Mu guhimbaza uwo musi mukuru, abo baririmbiramana barahaye agafashanyo k’ibifungurwa abatishoboye batowe mu mibano igize ishure tabariro rya Nkuba ngo basangire na bo ivyo Imana yabahezagije

Abahurikiye mu mugwi w'abaririmbiramana witiriwe umweranda Fransisko w'i Assize wo kw’ishure tabariro rya Nkuba muri Paruwase Magara, ku w'Imana igenekerezo rya 6 Gitugutu ni ho bahimbaje umusi mukuru w'umuvunyi wabo ku ncuro ya mbere.

Ibirori vyahereye mu gihimbazo cinjiye ku gihe c'isaha zitatu z'igitondo kiyobowe n'umumenyeshamana mukuru wo kw’ishure tabariro rya Nkuba, Mwarimu Léonce Nintunze. Uwo mumenyeshamana yabwiye abakristu bari aho babona abo baririmbiramana mu kanyamuneza ko ari uko bafise umusi mukuru, araheza rero aca abasigurira uwo musi mukuru uwo ari wo.

Mwarimu mukuru Léonce Nintunze yamenyesheje ko bariko barahimbaza bongera bibuka umweranda batoyeko umuvunyi, Francisco w'i Assize. Yaciye atumirira abakristu, cane cane abo baririmbirama kumufatirako akarorero keza.

Umusuku w’umugwi w’abo baririmbiramana, Onesphore Ntakarutimana, na we nyene yarafashe ijambo, aho yavuze ivy’ukuntu uguhimbaza umusi mukuru w'umuvunyi kuri bo ari ikintu gishasha, kuko ngo babikoze ku ncuro ya mbere.

Ngaha yarasiguye ko igituma ari ubwa mbere babikoze ari uko batahora babikora, kuko wasanga imigwi y’abaririmbiramana atari yose ifise abavunyi. Nk’abo muri uwo mugwi ngo bagiye kwinjira muri urwo rutonde aho haziye indinganizo ya Diyoseze y'uko imigwi y’abaririmbiramana yose ibwirizwa kuba ifise abavunyi yisunga mu butumwa. Mu mugwi witiriwe Francisco w'i Assize hakaba rero ngo haciye umwaka umwe gusa batoye uwo mweranda kubabera umuvunyi.

Onesphore Ntakarutimana yaravuze kandi n’icatumye mu mugwi wabo bahitamwo uwo mweranda mu bandi benshi ari uko bashimishijwe n'ibikorwa vyiza yakoze amaze guhindukirira Imana: ukwubaka amasengero, ugutanguza imiryango y'abihebeye Imana, be n’ugushima kwifata rworo no gufasha abakene n'abagowe. Uwo musuku w’uwo mugwi w’abo baririmbiramana akaba yaciye atumirira abaririmbiramana ndetse n'abakristu kwisunga uwo mweranda mu rugendo barimwo rwo kuja mw'ijuru.

Inyuma y'igihimbazo, ibirori vy’ukwigina uwo muvunyi vyabandanyirije mu kibanza bari bateguye mu bigo vy’ishure tabariro rya Nkuba, baraheza basangirira hamwe inzimano zari zateguwe, harashikirizwa n'amajambo atandukanye.

Benshi mu bagiye barafata amajambo baragaragaje ubukengurutsi kuri urwo rubanza rw'iteka uwo mugwi wakoze uwo musi, bongera barasabikanya na kahise k’uwo mugwi, be n’ubuzima n'ubutumwa bwaranguwe n'uwo mugwi. haratanzwe kandi n'impanuro z'ukwigenza neza no gukunda umugwi n'ubutumwa ku baririmbiramana b’uwo mugwi.

Fransisko w'i Assize mweranda yari umutaliyano w'umukatorika yabayeho mu myaka ya 1189-1226. N’ubwo mu buto bwiwe vyashitse akagira ingeso zitari zibereye, ariko mu nyuma yarahinduwe n'ijambo ry'Imana, aca arayiyegurira gose. Yararanguye vyinshi vyiza, na cane cane ukwicisha bugufi, ugukorera Imana n’ugufasha aboro mu kubatabaza ivyobunganira mu bukene n'ubworo bwabo.

Umusi mukuru wa Fransisko w'i Assize mweranda, muri Ekleziya usanzwe uhimbazwa kw'igenekerezo rya 4 Gitugutu uko umwaka utashe, ariko mu mugwi w’abaririmbiramana bamutoyeko umuvunyi bo kw’ishure tabariro rya Nkuba muri Paruwase Magara bahisemwo kuwuhimbaza ari ku musi w'Imana, kuberara ko isango nyezina ryahuriranye n’umusi w’ibikorwa hagati mu ndwi, ku musi wa gatanu.

Twobamenyesha ko mu kugerageza kugendera iragi ry'umweranda Fransisko w'i Assize ryo kwunganira aboro, abo baririmbiramana b’umugwi witiriwe umweranda Fransisko w'i Assize wo kw’ishure tabariro rya Nkuba bari bategekanije agafashanyo bashikirije abatishoboye bashika 6 batowe mu mibano igize iryo shure tabariro rya Nkuba, kakaba kari kagizwe n'ibifungurwa. Ni mu ntumbero yo gusangira na bo ivyo Imana yabahaye.

Honoré Ndayiragije, Paruwase Magara

Ivyiyumviro

Rondera

Urutonde rw'Imisa