Abo Bungere ba Ekleziya y'i Burundi basaba abarundi ko bokwitaba ico gikorwa c'iteka c'amatora bafatanye mu nda, kandi bakagikora barondera ineza y'igihugu; vy’umwihariko, indongozi kuva hejuru gushika ku mitumba, bazisaba guhagararira ubutungane, amahoro n'umutekano kuri bose; abarongoye imigambwe, kuva hejuru gushika ku mitumba, bakabibutsa guhimiriza abanywanyi bayo kugira ingendo yo kwubahana no kudatyozanya

Mu gihe mu gihugu c’Uburundi himirije amatora, abepiskopi bahurikiye mu Nama y’Abepiskopi Katolika b’i Burundi baraye basohoye itangazo ryasomewe abakristu mu misa yo kw'idominika ya 6 yo mu gihe ca Pasika, kuri uyu w’Imana igenekerezo rya 25 Rusama 2025, ubutumwa buri muri iryo tangazo bukaba ari ubw’ukugira ngo abarundi bubake igihugu c'amahoro, kuko ari yo aruta vyose.

Abo Bepiskopi bashikirije iryo tangazo mu gihe amatora abarundi bimirije ahuriranye n'umwaka wa Yubile y'imyaka 2025 y'Ekleziya yose, na Yubile y'imyaka 100 iheze Ekleziya y’i Burundi igabanye abasaseredoti ba mbere b'imvukira. Ku bwabo rero ngo ni umwaka w'imigisha n'imihezagiro, umwaka Ekleziya itumira abantu kuba «Abasangirarugendo ku bw’ukwizigira».

Muri iryo tangazo abo Bepiskopi bashikirije, bamenyesha ko n’aho muri Afrika, eka mbere n'aha iwacu mu Burundi, amatora kenshi na kenshi akunda gutera ubwoba, bobo nk’Abungere b’Ekleziya y’i Burundi, baje gutera akamo abarundi, gashimikiye ku kwemera kwabo, ngo bakomeze rero ukwizigira bakura kuri Yezu Kristu, ntihagire ikiduhungabanya.

Bimwe mu vyoranga abarundi rero kugira ngo bazigame uwo mwizero muri ibi bihe vy'amatora ni uko bokwitaba ico gikorwa c'iteka bafatanye mu nda, kandi bakagikora barondera ineza y'igihugu.

Vy’umwihariko abo Bungere b’Ekleziya basavye indongozi, kuva hejuru gushika ku mitumba, guhagararira ubutungane, amahoro n'umutekano kuri bose hisunzwe amategeko. Abarongoye imigambwe, kuva hejuru gushika ku mitumba, barabibutsa guhimiriza abanywanyi bayo kugira ingendo yo kwubahana no kudatyozanya.

Abarundi muri rusangi babasavye ko, mu budasa bwabo, bogira ishaka ry'ukwama barondera kugorora ivyo vyose vyobera intambamyi ingendo y'amahoro n'iterambere, maze bagatora bisunze imigambi izoteza imbere Abenegihugu, bagashira imbere ico cose cotuma haba amatora yo ku mugaragaro, mu mwidegemvyo, mu mahoro n'umutekano, ata gukumirana. Izo mpanuro bazigendeye ngo zizofasha kugira amatora meza, akomeza intwaro rusangi, amahoro n'iterambere birama.

Abo Bungere b’Ekleziya y’i Burundi basozereye iryo tangazo basaba ko muri iyi ntambwe ihambaye y'igihugu c’Uburundi, abarundi bohurikira hamwe kandi mu guşaba Umukama ngo shetani, sekibi, ntibibe mu barundi imbuto mbi y'ivyiyumviro n'inyifato vyohava bibatesha iyo ntumbero y'amahoro.

Mu gusoma ido n’ido ry’iri tangazo, fyonda ngaha: Ijambo ry'Inama y'Abepiskopi Katolika b'i Burundi mu gihe himirije amatora

Ivyiyumviro

Rondera

Urutonde rw'Imisa

Mwoba mufise ico mubaza?

Tanga