Ivyipfuzo n’ibisabisho vyacu ni uko ata n’umwe yova ngaha adahuye n’Imana ngo baganire, Imuyagire, na we ayiyagire, bagire ico bapfunditse cerekeye ubuzima; muracariko murarondera ubuzima, kazoza kanyu mukaragize iyo Mana yabaremye (Nyenicubahiro Musenyeri Gerevazi banshimiyubusa)

Diyoseze Nkuru ya Bujumbura, ibicishije ku gisata cayo CDAL kijejwe ubutumwa bw’abalayike, yaratunganije ihwaniro ry’imisi ine ryo muri uyu mwaka w’2024, kuva ku wa mbere igenekerezo rya 12 gushika ku wa Kane igenekerezo rya 15 Myandagaro. Iryo hwaniro ribera mu kibanza citiriwe «Igicaniro c’urukundo» (Foyer de charité), rikaba ryuguruwe na Nyenicubahiro Musenyeri Gerevazi Banshimiyubusa, Umwepiskopi Mukuru w’iyo Diyoseze.

Muri ibi bihe vya none vyuzuye ibibuza akanyamuneza urwaruka bidasanzwe, Ekleziya y’i Bujumbura iriko iruremesha ngo rugarukane umwizero ku Mukama, ku civugo ngenderwako kigira kiti: «Akanyamuneza n’umwizero dusanga mu masakramentu». Ni ihwaniro rihuza urwaruka ruhurikiye mu mihari n’imigwi y’ubutumwa bw’Ekleziya Katoloka n’urutayirimwo, rwaje ruzananye mu maparuwase atandukanye agize iyo Diyoseze. Mu bavyeyi bari baje gushigikira urwo rwaruka hakaba harimwo n’icegera c’umukuru w’igihugu c’Uburundi, Prosper Bazombanza, n’umutambukanyi wiwe.

Nyenicubahiro Musenyeri Gerevazi na we, mu Nkuka y’imisa yo kwugurura iryo hwaniro, yarahaye intumbero urwo rwaruka ku kuntu iryo hwaniro rwogira ico ruryungukiyemwo canke ruryunguranyemwo cerekeye ubuzima. Yavuze ko ihwaniro nk’iryo ryama ari akaryo keza k’uko bahura hagati yabo, mu myaka bagezemwo, bakaganira, bakaremeshanya; umwe wese akagira ico abariye uwundi, ico amwunguye, n’ico yungutse.

Yagize ati: «Ntihaze rero hagire abava ngaha bataronse akaryo ko kuganira n’abandi, kuko boba bahovye! Rero kaje kabe akaryo keza k’uko mwoganira, kandi muganira ivyubaka, ibibubaka, ntimuganire ibibasambura, canke ngo bibatume mugira umutima mubi.» Akaba yarabipfurije ko ivyo boganirira mu kibanza yise «Igicaniro c’urukundo» («Foyer de charité» mu gifaransa, kuko ari kwo hitwa) vyoba ibiganiro bijanye n’urukundo rubateza imbere mu buzima bwabo.

Ariko kandi, hejuru ya vyose, ihwaniro nk’iryo ngo ni akaryo keza ko guhura n’Imana mu buryo budasanzwe. Ni co gituma ivyipfuzo n’ibisabisho vy’uwo Mwepiskopi Mukuru ngo vyari ivy’uko ata n’umwe yova ngaho adahuye n’Imana, ngo baganire, Imuyagire, na we ayiyagire, bagire ico bapfunditse cerekeye ubuzima. «Muracariko murarondera ubuzima, kazoza kanyu mukaragize iyo Mana yabaremye, ikaba yabahaye gushika ngaha uyu musi», ni ko yabahanuye.

Mu gisata CDAL ca Diyoseze Nkuru ya Bujumbura kijejwe ubutumwa bw’abalayike, mu kiyago na Patiri Janvier Nizigiyimana, yagarutse ku kuntu mu masakramentu Yezu yashinze urwaruka ruharonka akanyamuneza, gutyo rero rukaba rukwiye kugira umwizero wa kazoza. Kukaba nka kwo, ngo hari vyinshi cane vyerekana ko urwo rwaruka rufise inyota yo guhura n’Imana, ariko ngo rugahura n’ibirubuza akanyamuneza, rukihebura.

None ibibuza akanyamuneza urwaruka rwo muri Diyoseze Nkuru ya Bujumbura ni ibiki, rukeneye kuremeshwako? Aphémie Niyukuri na Richard bo muri Paruwase yo mu Buterere, be na Erson Ntunzwenimana wo muri Paruwase ya Rushubi, baratwiganiye ibitesha akanyamuneza urwaruka rw’aho baherereye, n’umwizero biteze muri iryo hwaniro.

Bimwe mu vyo bavuze ni ivy’uko abavyeyi baha umwitwarariko muke abana, ntibabarereshe indero runtu na rukristu ikenewe, maze bano bagakurana ingeso mbi, ahandi na ho bagasamazwa n’ibitabereye bica ku mbuga ngurukanabumenyi no ku mboneshakure, bamwe mbere bagaheba amashure. Baravuze kandi no kwishora mu biyayuramutwe, mu busuma no mu busambanyi, bibononera imibiri n’imitima, bamwe mbere bikanabahitana. Nk’abaje muri iryo hwaniro bakaba barigiriye inama yo kwegera urundi rwaruka, ngo barushire umwizero baronkejwe, bongere barusabire.

Mwomenya ko ku rutonde rw’ivyari bitegekanijwe harimwo inyigisho nkomezakwemera ku kuntu muri Ekleziya Katolika ari ho hatangirwa amasakramentu azana akanyamuneza, inyigisho ku kwitaba ijwi ry’Umukama, yunganirwa n’iy’ukwitegurira kwubaka rukistu, inyigisho ku buhinga bwa none mu vy’ukwemera n’amasakramentu, be n’inyigisho ku kuntu Imana yiyereka abantu, mu bo yiyereka hakaba harimwo n’urwaruka.

Ha mbavu y’inyigisho, hariho kandi n’imyanya yo gusenga, gushengerera Yezu mw’Ukaristiya, Inkuka z’imisa, kuronswa akanya ko kubaza ku vyo badatahura vyerekeye ukwemera kw’Ekleziya Katolika, be no guhura bakayaga, nk’uko Umwepiskopi yabivuze, kandi bagashingiranira intahe, bakanagiriranira ivyiza. Tubamenyeshe kandi ko n’ihwaniro ryo ku rwego rw’igihugu ryaheruka kuba, rikaba ryabereye muri Diyoseze ya Ruyigi.

Michel Nibitanga, CEDICOM

Ivyiyumviro

Rondera

Urutonde rw'Imisa