira aho bikora, bigafatwa nk’uburyo bwo gushira mu ngiro ubutumwa bwa Kristu ku bakene, nk’ico umukristu yokora ubwo nyene akibona uwukeneye ubufasha, nk’intahe abakristu n’Ekleziya bashingira bagenzi babo mu kibano.

Ekleziya yo mu kibano ifashanya yatanguye kwiyubaka mu gihugu ca Misiri amaja hagati mu kinjana ca IV, mu nyuma ibaho mu buryo butunganijwe neza i  Roma no mu Butaliyano imbere y’ikinjana ca VII. Ni yo yaba ijejwe ivy’ugutabarana mu gisata cayo c’urukundo. Gusa n’imbere yaho, uwo muco wowo wari usanzwe uriho muri Ekleziya nk’uko tuwuzi mu vyanditswe vyeranda vy’ibikorwa vy’abatumwa, ariko ata ndinganizo itomoye neza iwuranga.

Uwo ni na wo muco abakristu bo muri Paruwase Kinama baja baramaze kumenyera: ntibabigira mu ndwi y’urukundo gusa, barabigira n’ikindi gihe cose baba batewe akamo n’abarongoye Ekleziya iyo basabwe guterera agacumu k’ubumwe, nko ku musi mpuzamakungu wahariwe aboro canke uwahariwe abarwayi, no mu buzima bwo mu kibano, biciye mu mibano rukristu.

Alexis Niyonzima/Paruwase Kinama