«Indagano abihebeye Imana bagira bazigira kubera ko bemera ko Imana ari yo yabaremye, kandi ko ari yo ibaha ubutumwa; izo ndagano bazigira kuko bemera Imana kandi bakemera guca muri za nzira zaga, kuko ukwihebera Imana ari uguca muri za nzira zaga» (Musenyeri Gerevazi Banshimiyubusa)

Mama Mariya Germaine Niyoyitungira wo mu muryango w’abihebeye Imana «Abigeme b’umugabekazi w’ikigongwe» yaragize indagano ziwe za mbere muri uwo muryango mu Nkuka y’imisa yaherejwe ku musi w’Imana igenekerezo rya 10 Myandagaro 2025, irongowe n’Umwepiskopi mukuru wa Diyoseze Nkuru ya Bujumbura, Nyenicubahiro Musenyeri Gerevazi Banshimiyubusa, ari kumwe n’Umwepiskopi mukuru w’inararibonye w’iyo Diyoseze nyene, Nyenicubahiro Musenyeri Evariste Ngoyagoye.

Nyenicubahiro Musenyeri Gerevazi Banshimiyubusa yaribukije igihugu c’Imana cari canje gushigikira uwo yagize indagano ko indagano abihebeye Imana bagira bazigira kubera bemera ko Imana ari yo yabaremye, kandi ko ari yo ibaha ubutumwa.

Yarongeye ati: «Indagano abiheye Imana bagira bazigira kugira ngo babangukire ibanga, babangukire n’ubutumwa mu rukundo rutagabaije, batabangikanije, bakemera ko itunga ryabo rikuru kandi ntasubirizwa ari Kristu, we bama barangura ishaka ryiwe nk’umugenzi mpfampfe.»

Yaboneyeho gushima no gukeza abiheye Imana ku butumwa barangura, mbere aca abasaba no gusabira igihugu c’Imana mu bisabisho vyabo bama bahereza Imana.

Mama Mariya Germaine Niyoyitungira araheza agira indagano ziwe za mbere imbere y’Umwepiskopi, ashigikiwe na Mama Mariya Angela Nivyiza, icariho c’uwurongoye umuryango w’abigeme b’umuvyeyi w’ikigongwe mu gihugu c’Urwanda n’Uburundi, akaba yiyemeje kugendera ubwerentegerwa, ubworo n’ubugamburutsi.

Mu gice ca kabiri c’urwo rubanza, ahabereye agatutu, haravugiwe amajambo y’ubukengurutsi atari make yashikirijwe n’abaserukiye umuryango w’amaraso wa Mama Mariya Germaine Niyoyitungira, abaserukiye Patiri mukuru wa Paruwase Kanyosha, abaserukiye umuryango w’abigeme b’umuvyeyi w’ikigongwe, hamwe na Nyenicubahiro Musenyeri Evariste Ngoyagoye.     

Mw’ijambo rya Mama Mariya Germaine Niyoyitungira, yarakengurukiye abantu bose bagize ico bakora ngo ashike aho ageze. Yahereye ku bavyeyi bamwibarutse, bakamureresha urukundo n’igisabisho. Yarakengurukiye kandi n’abarezi bamwigishije kuva agitangura ishure, abasaseredoti n’abihebeye Imana bamushigikiye mu muhamagaro wo kwihebera Imana, yongera araterereza igisabisho abari aho ngo azobere ibanga  n’intadohoka ku ndagano yashikirije Imana imbere y’umuryango w’Ekleziya.

Tubamenyeshe ko Mama Mariya Germaine Niyoyitungira asanzwe ari imvukira ya Paruwase Bubanza iri muri Diyoseze Bubanza nyene. Ivyigwa bijanye no kwitegurira ubwo buzima bw’ukwihebera Imana yabironkeye mu gihugu ca Republika iharanira intwaro rusangi ya Congo, ahari ikigo c’inyigisho c’umuryango w’abigeme b’umugabekazi w’ikigongwe. Ubutumwa akazoburangurira aho muri Paruwase Kanyosha, mu muryango wabo.

Gonzalve  Ntashimikiro, Paruwase Kanyosha

Ivyiyumviro

Rondera

Urutonde rw'Imisa

Mwoba mufise ico mubaza?

Tanga