Agakemanyi abakristu bo muri Paruwase Mubimbi bashiriye abo banyagihugu bo mu Gatumba ni ako bashoboye kwegeranya, bunganiwe n’umusaserdoti wo muri Diyoseze ya Rutana, Patiri Augustin Ndayishimiye, muri iki gihe ari mu butumwa mu gihugu ca Espagne

Ku musi wa Gatatu igenekerezo rya 5 Ruheshi 2024, abakristu bo muri Paruwase Mubimbi, bari kumwe na Patiri Mukuru wa Paruwase yabo, Patiri Laurent Nkurabanka, baragiye kugarukira ku banyagihugu bene wabo bo mu Gatumba, ubu begeranirijwe ku mutumba wa Gisagara muri zone Mubimbi na Paruwase Mubimbi nyene.

Agakemanyi abo bakristu babashiriye ni ako bashoboye kwegeranya, bunganiwe n’uwundi musaserdoti wo muri Diyoseze ya Rutana muri iki gihe asanzwe ari mu butumwa mu gihugu ca Espagne, Patiri Augustin Ndayishimiye.

Ivyashoboye kwegeranywa bigashikirizwa abo banyagihugu ni: ibiharage, ibigori, umuceri be n’ibindi bifungurwa bitandukanye, vyose hamwe bifise agaciro k'amafaranga angana n’imiliyoni 11. Muri ico gitigiri c’ayo mafaranga, uwo musaserdoti asanzwe ari mu gihugu ca Espagne akaba yatanzemwo intererano ingana n'amafaranga yababa umuliyoni n’igice, ni ukuvuga ibice 9% vy’ayegeranijwe yose hamwe.

Patiri mukuru wa Paruwase Mubimbi yarakengurukiye cane uwo musaserdoti, yongera aramusabira ku Mana ngo imusubirize aho yakuye, kumwe n'abakristu bo muri Paruwase Mubimbi, n'umusaserdoti asanzwe arongoye iyo Paruwase yabaherekeje.

Abo banyagihugu na bo bari baramutse bagendererwa yabasavye kwakira no gushimira ivyabonetse uko bingana kwose, kuko ngo vyavuye ku mutima ubakunda. Vyongeye, ngo abakristu b’i Mubimbi barababajwe cane n’ivyashikiye abo bene wabo!

Yaheraheje abasaba kubandanya bigenza runtu,  bagasonera amabwirizwa y'Imana, kandi bakirinda ubuhumbu, abavyeyi na bo bagafashanya kureranira. Ikindi yabasavye ni ugusonera amategeko y'igihugu be no kugira isuku ngo bashobore kurwanya indwara z'ivyaduka ziva kw’isuku rike, nka Choléra n'izindi.

Tubibutse ko abo banyagihugu bo mu Gatumba bagendewe aho ku mutumba wa Gisagara begeranirijwe muri zone Mubimbi ari abahimuriwe biturutse ku mwuzure w'amazi uturutse ku ruzi Rusizi n’ikiyaga Tanganyika wagiye urabatera incuro nyinshi, uko igihe c’imvura kigeze.

Yezu ati: «Nari nshonje murangaburira, nari kavantara murantora, nagenda gusa muranyambika, nari mw'ibohehero murandaba; ico cose mwagiriye umwe muri abo bato bato ni jewe mwakigiriye.»

Patiri Laurent Nkurabanka, Paruwase Mubimbi

Ivyiyumviro

Rondera

Urutonde rw'Imisa

Mwoba mufise ico mubaza?

Tanga