Ubusaserdoti bwawe buragutumbereza ku kuba umusaserdoti abeshwaho n’Ukaristiya, kandi afasha n’abandi kubeshwaho n’Ukaristiya; urama uriko urahanura iyi si ngo yoye kwigenza nk’ikiburabwenge gihitamwo amayira y’agaheza, ha guhitamwo amayira y’ubuzima buri muri Ukaristiya (Nyenicubahiro Musenyeri Gerevazi Banshimiyubusa)

Mu muryango w’abagendanyi ba Yezu (la Compagnie de Jésus ou les Jésuites mu gifaransa), mu ntara yabo y’ubutumwa y’Uburundi n’Urwanda, ku w’Imana igenekerezo rya 18 Myandagaro 2024, birirwanye akanyamuneza ku bw’umugendanyi wa Yezu mugenzi wabo Emmanuel Ndorimana yatewe iteka n’Imana ry’ukumusangiza ubusaserdoti n’Umwana wayo Yezu Kristu.

Patiri Emmanuel Ndorimana akaba yaratiwe na Nyenicubahiro Musenyeri Gerevazi Banshimiyubusa, Umwepiskopi Mukuru wa Diyoseze Nkuru ya Bujumbura, ishengero isinzi ry’aba-Jésuites rikoranye, mu nkuka y’imisa yaherejwe mu ngoro y’Imana yitiriwe Umushaha Mweranda wa Yezu iri kw’ishure ryisumbuye ryitiriwe Mutima-Mweranda ry’i Bujumbura (Lycée du Saint Esprit).

Uwo Mwepiskopi w’Ekleziya y’i Bujumbura, imbere y’uko yatira uwo yagira aterwe iteka ryo kwinjira mw’ibanga ry’ubusaserdoti busuku, yaramutekereye ijambo rishingiye ku bisomwa vyeranda vyo kuri iyo Dominika, ry’ukwama azirikana ubutumwa buhambaye yaronse bwo gufasha igihugu c’Imana kubeshwaho n’Umukate w’Ubuzima budahera. Yagize ati: «Ubusaserdoti bwawe buragutumbereza ngaho: kuba umusaserdoti abeshwaho n’Ukaristiya, kandi afasha n’abandi kubeshwaho n’Ukaristiya.»

Yaribukije ko Ukaristiya ari yo irema ubumwe nyabwo, umusaserdoti na we akaba ashinzwe kuja kwigisha, kugira ngo abantu babe mu bumwe. Gusa ngo yigishije vyonyene, abantu ntibaronke ubwo bukomezi buva muri Ukaristiya, ubwo bumwe ngo ntibuzogira ishingiro.

«Ukaristiya ni yo irema ubumwe nyabwo, umuvukano nyawo, n’urukundo rw’ukuri mu bantu; Ukaristiya ni yo kandi itanga ubuzima buhoraho; urama rero uriko urahanura iyi si, ngo yoye kwigenza nk’ikiburabwenge, gihitamwo amayira y’agaheza, ha guhitamwo amayira y’ubuzima buri muri Ukaristiya», ni kwo yashimangiye avuga, mu mpanuro yamuhaye.

Akaba yaramwemereye guhava amusabira, kugira ngo Ignace w’i Loyola mweranda, umuvunyi w’umuryango wabo, azokwame amwama hafi, maze ubwo busaserdoti yagira agabane buzobere umuhezagiro abo bazobana bose, n’abo azorangurirako ubutumwa bose.

Igihe kigeze, abisabwe n’uwuserukira umuryango w’abagendanyi ba Yezu mu ntara y’ubutumwa y’Uburundi n’Urwanda, Patiri Fabien Kasigwa, yaratiye rero mw’ibanga ry’ubusaserdoti Diyakoni Emmanuel Ndorimana.

Patiri Fabien Kasigwa na we, kw’izina ry’umuryango w’aba-Jésuites, araheza yuhira mu ry’Umwepiskopi, ko hejuru y’ivyo Nyenicubahiro Musenyeri Gerevazi Banshimiyubusa yamwatuyeko, yokwongerako kwama na ntaryo yiragiza Umuvyeyi Bikira-Mariya. Mbere yaciye agirako amwaturirako igisabisho co kumuragiza uwo Muvyeyi w’abatumwa n’uw’Ekleziya.

Mu gusiguye igituma yumva ata n’ikindi yovuga atari ukumuragiza uwo Muvyeyi, Patiri Fabien Kasigwa yaribukije ukuntu umuco w’ikirundi n’ikinyarwanda ukundisha abantu abavyeyi babo, ko ata kiruta umuvyeyi. Ati: «No mu kwemera ni ko bimeze: turakunda kandi tukiyambaza Bikira Mariya Umuvyeyi w’Imana n’Umuvyeyi wacu; nta co tumunganya naco kuko ni Umuvyeyi w’Ekleziya, Umuvyeyi inema z’imana zikomokako, Umuvyeyi ugira abantu inama nziza, Umuvyeyi ukwiye gukundwa».

Akaba yamusavye kumukunda no kumwiyambaza, kuko ngo niyamwisunga, azomufata ukuboko, akamushikana aho atokwishikana: ngo azomubera akarorero mu buhanuzi; ngo mu gutunganya ubutumwa Umwepiskopi n’umukuru w’umuryango bazomuha, ngo arashobora kuzohura n’ivyo atumva, canke yumve ivyo atari azi ko bibaho, ngo ntibizomutere ubwoba, ahubwo azibuke ko na Bikira-Mariya vyamushikiye, agasiguza umumalayika Gabriyeli agira ati: «Ivyo bizoshoboka bite? Bikarangira birangutse». Ati: «Nawe, ufashijwe n’Imana yagutoye, uzohora ubona inyishu y’ibibazo yibaza n’ivyo abakristu bamubaza!» Akaba yaramwipfurije kuba umusaserdoti adahuruduka.

Patiri Emmanuel Ndorimana, mwene André Bacamurwanko na Immaculée Ndimurukubo (batakiriho), avuka muri Paruwase ya Kiremba, muri Diyoseze ya Ngozi. Uwo musaserdoti mushasha, mw’ijambo yashikirije, ntiyahengeshanije gushimira umuryango wasigaranye ubutumwa bwo kumurera mu gishingo c’abavyeyi, n’abandi bose bagize uruhara ngo ashike ku ntambwe y’ubusaserdoti.

Mu ntahe yiwe, yavuze umuhamagaro wiwe mu kumuzamwo, n’ico yumva uzomushikanako, kirengeye ubusaserdoti busanzwe. Yavuze ko wamujemwo ari mu misa, akumva inyigisho y’umusaserdoti wo muri Paruwase y’iwabo, agaca yiha intumbero yo gushikira ubweranda. Ngo ni aho rero yumva ko n’ubundi intumbero yiwe atarayishikira.

Ni na co gituma abandanya asaba inema yo kukora ineza no kwirinda inabi, mu kwinjira mu busaserdoti na ho ngo akaba yashaka gufasha n’abandi kugira gutyo, kugira ngo bazosangire ubuzima budahera, kumwe na Yezu yabacunguye. Ku bwiwe rero ngo mu kwatirwa mu busaserdoti akaba yumva ico yahawe ari impamba izomushoboza gushika kuri iryo hangiro, akaba kandi ngo yabikengurutse cane, yongera aterereza igisabisho.

Umuryango w’Abagendanyi ba Yezu Patiri Emmanuel Ndorimana yatiwemwo mu busaserdoti ni umwe mu miryango ya vuba cane mu miryango y’abamisiyonari y’Ekleziya Katolika. Washinzwe mu mwaka w’1540, mu gihugu c’Ubutaliyano, ushinzwe na  Ignace w’i Loyola mweranda. Ubutumwa bwabo bushingiye ku gushingira intahe Imana no kumenyesha Inkuru nziza ya Kristu no kuzanira imishaha urukiza biciye mu bikorwa no mu ngiro.

Mu Burundi no mu Rwanda, barangurira ubutumwa mu bisata vy’indero mu mashure, mu kuremesha abagendana umugera wa SIDA n’abageze mu za bukuru, no mu gufasha impunzi. Mu Burundi, bakaba bafise umubano mu gisagara ca Bujumbura, kw’ishure ryisumbuye ryitiriwe Mutima Mweranda ryo mu Gihosha, be no mu kigo nkomezamutima Emmaüs, ahari ikigo ca kaminuza ya Leta c’i Kiriri. Umwepiskopi Mukuru wa Diyoseze Nkuru ya Bujumbura akaba ashima ubutumwa bwabo, yongera abipfuriza kugwira no mu yandi madiyoseze.

Michel Nibitanga, CEDICOM

Ivyiyumviro

Rondera

Urutonde rw'Imisa

Mwoba mufise ico mubaza?

Tanga