Mu guhimbaza uwo musi mukuru, abo bahurikiye muri iyo mivukano bashimye kugendera ku civugo c’umwaka wose kigira kiti: «Tweho ntidushobora kureka kuvuga ico twabonye kandi twumvise» (Ibik.4,20)

Ku wa Gatanu igenekerezo rya 1 Munyonyo 2024, ku musi mukuru w'aberanda bose, abahurikiye mu mivukano y’urwaruka rw’umuco (fraternité jeunesse lumière) bo muri Paruwase Ana Mweranda yo ku Musaga biriwe mu kanyamuneza ko kwinjira icese muri y'imyaka 25 iyo mivukano imaze itanguye.

Karabaye n’akaryo ko kurungika mu butumwa abasuku bashasha bagiye gusukurira iyo mivukano muri uyu mwaka w’ubutumwa w’2024-2025.

Ibirori babitanguriye ku gukengurukira Imana mu nkuka y’imisa yaherejwe ku gihe c'isaha zine n'igice (10h30) irongowe  na patiri Alexandre Gashirahamwe ajejwe imihari n’imigwi y'ubutumwa muri paruwase, ari na we yaciye arungika mu butumwa abo basuku bashasha.

Inyuma y'inkuka y'imisa, urwaruka rwose ruri mu mivukano yo muri iyo Paruwase, ruri kumwe na patiri Alexandre Gashirahamwe, kumwe kandi n’umusuku arongoye ku rwego rwa Paruwase abahurikiye mu muryango w’abanaguwe muri Mutima-Mweranda, hamwe n'abagiye gusukurira iyo mivukano, ndetse n'abahoze bayirongoye, barahuriye hamwe mu nyubakwa ya paruwase, bariginana bongera barakenguruka ivyiza Imana yakoze iciye kuri bo.

Uwugiye kurongora imivukano, Stève, azofashanya na Tite kuyisukurira, mu kiyago twagiriraniye, yaribukije ingene iyo mivukano y’umuco yatanguye. Yavuze ko mu mwaka w'1999 ari ho haba inyigisho z'abanagurwa muri Mutima Mweranda mu kigo «Foyer de charité» c’i Bujumbura urwaruka rwakurikiranye izo nyigisho rumaze kunagurwa muri Mutima Mweranda ntirwashimye kuvyigumizamwo rwaciye ruja mu ma paruwase atandukanye kumenyesha inkuru nziza.

Muri Paruwase Ana Mweranda, umuvukano wa mbere, uwa Kabiri, uwa Gatatu n’uwa kane yatanguye mu mwaka wa 2000. Uwa gatanu watanguye mu mwaka wa 2006. Uwa gatandatu n'uw'indwi yatanguye mu mwaka wa 2016. Uw’umunani yatanguye mu mwaka wa 2022. Iy'icenda yatanguye mu mwaka wa 2023. Yarangije yemera ko jeunesse lumière igiye kumenyesha inkuru nziza murundi rwaruka rutaramenya Imana.

Uwundi yatuyagiye ni umusuku w’iyo mivukano ku rwego rwa Paruwase, aho abari mu rwaruka rw’umuco yabashimiye ku nyifato nziza bafise, yongera abasaba kuguma ku co bahisemwo, kuko ngo bahisemwo neza.

Mu kurangiza Patiri Alexandre Gashirahamwe na we nyene yaragize ico avuga, aho yashimiye cane urwaruka arongera, yongera ashimira n'abavyeyi babaha uruhusha bakaja gukora ubutumwa. Yarangije yemerera urwaruka ko azorugenderera cane mu mivukano, akazohera mu y'icenda, akabandanya n’iya mbere, iy'umunani, iya kabiri, iyi ndwi, iya gatatu, iya gatandatu n’iya kane, akazohereza ku ya gatanu.

Pascaline Mugisha, Paruwase Musaga

Ivyiyumviro

Rondera

Urutonde rw'Imisa

Mwoba mufise ico mubaza?

Tanga