Patiri Philbert Ntahimpera, Patiri Mukuru, yavuze ko yipfuza ko uyu mwaka uzorangira abasaserdoti bagendeye imibano mito mito yose igize iyo Paruwase uko ari 94, kandi bakayihererezamwo inkuka z'imisa, aca aboneraho gutumirira abari aho kwijukira kuja mu mibano mito mito

Ku w'Imana igenekerezo rya 26 Rusama 2024, aho muri Ekleziya hari haramutse hahimbazwa umusi mukuru w'ubutatu bweranda, imwe mu mibano mito mito yo muri Paruwase Kamenge yarahimbaje isabukuru y'imyaka 26 imaze mu butumwa, mu nkuka y'imisa yaherejwe ku gihe c'isaha zitanu, irongowe na Patiri Mukuru w’iyo Paruwase, Patiri Philbert Ntahimpera.

Uwo musaserdoti yabwiye abari muri iyo mibano n’abakristu bose ko mu guhimbaza Ubutatu Bweranda ari ukuraba ubumwe buhari hagati yabo. Kukaba nka kwo, ngo mu Butatu Bweranda nta shari rihari kandi nta nzigo, ahubwo hari ubumwe, urukundo n’amahoro. Ati: «Abantu bose bari bakwiye kumera nk'Ubutatu Bweranda, bakabaho ata nzigo, ata nsaku, ahubwo hakaba ubumwe mu buzima bwabo.»

Yaciye abaza abari mu mibano mito mito bari baje guhimbaza iyo sabukuru y'imyaka 26 ko mu mibano ata nzigo iriyo canke urwanko, aca abasaba ko bokwama bari mu bumwe, kandi bakarangura neza ubutumwa bajejwe mu kwirinda gusaba ibi na biriya abagiye kubasaba ko babandikira impapuro n'ibindi. Akaba yaraboneyeho gutumirira abari aho kwijukira kuja mu mibano mito mito.

Yaragarutse kandi no ku bari mu muhari w'Ingendanyi bo kw'ishure kaminuza nderabigisha ENS bari baje guhimbaza isabukuru y’imyaka 25 bamaze batanguye ubutumwa kuri iryo shure, hakaba harimwo n'abagira bace baronka indagano za mbere n'iza kabiri ku bari baravyiteguriye. Yabasavye ashimitse ko bokwirinda kwiyemeza ivyo batazoshobora; ngo bopfuma babireka. Aca abasaba kuzorangura ivyo biyemeje mu kwigora kandi bakaba abatumwa babushitse.

Mu mwanya w'ugukenguruka, abari mu mibano mito mito yari iramutse ihimbaza isabukuru barakengurukiye Imana cane mu kuyishikanira, aho bashikanye ibintu bitandukanye bizofashishwa ba ntahonikora, bongera baratanga n'imifuko y'isima yo kwubaka inzu y'amanama y'akarorero abakristu bo muri Paruwase Kamenge bariko bariyubakira bo nyene.

Inkuka y'imisa irangiye, abo bari mu mibano mito mito yari iramukanye umusi mukuru w'isabukuru baciye babandaniriza umusi mukuru wabo mu nyubakwa y'imisi mikuru yitiriwe Umweranda Fransisko Xaveri iri mu kigo ca Paruwase, baraheza bariginana mu kanyamuneza nta ngere, batamba batarika.

Tubamenyeshe ko ubu muri iyo Paruwase ya Kamenge bageze ku mibano mito mito 94.  Patiri Mukuru, mw'ijambo yashikirije, akaba yavuze ko yipfuza ko uyu mwaka uzorangira iyo mibano yose bayigendeye, kandi bakayihererezamwo inkuka z'imisa.

Pierre Nduwayezu, Paruwase Kamenge

Ivyiyumviro

Rondera

Urutonde rw'Imisa

Mwoba mufise ico mubaza?

Tanga