Urwaruka rumenyesha Inkuru Nziza ni umugwi w'ubutumwa wunganira ibikorwa vya Papa vyo gukwiza hose Inkuru Nziza ya Yezu Kristu, uhurikiyemwo urwaruka rwose rwabatijwe ruri hagati y'imyaka 15 na 30

Mu ntumbero yo gutanguza umugwi w'urwaruka rumenyesha Inkuru Nziza muri muri Paruwase Ana mweranda yo ku Musaga, igisata kijejwe kumenyekanisha ibikorwa vya Papa mu Burundi caragiraniye ikiganiro n’imikangara y’Imana n’urwaruka rwo muri iyo paruwase, ku w’Imana igenekerezo rya 6 Gitugutu 2024, ku civugo c'uyu mwaka kigira kiti: «Rwaruka, shingira intahe ukwemera kandi  kumenyeshe bose».

Ico kiganiro caremeshejwe n’intumwa z’abasaserdoti bajejwe ubwo butumwa muri Diyoseze Nkuru ya Bujumbura. Izo ntumwa zari zirongowe na Patiri Antoine Sabushatse ajejwe kumenyekanisha ibikorwa vya Papa mu bana no mu rwaruka muri iyo Diyoseze, ari na we yararongoye imisa ya kabiri.

Uwo ajejwe kumenyekanisha ibikorwa vya Papa mu bana no mu rwaruka muri iyo Diyoseze Nkuru ya Bujumbura yari kumwe na Patiri Agapit Nindorera ajejwe kumenyekanisha ibikorwa n'ubutumwa vya Papa mu ngo n'imiryango, akaba ari na Patiri mukuru wa paruwase yo mu Kinindo, bashigikiwe na patiri mukuru wa Paruwase Ana Mweranda, Patiri Sept Désiré Remesha, na Patiri Emmanuel Kadende, be na Patiri Juste Nsengiyumva.

Urwaruka rumenyesha Inkuru Nziza ya Yezu Kristu

Inyuma y'iyo misa ni ho ico kiganiro caremeshejwe. Patiri mukuru wa paruwase Ana Mweranda yaciye atumira urwaruka rwose muri rusangi rwo muri iyo paruwase, kuva ku rufise imyaka 15 gushika kuri 30 mu kiganiro cerekeye urwo rwaruka.

Mu batumiwe harimwo ahanini urwaruka rujejwe kumenyesha hose ibikorwa vya Papa, bita mu gifaransa «Jeunesse missionnaire», urwaruka ruhurikiye mu mihari n’imigwi y’ubutumwa, abakorezi, hamwe n'ingo n'imiryango ukwabo.

Inyigisho ku rwaruka zatanzwe na Patiri Antoine Sabushatse, ari kumwe na Mama Christiane Twagirayezu aserukira umuryango w’ababikira bene Tereziya mu karere k’ubutumwa bw’umuryango w’abo babikira, Uburundi buherereyemwo.

Patiri Antoine Sabushatse yarabwiye urwo rwaruka bimwe mu bikorwa abari mu mugwi w'urwaruka rumenyesha Inkuru Nziza bitwararika: ugukabura mu rwaruka umutima wo kumenyesha Inkuru Nziza, ukurangura ibikorwa vy'urukundo n'ikigongwe, ugushengerera Yezu mw'Ukaristiya, ugufasha abakristu bahereye mu mibano mito mito, ukuronderera abagenzi Yezu bamenyesha Inkuru Nziza, n'ibindi vyinshi. Akaba yaciye abasigira udupapuro turiko ibikorwa vyose urwaruka rumenyesha Inkuru Nziza rwokwitwararika.

Hasozereye n'intahe ya mama Christiane Twagirayezu ingene yagiye kumenyesha Inkuru Nziza mu gihugu ca Cameroun, igihugu gihurikiyemwo abisilamu benshi cane. Yamenyesheje ko ubwitonzi n’uguca bugufi ari vyo vyamufashije gushobora kumenyesha Inkuru Nziza ya Yezu Kristu muri ico gihugu, cane cane mu bikorwa no mu kwigisha gusenga urwaruka ruri mu mashure.

Abavyeyi bamenyesha Inkuru Nziza ya Yezu Kristu

Mu kanya urwo rwaruka rwo ku Musaga rwariko ruronka inyigisho, hariko haraba ikindi kiganiro ku bavyeyi, gitangwa na Patiri Agapit Nindorera, ari kumwe na mama Mariya Karara wo mu muryango w'ababikira bene Mariya. Ico kiganiro cari gishimikiye ku gushikiriza Inkuru Nziza ya Yezu Kristu bahimbaza mu kwezi kw'icumi.

Patiri Agapit yamenyesheje abavyeyi ko abubakanye, umwe wese afise ingero yiwe (umugabo canke umugore). Vyongeye, Imana ngo ni yo itorera umugenzi uwundi ngo bubakane. Yagize ati: «Ukwubaka rukristu ni umuhamagaro, ukuba umuvyeyi na ryo ni ibanga n'iteka rihambaye Imana itera abavyeyi.»

Uwo musaserdoti yaramenyesheje kandi imice itatu mu gisata cibikorwa vya Papa mu Burundi vy’ukumenyesha Inkuru Nziza, iyo mice na yo ikaba ari iyi ikurikira: igisata c’urwaruka rumenyesha Inkuru Nziza ya Yezu Kristu (Jeunesse missionnaire mu gifaransa), igisata c’ingo n'imiryango imenyesha Inkuru Nziza, be n’igisata c’abarwaye bamenyesha Inkuru Nziza ya Yezu Kristu.

Yabandanije ameyesha ko igisata c’ingo n'imiryango imenyesha Inkuru Nziza ya Yezu Kristu gitangurira mu bikorwa abavyeyi bajejwe mu buzima bwa misi yose no kwitwararika gusabira ubwo butumwa. Abavyeyi ngo bategerezwa: kuba itara riboneshereza bose, mu kibano; kwitwararika indero y'abana; gusabira abamisiyonari bitanga mu kumenyesha inkuru nziza; guhimbarwa no gukorera Imana; gutanga amashikanwa yo gukenguruka mu vyo Imana yaduhaye.

Abihebeye Imana bamenyesha Inkuru Nziza ya Yezu Kristu

Mama Karara na we, ikiganiro yagitanze ku butumwa bwo kumenyesha Inkuru Nziza mu bihebeye Imana no mu ngo n'imiryango, akaba yarabamenyesheje ico bokora. Yagize ati: «Ukwihebera Imana biva ahanini mu muryango, bigashigikirwa n’ibisabisho abavyeyi baba bagiye barashikiriza Imana.» Ku bwiwe, ico abavyeyi basavye bari mu muryango Imana iraheza ikacumva, kandi ikacishura.

Na we nyene yarashinze intahe ukuntu amaze kwihebera Imana yahavuye aja gukorera ubutumwa mu gihugu ca Tanzaniya, eka mbere no mu bindi bihugu. Gusa ngo ntivyamworoheye na gatoyi kubera imico n'imigenzo be n'ururimi atari amenyereye. Ariko aremeza neza ko igisabisho c'abavyeyi camuherekeje hose. Avuga ko uwugiye mu butumwa mu mahanga yemera kuba umwe n'abo asanzeho, akagenda uramenyera buhoro buhoro. Akaba yarasavye abavyeyi gusabira abana babo no kubahimiriza kumenyesha Inkuru Nziza.

Tubamenyeshe ko urwaruka rumenyesha Inkuru Nziza ari umugwi w'ubutumwa bwo kumenyesha Inkuru Nziza wunganira ibikorwa vya Papa vyo gukwiza hose Inkuru Nziza ya Yezu Kristu, uhurikiyemwo urwaruka rwose rwabatijwe ruri hagati y'imyaka 15 na 30. Abahoze mu mikangara y'Imana barenza imyaka 14 ni bo baza imbere, kuko baba basanzwe bamenyereye ubwo butumwa, hamwe rero n'urundi rwaruka rwose ruvyifuza.

Intumbero y'uwo mugwi na yo ikaba ari ugukabura n’ukumenyesha mu rwaruka umutima wo gukwiza hose Inkuru Nziza ya Yezu Kristu. Kugira ngo Inkuru Nziza imenyeshwe neza, itangurira hagati y'abubakanye, hanyuma mu bana, mu nyuma bakayimenyesha hanze bahereye mu kibano.

Mugisha Pascaline, Paruwase Musaga

Ivyiyumviro

Rondera

Urutonde rw'Imisa

Mwoba mufise ico mubaza?

Tanga