Ni mu gihe muri iyo paruwase bari bafise ubukene cane bw’abasangijza Umubiri wa Kristu, bivanye n’uko hari amashure tabariro mashasha be n’abageze mu za bukuru batari bakibasha gushika kure aho ukwakira iryo sakramentu bikunda

Abakristu bangana 13 bo muri Paruwase Matara barahawe ubutumwa bw’ugusangiza Umubiri wa Kristu, ubwo butumwa bukaba bwatanzwe mu nkuka y’imisa yaherejwe ku wa kabiri igenekerezo rya 24 Ruheshi 2025, irongowe n’icariho c’Umwepiskopi Mukuru wa Diyoseze Nkuru ya Bujumbura mu ntara y’ubutumwa ya Buhonga, Patiri Maurice Simon Pierre Ciza.

Mu gushikiriza ubwo butumwa, iyo ntumwa y’Umwepiskopi Mukuru yahereje iyo nkuka y’imisa ari kumwe na Patiri Mukuru wa Paruwase Matara, Patiri Léon Nizigama, be na Patiri Alexis Bateranya.

Iyo ntumwa y’Umwepiskopi Mukuru yasavye abahawe ubwo butumwa kwakirana urukundo iryo banga, kuko iryo Sakramento ngo ari ryo ryekana ubunywanyi abantu bafitaniye n'Imana.

Uwusanzwe arongoye abamenyeshamana muri Paruwase Matara, Jonas Nsengiyumva, yamenyesheje ko ahimbawe cane ku bw’abo bashikirijwe ubwo butumwa, kuko ngo muri Paruwase bari bafise ubukene cane bw’abasangiji, bivanye n’uko hari amashure tabariro mashasha be n’abageze mu za bukuru bakeneye kwakira Umubiri wa Kristu ariko batakibasha gushika kure, ari na ho havuye ico ciyumviro cari carashikirijwe Patiri Mukuru, na we akagishikiriza Umwepiskopi Mukuru.

Patiri Maurice Simon Pierre Ciza yasavye abahawe ubwo butumwa ko bobwitwararika cane. Eka na bo nyene baramenyesheje ko babwishimiye, kandi ko bazobukora ata gahigihigi.

Abo basangiji bashasha, nk’abamenyeshamana kandi mu rundi ruhande, bagiriyeko basabira abari inyuma, kugira ngo na bo biyumvemwo ubwo butumwa, baheze bitabe akamo k’Umukama abatumirira gukora mu muzabibu wiwe.

Reverien Niyongabo, Paruwase Matara

Ivyiyumviro

Rondera

Urutonde rw'Imisa

Mwoba mufise ico mubaza?

Tanga