Abaririmbiramana bo mu mugwi witiriwe Yohani Mariya Vianney, umusaserdoti mweranda w’i Ars «Saint curé d’Ars» wo muri Paruwase Yohani Baptista Mweranda yo mu Gihosha, ku w'Imana igenekerezo rya 24 myandagaro 2025 baragendeye bene wabo bo mugwi Umwamikazi w'ijuru n'isi («Reine de l'univers») bo muri Paruwase yitiriwe umweranda Fransisko w'i Asize yo mu Magarama iri muri Diyoseze Kkuru ya Gitega, bakaba bagiye baherekejwe na Patiri Georges Niyonkuru.

Urwo rugendo rwatanguye ku gihe c’isaha imwe y’igitondo. Bagishika mu Magarama bakiranywe akanyamuneza n’indirimbo, bongera barasangira n’inkuka y’imisa, aho iyo migwi ibiri yaciye ifatikanya ubutumwa bw’uwo musi bwo kuririmba muri iyo nkuka y'imisa yatanguye ku gihe c'isaha zitanu zo ku musase (11h00).

Patiri Georges Niyonkuru, mw’ijambo yavuze, akaba yarasavye ko bokomeza ubutumwa. Ni mu gihe ngo hari abantu usanga ubutumwa baba bahora bafise mu migwi canke mu mihari itandukanye bishika bakabuhebera mu mpisho, womenga babugumyemwo.

Inyuma y’inkuka y’imisa, abo baririmbiramana baciye basangirira hamwe inzimano n’ikiyago, ari na ho hasiguriwe icatumye abo mu Gihosha bagendera abo mu Magarama: ngo ubucuti bw’iyo migwi bushingiye ku wabo bahora basangiye ubutumwa, ubu asigaye arangurira ubutumwa aho mu Magarama, nk’uko vyamenyeshejwe n’uwurongoye uwo mugwi, Richard Sibonkomezi.

Mu gusigura iyo mvo nyamukuru y’urwo rugendo yavuze ko ubumwe n’urukundo vyabashikanye mu Magarama vyahereye ku kumenyana biciye ku wahoze aririmbira muri uwo mugwi, ubu asigaye arangurira ubutumwa mu wo bari bagendeye, nk’uko ngo n’icivugo ca Diyoseze Nkuru yabo ya Bujumbura kibivuga ngo «Dukomeze Ekleziya Muryango mu kugira ubumwe n’urukundo no mu gusangira neza ivyo Imana iduha». Ati: «Natwe rero twipfuje kubisangirira hamwe namwe ivyo Imana yaduhaye, kandi turipfuza ko ubu bumwe bwosagarara.» Akaba yaranamenyesheje kandi ko uwo musi bari bawurindiranye igishika.

Uwurongoye umugwi «Reine de l’Univers» wagendewe, Edouard Havyarimana, yarashikirije akanyamuneza ko bahimbawe cane no kubakira. Ngo birahimbaye cane kubona mu gihe bariko bigina umuvunyi w’umugwi wabo bihurirana no kugenderwa n’abo bashitsi. Yamenyesheje kandi ko Bikira Mariya bigana nk’umuvunyi wabo yari umukunzi cane wa Yohani Maria Vianney, umuvunyi w’umugwi wabagendeye. Ati: «Mbere aha twofata ko ari umwana yagendeye nyina.» Ni mu gihe abavunyi b’iyo migwi ibiri bose bahimbazwa muri kuno kwezi kwa Myandagaro.

Patiri mukuru wa paruwase yo mu Magarama na we, Patiri Herménégilde Birushe, afashe ijambo, yamenyesheje ko yahimbawe cane no kubona iyo migwi y’abaririmbiramana yunga ubucuti bwabashikanye ku kugenderanira.

Ikiyago casozerewe ku muhezagiro w'Imana watanzwe n'uwo Patiri mukuru wa paruwase Magarama nyene, gutyo urwo rugendo barurangiza muri ako kanyamuneza. Kw’isaha icumi n’imwe n’igice z’umugoroba (17h30), hakaba ari ho abashitsi baheza bagasubira iwabo i Bujumbura.

Sylvestre Ndayimirije, Paruwase Gihosha