Mwishirwa nu ngiro ry’umugambi «Dukire Tubane» ishirahamwe mpuzamadini mu Burundi (CICB) rifashwe mu mugongo n’ishirahamwe CRS, haratunganijwe uruganda, ku munsi wa gatanu igenekerezo rya 10 Nzero 2025. Urwo ruganda rwari urwo gusuzuma ivyavuye mu cirwa c’umwihwezo w’ikibano ciza hagati y’abarundi, rukaba rwabereye mu nyubakwa y’amanama y’ihoteri «King’s Conference Centre» y’i Bujumbura.

Urwo ruganda rwahuje indongozi z’amadini ahurikiye muri CICB, indongozi z’imigambwe ihurikiye mu rwego mpuzamigambwe be n’abajejwe intwaro. Ni uruganda rwaje mu rukurikirane rw’izindi nganda zitandukanye zagiye ziraba mu ntumbero y’uwo mugambi «Dukire Tubane», haraheze imyaka ine, abahurikiye muri iryo shirahamwe mpuzamadini bagerageza guhimiriza abari mu migwi itandukanye y’ubuzima bw’igihugu ngo bashire imbere, mu butandukane bwabo bwose, ikiyago n’ingingo nk’inzira yo gutsimbataza ikibano ciza n’amahoro vyo mushinge w’iterambere rirama.

Mu kiganiro catanzwe na Nyenicubahiro Musenyeri Joachim Ntahondereye arongoye ishirahamwe CICB akaba n’Umwepiskopi wa Diyoseze Katolika y’i Muyinga, yavuze ko intumbero y’urwo ruganda ari iy’uguterera ngo mu gihugu c’Uburundi haboneke ikibano ciza, haba hagati y’abanyamigambwe itandukanye, hagati yabo n’abashinzwe intwaro, be no hagati yabo n’abenegihugu muri rusangi.

Ku bw’iyo ndongozi y’ishirahamwe CICB, ivyo ngo bisaba ko habaho ikiyago gishingiye ku kwubahana no kwemera ko abantu bose ari magiriranire, maze abantu bakayaga batumbereye kwubahiriza iciza kiri mu wundi, mu bo babana, mu bo bavugana, kandi bagatumbera kugiha agaciro, kugira ngo umwe umwe wese agire intererano atanze ngo igihugu kibeho mu butungane n’amahoro arama mu kwubahiriza uburenganzira bw’umwe wese ku buzima bw’imibano n’igihugu.

Ku vyerekeye umwihwezo ku kibano ciza hagati y’abarundi, mw’ishirahamwe CICB ngo barabona ko hariho ibisata bimwe bimwe vy’ubuzima bw’igihugu usanga harimwo akarusho, nk’uko vyabandanije bishikirizwa n’uwo muyobozi, ku bisata bitatu basuzumye: igisata c’imibano n’imico, ic’ubutunzi be n’ic’intwaro (politike).

Mu gisata kimwe kimwe ngo hari aho akarusho kaboneka, n’ibindi vyerekana ko impinga ikiri ndende, ko hagikenewe ivyo gukorwa ngo hagire akarusho kaboneka. N’aho igisata c’imibano n’imico ari co catanze amanota adateye ubwoba cane, ariko igisata c’ubutunzi n’ica politike vyovyo ngo vyerekana ko abarundi batari bake badashimishwa n’ukuntu ivy’ugushikira uburongozi be n’uburinganire mu vy’ugushikira itunga rusangi vyifashe. Vyongeye, ngo ivyiyumviro vy’abenegihugu ntivyitwararikwa n’abajejwe intwaro. Ahandi na ho ngo haribonekeza agahaze kanini mu bijanye no gutorera umuti amatati.

Mu gihe urwo ruganda rwateguwe himirije amatora y’abashingamateka azoba muri Ruheshi 2025, abitavye urwo ruganda basavye ko hoba uguha agaciro amatora no gukomeza ubumwe bw’abantu bushingiye ku ntwaro rusangi ikora neza, ukwubahiriza uburenganzira n’imigambi y’abanyagihugu, hamwe n’uguteza imbere inyungu rusangi, ukwihanganirana, ukubabarirana n’ugusubiza hamwe, ukurwanya ibiturire, ukwubahiriza uburenganzira bwa kiremwa muntu no kugwiza utwigoro two gukorera hamwe ibikorwa rusangi n’ikiyago mu butandukane bwacu bwose ata buryarya.

Twaregereye umukuru w’ihuriro ry’imigambwe mu Burundi, Umushingamateka Félicien Nduwuburundi. Yarashimangiye ko abarundi babana neza, kandi ko hari ibimenyetso vyerekana ko ubumwe bw’abantu bushoboka. Yagize ati: «Haraheze  imyaka 20 inyuma y’amagume yamaze imyaka 10; tugereranije aho twari n’aho turi uno musi, turabona ko hariho itandukaniro rinini cane.» Yasavye abarundi bose guharanira amahoro n'umutekano no kwubahiriza amategeko, kuko ngo ata kwubahiriza amategeko haba ugusubira inyuma.

Uwundi twayaze mu bari bitavye urwo ruganda ni umwe mu baserukiye umuryango w'abisilamu mu Burundi COMIBU, Sheikh Amini Abdalah, na we nyene yaremeje ko hariho iterambere rikomeye rimaze guterwa mu bijanye n'ikibano kibereye hagati y'abantu mu Burundi. Ariko kandi ntahakana ko hakiriho ibigikenewe gutezwa imbere, ivyo ku bwiwe ngo bikaba bisaba utwigoro twa bose ku neza rusangi. Akaba yarasavye ko inganda nkizo zokomezwa, kugira ngo ubumwe bw’abantu n’ikiyago gihuza abantu bose bitsimbatazwe.

Ku bw’urwo ruganda, vyaribonekeje ko ugukomeza ikibano ciza bisaba uruhara rw’umunyagihugu wese, ukwiyemeza kw’inzego za Leta, abahurikiye mu mashirahamwe adaharanira ivyicaro vya politike hamwe n’amadini, kandi ko ukuroranirwa muri iyo nzira kuzovana n’ikiyago camaho kandi kivuye ku mutima uzira uburyarya, ukwemerana mu butandukane bwacu n’ukuronderera hamwe inyishu ku bw’iteka n’itekane mu gihugu.

Mama Yvonne wa Yezu Miburo, CEDICOM