Inyuma y’imyaka 5, ngiyi rero Notre-Dame irasubiriye kwakira indihagizi z’imitima y’abaza ngaha kuhishikanira ku Mukama (Nyenicubahiro Musenyeri Olivier Ribadeau-Dimanche, ayoboye isengero myeyi ya Diyoseze Nkuru y'i Paris mu gihugu c'Ubufaransa, yarongoye inkuka y’imisa yo gusubira kwinjira iyo sengero)

Ekleziya yo mu Bufaransa yaragize akanyamuneza ku mpera y’umusi w’Imana igenekerezo rya 08 Kigarama 2024, aho abakristu bo ku mugwa mukuru w’ico gihugu basubiriye kwinjira bushasha icese mw’isengero mvyeyi ya Diyoseze Nkuru yabo y’i Paris (Cathédrale Notre-Dame de Paris). Ivyo birori bikaba vyashoboje abakristu bashika 2500 kwijira muri iryo hema ry’Imana n’abantu ry’aho i Paris. Ni  inyuma y’imyaka 5 yari iheze risambutse, ritongowe n’umuriro.

Kuva ku mugoroba wo ku wa Gatandatu, akanyamuneza kari kaja katanguye kuboneka ku maso y’abanye-Paris; karasanganira umuntu agiseruka mw’ibarabara rya Arcole rigana kw’isengero Notre-Dame, abantu bijandajandira buke buke, bamwemwamwemwa, umenga n’akavura kariko karagwa ntibakumva.

Uko amasaha y’inkuka y’imisa yegereza ni kwo agacerere kaja karatangura kwibonekeza. Ururirimbo «Gihugu c’Imana, gisagara ca Emmanuel» («Peuple de Dieu, cité de l’Emmanuel» rurasamirana, na rwo urugendo rweranda ruratanguta, rurimwo abasaserdoti, ruyobowe na Nyenicubahiro Musenyeri Olivier Ribadeau-Dimanche, ayoboye isengero myeyi ya Diyoseze, Katedrale. Ni na we yarongoye iyo nkuka y’imisa yo ku w’Imana, ku mugoroba.

Mu batumire harimwo n’Umukuru w’igihugu c’Ubufaransa, n’abandi bakuru b’ibihugu batari bake b’i Buraya, kumwe n’abandi banyavyubahiro, muri make abatumire bashika ku 1.500, baje bazananye mu mihingo itandukanye y’isi.

Uwo Mwepiskopi mukuru, mw’ijambo ryiwe ry’ikaze, ati: «Inyuma y’imyaka 5, ngiyi rero Notre-Dame irasubiriye kwakira indihagizi z’imitima y’abaza ngaha kuhishikanira ku Mukama». Araheza asaba abari aho gukengurukira Imana n’amashemezo. Mu migirwa, harimwo n’uguhezagira Altari nyeranda. Bamwe mu bakristu ukumva bavuga aho bari bati: «Ese ukuntu bibereye kwibonera ubuzima busubiriye kunaguka muri paruwase yacu Notre-Dame.»

Tubibutse ko mu mwaka w’2019 ari ho isengero Katedrale Notre-Dame y’i Paris yafatwa n’umuriro. Hari ku mugoroba ushira ijoro ryo ku wa 15 Ndamukiza, himirije umusi mukuru wa Pasika. Iyo sengero yari imaze imyaka yababa 1000, kuko yari yarubatswe mu mwaka w’1163. Ifise uburebure bw’imetero 110, n’ubwaguke bw’imetero 13, ku maduga y’imetero 10, n’umunara w’imetero 93.

Abahinga mu vy’ukuzimya bashika 400 ni bo bari bafashije, ivyashoboye kugira ibintu birokoye. Nta bantu bapfuye canke ngo hagire abakomereka. Imilliyoni 13 z’abantu buri mwaka ni zo zahora ziza kuraba ivyabaye. Ziri mu baterereye ngo iyo sengero isanurwe.

Vyasomwe na Michel Nibitanga, CEDICOM

Ivyiyumviro

Rondera

Urutonde rw'Imisa

Mwoba mufise ico mubaza?

Tanga