Ku musi w'Imana igenekerezo rya 1 Nyakanga 2024, muri paruwase Matara harabaye ibirori vyo kwakira Patiri Mukuru mushasha, Patiri Léon Nizigama, hamwe no gusezera Patiri Mukuru yahahora, Patiri Tito Ndayishimiye, yarungitswe mu bundi butumwa.

Ivyo birori vyatanguriye ku nkuka y’imisa yatanguye ku gihe c’isaha zine (10h00) z’agatondo, irongowe na Patiri Mukuru mushasha, Patiri Léon Nizigama, na ho inyuma y’iyo nkuka y’imisa, ibirori bibandanyiriza ku kwiginana hagati y’abo basaserdoti n’abakristu baserukira abandi, eka mbere n’abihebeye Imana barangurira ubutumwa muri iyo paruwase.

Patiri mukuru yahahora, Patiri Tito Ndayishimiye, mw’ijambo yashikirije, yarakiriye uwuje kumukorera mu ngata, Patiri Léon Nizigama. Yabandanije ashimira abanyeparuwase bose basangiye ubutumwa mu kiringo cose yari amaze muri iyo paruwase.

Uwo musaserdoti yaribukije abo bakristu ko atari uwa mbere yaje muri iyo paruwase kandi akagenda, kandi ko atibaza ko ari n’uwa nyuma, ari na ho yafatiye mu kubibutsa ko paruwase ari umuryango wabo, araheza aca abasaba kubandanya bakomeza ubutumwa, kugira ngo hazogere igihe abantu bazoja baraza bava irya n’ino baza gutangarira Matara.

Tubamenyeshe ko Patiri Tito Ndayishimiye, ubundi butumwa agiyemwo ari ubw’imihari n’imigwi kw’ishure rikuru ry’i Muramvya. Mw’iparuwase azohaba ahereza inkuka z’imisa, kwunganira Patiri mukuru no gutanga amasakramentu, ariko ahanini ubutumwa abufise mw’ishure.

Ubwo butumwa, aho i Muramvya bwahora burangurwa na Patiri Léon Nizigama nyene, yunganira umusaserdoti ayoboye iryo shure. Ni na ho nyene Patiri mukuru mushasha wa Paruwase Matara aje azananye.