Mu ntumbero yo kwifatikanya n’igisata c’ukumenyesha amakuru c’i Vatikano mu guhimbaza yubile y’Imyaka 2025 y’Ekleziya Katolika, Diyoseze Nkuru ya Bujumbura, ibicishije ku kigo cayo c’ukumenyesha amakuru CEDICOM, iratumiye abakristu bakora muri ico gisata mu musi mukuru wabo wo guhimbaza iyo yubile ku musi w’Imana igenekerezo rya 26 Nzero 2025, ku civugo: «Umwizero ntutetereza».

Iyo yubile izohimbarizwa kuri Paruwase Katedrale Regina Mundi, kuva kw’isaha zibiri n’igice zo mu gitondo (8h30). Bazotangurira ku nyigisho zizobera muri chapelle Regina Mundi, bace babandanyiriza ku nkuka y’imisa mw’isengero nkuru.

Hatumiwe abo mu gisata c’ukumenyesha amakuru bose, abayobozi b’ibimenyeshamakuru, abigisha n’abanyeshure bo mu bisata vyo kumenyesha amakuru (communication et journalisme), abanditsi, abakinyi b’amareresi n’abahinguzi bayo, hamwe n’abahinga mu vy'ubuhinga ngurukanabumenyi (informaticiens), n'abandi bose begwa n'ico gisata.

Diyoseze Nkuru ya Bujumbura irabahaye ikaze muri beshi, ngo mwironkere inema n’imihezagiro idasanzwe ya yubile yo muri uyu mwaka mweranda 2025 ! Menya neza: Yubile nk’iyi, iba rimwe mu myaka 25 ! Ntiducike rero !