Ico gikorwa catunganijwe n'abarongoye imibano rukristu, bafatanije n'umuryango Katolika w'abanaguwe muri mutima mweranda, bagitunganya mu mibano yegeranirijwe mu migwi 14, kw'ijambo ngenderwako rigira riti: «Nimukundane nk'uko nanje nabakunze» (Yoh.13,34)

Abatumwa bo muri Paruwase Anna Mweranda yo ku Musaga, ku musi wa gatatu igenekerezo rya 23 Gitugutu 2024, baragize igikorwa co gushikiriza inyigisho nkomezakwemera mu mibano rukristu yo muri iyo Paruwase, igikorwa gifatwa nk’ico kumenyesha Inkuru Nziza ya Yezu Kristu.

Ni igikorwa catunganijwe n'abarongoye imibano rukristu, bafatanije n'umuryango Katolika w'abanaguwe muri mutima mweranda muri iyo Paruwase, iyo nyigisho ikaba yatanzwe ku mugoroba; ni ho abo batumwa bakwiragira mu mibano yegeranirijwe mu migwi 14, bagiye kumenyesha iyo Nkuru Nziza.

Iyo nyigisho nkomezakwemera yari ishimikiye kw'ijambo ngenderwako rigira riti: «Nimukundane nk'uko nanje nabakunze» (Yoh.13,34), iryo jambo na na ryo ubwaryo rikaba ryari rishimikiye ku civugo ca Diyoseze c'uyu mwaka, «Dukomeze Ekleziya Muryango mu kugira ubumwe n'urukundo no mu gusangira neza ivyo Imana iduha».

Nk’uko umuntu yashobora kubibona, iyo nyigisho yatanzwe, Yezu yarininahaje muri iyo migwi yose uko ari 14, kuko iyo nyigisho yakiriwe n'igishika cinshi, kandi yaritabwe cane. Abanyamibano barakengurutse cane iyo nyigisho, bakaba mbere barasavye ko inyigisho nk'izo zoja ziratunganywa kenshi, n'ibiburiburi zigatangwa nka rimwe mu mezi atatu.

Ico abigisha bavuga ko babonye ni uko ngo vyibonekeza ko abakristu bo mu mibano rukristu bafise inyota nyinshi yo kumenyeshwa Inkuru Nziza. 

Gusa muri iyo mibano hitaba cane cane abatamakazi benshi; abagabo ni bake cane, abakiri bato bobo ni imparugwa. Bakaba basaba ko hoba uguhimiriza urwaruka n'abagabo, kugira ngo na bo bikebuke, baje mu mibano rukristu.

Caritas Kamelo, Paruwase Anna Mweranda

Ivyiyumviro

Rondera

Urutonde rw'Imisa

Mwoba mufise ico mubaza?

Tanga