Umumenyeshamana Viator Butoyi amenyesha ko vyerekana ko ari akunguko ku muryango w'Ekleziya, na rirya abo bakomezwa baba ari abantu bakuze, bashobora kugira ico bayunganiye, haba mu buzima bwa Paruwase canke ubwa Ekleziya muri rusangi

Abakristu 876 bo muri Paruwase yitiriwe umweranda Petero umutumwa yo ku Muberure ni bo baronse isakramentu ry’ugukomezwa muri Mutima-Mweranda, ku wa Gatandatu igenekerezo rya 14 Ruheshi 2025, igitigiri abafashije abo baronse iryo sakramentu kwitegura bamenyesha ko ari ubwa mbere gishitsweko.

Iryo sakramentu ryatanzwe mu nkuka y'imisa yaherejwe n’icariho c'Umwepiskopi Mukuru wa Diyoseze Nkuru ya Bujumbura mu ntara y’ubutumwa ya Buhonga, Patiri Maurice Simon-Pierre Ciza, afadikanije n'abasaserdoti basanzwe barangurira ubutumwa muri iyo Paruwase.

Patiri Maurice, mu nsiguro yiwe, yabwiye abo bagira bakomezwe muri Mutima-Mweranda ko ari wa Mutima-Mweranda nyene baronka igihe babatizwa aje kubakomeza ngo baronke ubukomezi bwo kurangura ubutumwa bw’Ekleziya, kuko ngo baba bakeneye kuronka ubwuzure bw'ingabirano ziwe mu gihe co gukomezwa muri uwo Mutima nyene.

Yagize ati: «Mutima-Mweranda ni we mushaha w'ubutumwa; ni we atumara amazinda kugira ngo ntitube tugitinya gushingira intahe ukwemera kwacu; ni we adutyorora, akadukuza, akaduha mbere gutanga ivyamwa vyiza ku bw’ingabirano zitandundukanye aha umwe umwe, kugira ngo zize kugirira akamaro umuryango wose.»

Iyo ntumwa y’Umwepiskopi, imbere yo gushikiriza ubutumwa nyamukuru bwari bwamuzindukanye bwo gutanga iryo sakramentu kuri abo banyeparuwase ya Muberure, akaba yabatumiriye kuba abatumwa koko ba Yezu, bashingira intahe Yezu ata bwoba, ngo kanatsinda uwabatijwe wese araheza akaba umutumwa.

Tubibutse ko Paruwase Muberure ikiri nshasha, kuko mu mwaka w’2021 ari ho yashizwe ku rugero rwa Paruwase, kw’igenekerezo rya 03 Gitugutu 2024 hakaba ari ho izoba ikwije imyaka ine gusa ivutse.

Kuba rero imaze gushika ku gitigiri kingana ukuri aho c'abakomezwa muri Mutima-Mweranda, ngo vyerekana ko Paruwase iriko irashinga imizi, nk’uko bimenyeshwa n’umumenyeshamana Viator Butoyi.

Eka mbere ngo ni n’akunguko kuri iyo Paruwase, kuko abo bakomezwa ngo baba ari abantu bakuze, bashobora kugira ico bunganiye umuryango w’Ekleziya, haba mu buzima bwa Paruwase canke ubwa Ekleziya muri rusangi.

Alice Nirambe, Paruwase Muberure

Ivyiyumviro

Rondera

Urutonde rw'Imisa