Ivyo birori vyari vyatewe iteka n’icegera c’umukuru w’uwo muryango, Patiri Bernard Gachuru, be n’abafaratiri 14 baje bava mu bihugu bitandukanye ariko barangurira ubutumwa mu maparuwase atandukanye barungitswemwo kugirirayo ivyigwa vy’ukwimenyereza (stages)

Faratiri Richard  Alale wo mu muryango w’abapatiri b’abamisiyonari ba Afrika arangurira ubutumwa muri Paruwase yitiriwe umweranda Augustino yo mu Buyenzi, ku w’Imana igenekerezo rya 2 Ntwarante 2025 ni ho yashikiriza indagano ziwe za mbere zamuhesheje akaryo ko kwinjira icese muri uwo muryango ishengero rikoranye. Uwo mugirwa ukaba wabereye mu nkuka y’imisa yaherejwe muri Paruwase yitiriwe Augustino mweranda yo mu Buyenzi, kw’isaha zine n’igice (10h30).

Iyo nkuka y'imisa yari irongowe na Patiri mukuru w’iyo Paruwase, Patiri Frédéric Rimo, afatikanije na Patiri Jean de Dieu Meda, be na Patiri Gérard Batonerakure yaje ava muri Paruwase Mpanuka iri muri Diyoseze ya Gitega, be na Patiri Bernard Gachuru asanzwe ari icegera c’umukuru w’umuryango w’abapatiri b’abamisiyonari ba Africa.

Ivyo birori kandi vyari vyitabiriwe n’abafaratiri icumi na bane (14) baje bava mu bihugu bitandukanye ariko barangurira ubutumwa mu maparuwase atandukanye barungitswemwo kugirirayo ivyigwa vy’ukwimenyereza (stages).

Inyuma y’inkuka y’imisa, ibirori vyo kumukeza kuri iyo ntambwe yateye vyabandanyirije mu nyubakwa y’abasaseredoti. Mw’ijambo ryashikirijwe n’icegera c’umukuru w’umuryango w’abapatiri b’abamisiyonari ba Afrika, yarahaye ikaze icese uwo mufaratiri mu muryango, yongera aramukeza.

Uwo mushitsi w’iteka yaboneyeho gutanga impanuro ku bafaratiri muri rusangi, impanuro zijanye n’umwimenyerezo (stage) bagiyemwo mu maparuwase atandukanye. Yavuze ko ari nk’ivyigwa vy’ukwimenyereza bagiyemwo, kandi ko bazokwandika ivyegeranyo vy’ivyo bashoye gukurikirana muri uwo mwimenyerezo barimwo.

Uwo mufaratiri yari ahejeje gushikiriza indagano, Faratiri Richard Alale, akaba mw’ijambo ryiwe yarakengurukiye umubano w’abasaseredoti w’abamisiyonari ba Afrika ku kungene bamwakiriye neza, vy’umwihariko icegera c’umukuru w’uwo muryango kw’iteka yamuteye ryo kuza kwakira indagano ziwe, be kandi n’abafaratiri baje kumufata mu mugongo, hamwe n’abandi bose baje kumukeza kuri iyo ntambwe yateye.

Alexis Niyonkuru, Paruwase Buyenzi

Ivyiyumviro

Rondera

Urutonde rw'Imisa

Mwoba mufise ico mubaza?

Tanga