Mu muvukano w'abakozi ba Leta n'abikorera ivyabo baba muri Paruwase Kamenge yitiriwe Umweranda Guido Maria Conforti, ku w'Imana igenekerezo rya 12 Rusama 2024, kw'idominika y'indwi ya Pasika, kari akanyamuneza kadasanzwe, aho abagize uwo muvukano bari baramukanye isabukuru y'imyaka icumi n'ibiri bamaze barangurira ubutumwa muri iyo Paruwase.

Uwo muvukano wari ufise n'abashitsi basanzwe bahurikiye muri uwo muvukano nyene, ariko barangurira ubutumwa mu yindi paruwase, iyo muri Diyoseze ya Ngozi, Paruwase Gatara yitiriwe Tereziya w'umwana Yezu no mu maso heranda, ibirori bikaba vyatangujwe n'inkuka y'imisa y’ubukengurutsi yaherejwe na Patiri mukuru w’iyo Paruwase Gatara, Patiri Emmanuel Nzeyimana.

Muri iyo nkuka y'imisa, uwo musaserdoti w’umushitsi yatumiriwe abari aho kuba umwe nk'uko Yezu Kristu na Se bari umwe, nk'uko vyasomwe mu Nkuru Nziza ya Yezu Kristu, aho Yezu We nyene yashikirije igisabisho asaba Imana ati: «Dawe, nugumye mw'izina ryawe abo wampaye, kugira ngo babe umwe nkatwe!»

Muri iyo nkuka y'imisa nyene, abari muri uwo mubano barahereje amashikanwa yabo y'ugukengurukira Imana ku myaka cumi n'ibiri bamaze barangurira ubutumwa muri Paruwase yitiriwe umweranda Guido Maria Conforti, ndetse n'abaje bava muri Paruwase Gatara.

Inyuma y'iyo nkuka y'imisa, ibirori vyabandanirije mu kigo c'iyo Paruwase mu nyubakwa yitiriwe Umweranda Fransisko Xaveri, aho babandanije bipfurizanya isabukuru nziza, banakira abashitsi babagendeye, aho mbere banerekanye abasuku bashasha ndetse n'abo bagiye gufashanya gusukurira uwo muvukano w'abakozi ba Reta n'abasanzwe bikorera ivyabo bo muri Paruwase Kamenge.

Ivyo birori bikaba vyarangiye baririmba indirimbo z'ugukengurukira Imana mu kanyamuneza ntangere, hanyuma Patiri Mukuru wo muri Paruwase Gatara aca arabashikiriza umuhezagiro w'Imana wo kwikebanurana.