Ikarema, igihe c’intango nshasha kikaba n’inzira iturongora mu nzira igana kuri ya Pasika ya Kristu atsinda urupfu akajabukira mu buzima bushasha, ni igihe gikabura ukwemera kwacu, tukishingira imigambi yodufasha gutera imbere mu bweranda bwacu, tugatako tukayitaba tudahigimanga

Bavukanyi, turi ku wa Gatatu  w’iminyota, kw’igenekerezo rya 5  Ntwarante 2025. Ng’ico ca gihe ceranda c’Ikarema kirashitse, ca gihe cugururwa  n’umusi wa Gatatu w’iminyota, kigasozerwa n’umusi mukuru wa Pasika, ku musi w’Imana usozera indwi nyeranda dukunze kwita «Umunsi w’Imana w’ibisandasanda canke w’amashami».

Ikarema ni ikiringo kimara imisi mirongo ine, kikadutegurira kwakira ingabirano y’urukiza Mana Data yaduteguriye mu mabanga y’ukubabara mu rupfu n’izuka vy’Umwana wiwe Yezu Kristu.

Ico kiringo c’Ikarema kiri mu misi mikuru ntasubirizwa Ekleziya Katolika yitwararika guhimbaza. Ni umwanya mwiza rero ufasha umuntu kwitegurira neza Pasika yo mutima w’ukwemera ku mukristu yama acambirwa guhimbaza intsinzi y’izuka rya Yezu-Kristu.

Ikarema ni igihe gikabura ukwemera kwacu, tukishingira imigambi yodufasha gutera imbere mu bweranda bwacu, tugatako tukayitaba tudahigimanga. Ni igihe c’intango nshasha, kikaba n’inzira iturongora gushika aho tugenda tugana ya Pasika ya Kristu atsinda urupfu akajabukira mu buzima bushasha.

Ico gihe cama kiduhamagarira gishimitse guhinduka tukava mu kabi, tukagana ineza muri vyose. Uwa Kristu rero ahamagariwe kugaruka ku Mana, kugira ngo ntagume anezerezwa gusa n’ubuzima ata gaciro bufise, ariko ashishikare gutera imbere mu rukundo afitaniye n’Umukama.

Ikarema ni igihe nyaco kandi kiroranye c’ukunagura ubuzima bw’umutima, ivyo tukabikesha ivyiza vyeranda bivyarwa na Ekleziya. Mu ntango ya vyose hariho Ijambo ry’Imana dutumiriwe kwumviriza no kuzirikana tubishizemwo umwete mwinshi ujanye n’ico gihe.

Eka koko ni umwanya mwiza, ca gihe kibereye, kiroranye rwose co kugaruka ku Mana. Umukama atubwira ati: «Nimungarukeko n’umutima wanyu wose mu kwisonzesha, mu marira no mu maganya [...], nimugaruke ku Mukama Imana yanyu, kuko ikundana, ifise imbabazi, izira gushavura, ikanka akabi.» (Yoweli 2, 12-13).

Paulo Mweranda na we ati: «Nico gituma tubasavye kw’izina rya Kristu: Emera babuzurize n’Imana! (2Cor.21). «Ng’iki rero ca gihe kiroranye rwose, ng’uyu wa musi w’ubukiriro! (2Cor.6, 2).

Ni kandi igihe co kuzirikana Ijambo ryayo turi kumwe n’abavukanyi bacu bose ngo dukundane, turemeshanye, dukeburane, duheze tubandanye urugendo rutujana kwa Dawe wa twese (Mt.6,9).

Ntidutangwe rero kwitaba ikarema nyeranda n’imigirwa yose iyiherekeza, na cane cane inyigisho z’amapfungo, tutibagiye guhurumbira isakaramentu ry’ikigongwe n’iry’Ukaristiya, mbere n’ayandi, tutibagiye no gusangira neza ivyo vyose Imana yaduhaye, tukabisabikanya na cane cane n’abari mu bukene butandukanye. Ni na ho izoheza na Yo ikaduhezagiza ivyiza vyayo bisumbirije, maze tuzoshikire ya Pasika dufise inema yeza.

Marie Rose Ngendakumana, CEDICOM

Ivyiyumviro

Rondera

Urutonde rw'Imisa

Mwoba mufise ico mubaza?

Tanga