«Ivyo Umukama yatugiriye ni agatangaza, natwe turi mu kanyamuneza», iyo ni Izaburi yashimikiweko cane n'abakristu bo kw'ishure rya Nyabagere ku w'Imana igenekerezo rya 14 Ndamukiza 2024, aho bari baramutse bigina isabukuru y'imyaka icumi iryo shure tabariro rimaze ribayeho.

Ihimbazwa ry’uwo musi mukuru ryatanguriye ku nkuka y'imisa yaherejwe kuri iryo shure tabariro, irongowe na Patiri mukuru wa Paruwase Kamenge, Patiri Philbert Ntahimpera.

Iyo nkuka y'imisa yatangujwe n'urugendo, aho abaserukiye abandi bagenda bagana mu ngoro y’Imana, imbere bafise amatara icumi amenyesha imyaka icumi iryo shure rimaze. Imigwi y'abaririmbiramana ibiri, umugwi «Air des Anges» n’umugwi «Saint Jean Paul-II», ni yo yaremesheje iyo nkuka y'imisa mu masabamana y’indirimbo.

Inyuma y'inkuka y'imisa, abakristu baciye biginana. Mu birori vyashikirijwe, harimwo n’utugenegene tudasanzwe, aho abihebeye Imana (ababikira n'umufurera) bamwe bamwe baboneyeho kwerekana ingabirano zabo zaryoheje igiteramo.

Amajambo atandukanye yashikirijwe, ahanini yari ajanye n'ingene iryo shure rya Nyabagere ryagiye riratera imbere. Rimwe muri ayo majambo, uwurongoye iryo shure, Furera Jérémie Hatungimana, yagarutse kuri vyinshi vyaranguwe muri iyo myaka icumi, aca agirako amenyesha ivyo iryo shure rikeneye vyotuma ritera imbere gusumba.

Désiré Niyibitanga, Paruwase Kamenge