Bavukanyi, muri kwa guhimbaza yubile y’imyaka 2025 Ekleziya imaze, isango ryo muri iyi misi, kuva kuri uyu wa Gatandatu igenekerezo rya 28 gushika kuri uyu w’Imana igenekerezo rya 30 Ntwarante 2025, ni  yubile y’abamisiyonari b’ikigongwe c'Imana (Missionnaires de la misericorde divine).

Ni akaryo ko gukabura muri twebwe umutima w’ubumisiyonari n’ukwiyegereza abagowe bakeneye gufashwa gusumba abandi. Kukaba nka ko, ubutumwa bw’Ekleziya bukomoka ku kigongwe n’impuhwe vy’Imana, duhamagarirwa guserura muri bene wacu mu nyifato no mu migenderanire nk’abakristu bamurikirwa na Mutima w’Imana.

Ijambo «ikigongwe» rifise amamuko mu kureka imitima yacu igakorwako n’ububabare n’ubukene bw’abandi. Ikigongwe c’Imana ciserura mu buryo bubiri: ubwa mbere irihweza ububabare bwa muntu, ubwa kabiri igatabara. Imana, nk’umuvyeyi, irababazwa n’umubabaro n’ubukene bw’abantu yare-mye.

Ariko ntigarukira ku kubakundwakaza gusa, ahubwo iranakora; irasohoka ikava mu gacerere ikaja gusanganira umuntu, kugira ngo imuhe umwidegemvyo w’urukiza rwayo. Ivyo turabibonera mu gikorwa ca Yezu c’ukuducungura. Ikigongwe n’impuhwe vyiwe vyaramutumye aza kugarura abantu bari baracumuye, gushikiriza inkuru nziza aboro, kurokora abababaye no gukwiza mu baboshwe ubukiriro.

Yezu, mu kwerekana ko ko Umutima wiwe ukorwako n’ububabare bwa muntu, yararijijwe n’urupfu rw’umukunzi wiwe Lazaro. Yezu ntagarukira kandi ku kubabara gusa, aranakora: arakiza abarwaye, aragaburira abashonje, arazura abapfuye, aragirira ikigongwe abacumuzi, kandi akamenyesha umwaka mwiza w’imihezagiro no kubohoka kw’ababoshwe.

Ico kigongwe c’Imana rero ni co giheza kigatanga intumbero y’ubutumwa bw’Ekleziya mu mice yayo yose, ibwirizwa kwegera abababaye ngo ibashikirize Inkuru Nziza y’urukundo rw’Imana. Aho nyene ni na ho hakomoka intimatima y’ubumisiyonari bw’Ekleziya bushingiye ku kwiyugururira uwundi mu kwumva ko ukozweko n’umubabaro wiwe, waba uwo ku mutima canke ku mubiri.

Ekleziya iraheza igakwira imirambi, gushika ku mpera y’isi; irarengana imbibe, ikarengera intambamyi z’uburyo bwose, zaba iz’ikirere canke iz’imico, kugira ngo ishikirize ukubohoka, amahoro n’akanyamuneza ata handi bironkerwa atari mu Nkuru Nziza ya Kristu dushikirizwa n’abatumwa n’abasubirizi babo.

Erega iyaba Ekleziya itari ifise ikigongwe, n’ubundi ntiyoshoboye kurangura neza ubwo butumwa bw’ubumisiyonari. Ekleziya rero ni inyakigongwe mu butumwa bwayo; biri mu karanga kayo. Nta woshobora rero gutandukanya ubutumwa n’ikigongwe vy’Ekleziya. Ubutumwa bwayo ni ubw’ukuba intumwa n’igikoresho c’ikigongwe c’Imana mu bantu.