Ibikorwa vy’uwo musi vyari ivy'ugutora umunyamabanga n’icegera ciwe, hakaba haratowe Jean Claude Murengerantwari nk’umunyamabanga, hamwe na Donatien Nsabiyumva nk’icegera c’umunyamabanga (uwurongoye iyo nama wewe asanzwe ari patiri mukuru, icegera ciwe nw we akaba patiri ajejwe imihari n'imigwi y'ubutumwa)

Inyuma y’uko inama ntunganyabutumwa ya Paruwase Mukiza Mweranda yo mu Nyakabiga yahahora yaraye irangirije ikiringo cayo, nk’uko amategeko abitegekanya, umugwi mushasha w’abagiye kuja muri iyo nama ntunganyabutumwa ukaba uherutse gushirwaho, ku mugoroba wo ku wa Gatatu itariki ya 3 Nyakanga 2025 bakaba ari ho uwo mugwi wakoranye mu nyubakwa y’imisi mikuru ya paruwase ngo bakore ibikorwa vyabo vya mbere.

Ibikorwa vyo kuri uwo musi rero, nk’uko vyamenyeshejwe na Patiri Mukuru wa Paruwase, Patiri Eddy Kwizera, vyari bijanye no gushiraho abagize ibiro vy’inama Ntunganyabutumwa ya paruwase, hisunzwe amategeko.

Mu vyakozwe habayeho ukumenyesha imigwi mikuru mikuru (commissions) igize inama Ntunganyabutumwa, abayobozi bayo ndetse n’abayigize, hamwe rero no kumenyana hagati y’abagize iyo migwi mikuru mikuru.

Hagati aho, patiri mukuru yabanje guha ikaze abitavye ibikorwa vy’uwo musi, yongera aranabakeza ku bwizigirwa bagiriwe. Yagiriyeko amenyesha abari aho ico abagize iyo nama bari: yavuze ko hari bamwe batowe ngo baserukire abandi mu mibano rukristu ku rwego rw’amakaritiye agize paruwase yose, abandi na bo ngo bakaba abaje muri iyo nama kubera ubutumwa budasanzwe bajejwe muri paruwase.

Muri abo baje muri iyo nama kubera ubutumwa budasanzwe bajejwe muri paruwase, aho twovuga nk’umukuru w’urwego mpuzamihari n’imigwi y’ubutumwa muri Paruwase, abihebeye Imana, abayoboye umugwi w’abanaguwe muri Mutima Mweranda, hamwe rero n’abo patiri mukuru we nyene ubwiwe agena kubera yababonyemwo ingabirano zidasanzwe z’ubutwari, ubuhinga, ubukerebutsi, ubumenyi n’umwete   mu bikorwa vya paruwase. Abari ngaho rero baciye bafata akanya baridondorana kugira bamenyane.

Imbere y’uko ibikorwa vyo gushiraho abagize urwego nyobozi rw’inama Ntunganyabutumwa ya Paruwase bitangura, patiri mukuru yarongeye aramenyesha abari aho uko iyo nama itunganijwe, ko igizwe n’imigwi itatu.

Umugwi wa mbere ni abagize urwego nyobozi, abakuru b’imigwi mikuru mikuru igize iyo nama n’abo bazokorana, hamwe n’abagize iyo migwi rero bazokorana ibikorwa vyabo bwite. Umugwi (commission) ugizwe n’abawurongoye, abawurimwo basanzwe bari mu nama Ntunganyabutumwa hamwe n’abandi basanzwe batarimwo mu nama Ntunganyabutumwa.

Urwego nyobozi rw’inama ntunganyabutumwa ya paruwase rukaba na rwo ubwarwo rugizwe n’abantu batanu, ari bo: patiri mukuru, patiri umunyabigega wa paruwase ari na we azoba anajejwe n’imihari n’imigwi, umunyamabanga, icegera c’umunyamabanga hamwe n’umuhanuzi.

Ibikorwa vy’uwo musi rero bikaba vyari bigamije gutora umunyamabanga n’icegera ciwe. Umuhanuzi na we akaba ari uwuserukira imibano rukristu yose ya paruwase akaba yari yaratowe.

Ibikorwa nyezina vyo gutora umunyamabanga n’icegera ciwe vyaciye bitangura. Nk’uko amategeko ya Ekleziya abitegekanya, abatorwa bategerezwa kuba ari abakristu balayike kandi ata rwego na rumwe basanzwe baserukira muri iyo nama. Amatora amaze kuba, hatowe abashingantahe babiri: Umushingantahe Jean Claude Murengerantwari nk’umunyamabanga, hamwe n’umushingantahe Donatien Nsabiyumva nk’icegera c’umunyamabanga.

Abatowe barakengurukiye ababizeye bakabatora, bongera biyemeza kugamburuka ishaka ry’Umukama yabatoye aciye kuri bagenzi babo. Kandi ngo barizeyeko bose hamwe Mutima w’Imana azobayobora bikagenda neza. Bongera basaba bagenzi babo gukora bitanga ata mpembo barindiriye, ahubwo ko impera yabo bazoyironka mw’ijuru. Ngo ni ugukora n’umwete mwinshi kugira ubutumwa bukomere muri Ekleziya isasagaye mu Nyakabiga.

Inyuma y’aho, patiri mukuru yaciye amenyesha imigwi mikuru mikuru igize inama ntunganyabutumwa ya paruwase yose hamwe uko ari umunani, amenyesha amazina y’abayigize mbere agirako agena n’abajejwe kurongora abandi muri iyo migwi nyene. Ico gikorwa kirangiye, abagize imigwi itandukanye baciye baja hamwe kugira bamenyane bongere bavugane bimwe bimwe mu bigize ubutumwa bwabo.

Tubamenyeshe ko abagize umugwi nyobozi w’inama ntunganyabutumwa ya paruwase Mukiza Mweranda mu Nyakabiga ari batanu, na bo bakaba ari  aba bakurikira: patiri mukuru wa Paruwae, Patiri Eddy Kwizera akaba ari we arongoye iyo nama, Patiri Liévin Ndayishimiye ajejwe imihari n’imigwi akaba n’Umunyabigega wa paruwase n'icegera c’uwurongoye inama ntunganyabutumwa ya paruwase; Umushingantahe Jean Claude Murengerantwari, Umunyamabanga; Umushingantahe Donatien Nsabiyumva,  icegera c’umunyamabanga; Umukenyezi Lyse Bénigne Akimana, Umuhanuzi akaba ari na we ayoboye imibano rukristu yose muri Paruwase Mukiza Mweranda ya Nyakabiga.

Arthémon Nimbona, Paruwase Nyakabiga

Ivyiyumviro

Rondera

Urutonde rw'Imisa

Mwoba mufise ico mubaza?

Tanga