Musenyeri Gerevazi Banshimiyubusa, afatiye kw’ijambo ngenderwako ry’uwo musi mukuru ryavuga riti: «Utaranavuka narakwitoreye, ndakugena ngo ube umuhanuzi w’amakungu», yaribukije abo babikira ko Imana iri kumwe na bo mu butumwa bwose bazoshingwa, aca abasaba kugenda baciye bugufi kandi bagororotse ku bw’ububasha bw’Imana

Umuryango w’ababikira b’aba Annonciades b’i Heverlee wari mu kanyamuneza, ku musi wa gatandatu igenekerezo rya 6 Nyakanga 2025, muri Paruwase Jenda, ko kwakira ababikira 9 bashasha bagize indagano za mbere, be n’umubikira umwe yagize indagano za burundu, n’ababikira 3 bagize yubile y’imyaka 25 bamaze muri iryo banga ry’ukwihebera Imana.

Inkuka y’imisa yabereyemwo ivyo birori yari irongowe na Nyenicubahiro Musenyeri Gerevazi Banshimiyubusa, Umwepiskopi mukuru w’i Bujumbura, ari kumwe na Nyenicubahiro Musenyeri Evariste Ngoyagoye, Umwepiskopi mukuru w’inararibonye wa Diyoseze, na Nyenicubahiro Musenyeri Jean Ntagwarara, Umwepiskopi w’inararibonye wa Diyoseze ya Bubanza, n’abasaserdoti. Muri uwo musi mukuru harimwo kandi n’abihebeyimana bo mu miryango itandukanye n’abakristu balayike baje kubashigikira.

Musenyeri Gerevazi Banshimiyubusa, afatiye kw’ijambo ngenderwako ry’uwo musi mukuru ryavuga riti: «Utaranavuka narakwitoreye, ndakugena  ngo ube umuhanuzi w’amakungu», yabwiye abo babikira ko uwo musi woba uw’ubukengurutsi, kuko Imana yabakunze kuva batarasamwa.

Uwo Mwepiskopi mukuru yaribukije kandi ko ivyo uwatowe arangura atabirangura ku bw’ubuhinga canke ku bw’ububasha bwiwe, ahubwo ko ubukomezi bwiwe abukura ku Mukama. Aca asaba abo bagira bashikirize indagano zabo kuja barihereza ijambo ry’Imana kenshi, bakarizirikana, bakongera bakarishikiriza abo banshinzwe n’aho bagendera hose. Yabasavye kandi kwitwararika ko bobasomamwo Ijambo ry’Imana.

Uwo Mwepiskopi mukuru yaranababwiye kandi ko bokwitwararika kenshi kurandura no gusitura akabi muri bo; gusenyura impome zose z’urwanko n’ukwigungirako bifatiye kuri kamero yabo nk’abantu. Ivyo ngo bobikora mu kwirukira kenshi rya sakramentu ry’ikigongwe kandi bivuye ku mutima.

Kukaba nka ko, iryo sakramentu ngo ni wo muti bakeneye ngo bashobore kurangura neza ubutumwa bwabo bw’ukurandura no gusitura inabi iri mu bandi no kwubaka ibitarurwa vy’uguhana ikigongwe n’ugusubiza hamwe, babone guteragira mu bandi na bo imbuto nziza z’urukundo n’amahoro.

Yarabibukije kandi ko Imana iri kumwe na bo mu butumwa bwose bazoshingwa, aca abasaba kugenda baciye bugufi kandi bagororotse ku bw’ububasha bw’Imana.

Uwuyoboye uwo muryango kw’isi yose, Mama mukuru Carine Devogelaere, yarakeje abo babikira bose, cane cane abagize yubile, ingene bazigamye ibanga gushika kuri iyo myaka yose. Uwagize indagano za burundu abagize indagano za mbere aca abaha ikaze mu muryango w’ababikira b’abanonsiyade. Yarashimye ku ntambwe uwo muryango ugezeko mu ntara y’uburundi n’urwanda.

Uwuyoboye uwo muryango mu ntara yubutumwa y’Uburundi n’Urwanda, Mama Devote Nikwigize, na we nyene ari mu bari baramutse bafise umusi mukuru kuko yagize yubile y’imyaka 25 amaze yihebeye Imana, yaratubwiye ishingiro ry’akanyamuneza yumva.

Yavuze ko amasakramentu ahabwa ari yo yamufashije gukomera ku mutima no ku mubiri, cane cane iry’Ukaristiya n’iry’ikigongwe. Ikindi camufashije ngo ni igisabisho ca misi yose.

Yasavye abagize indagano ko bokomeza urugendo umutima uri mu nda, bakamiza umuzirikanyi wabo ku Mukama, kandi bakisunga ubukandizi bwa Bikira Mariya no kwama bagamburuka mu kwakira ico Imana ibashakako ku musi ku musi. 

Twarayaze n’uwagize indagano za burundu, Mama Francine Nshimirimana, yaratubwiye vy’ukuzigama ibanga, ko icabimushoboje ari igisabisho, ko ari co yakuyemwo inkomezi zo kubandanya atera imbere mw’ibanga. Ijambo «Ntutinye» ngo ryaramufashije cane kuguma mw’ibanga. Ngo ryaramuremesha igihe cose yaba agize ubwoba. Kuba kuri uwo musi yarakiriye impeta, ngo arumva ko yunze ubumwe na Yezu Kristu, ko bimutera umwizero ko azofashwa n’Imana.

Twarayaze kandi n’umwe mu bagize indagano za mbere, Mama Florence Uwimana. Mu kugaraza akanyamuneza yatubwiye ko ahimbawe no gutura Imana ubuzima bwiwe mu kuyihebera. Yavuze ko yemereye Imana kutazoyihemukira, yongera kandi ayemera kuja aho izomujana hose, atiriwe araraba inyuma ngo agire ibimufatira. Akaba yaraterereje igisabisho ngo azoshobore kuzigama neza iryo banga.

Mwomenya ko umuryango w’aba annonciades ari umuryango wisunga Bikira Mariya aho yaja kwa mwene wabo Elizabeti kumumenyesha Inkuru Nziza ko yibungenze umwana w’Imana (Annonciation), ari na ho havuye izina ryabo (abatoranye ubutumwa bwo kumenyekanisha Umukama).

Watangujwe mu mwaka w’1787, mu Bubiligi, na Patiri Pierre Jacques de Clerck, kumwe na Jeanne mweranda wo mu Bufaransa, kw’isi yose ukaba urangura ubutumwa mu bisata vy’indero (ugukomeza ukwemera biciye mu mashure mato mato n’ayisumbuye), ukwigisha abitegurira amasakramentu, ukuvura abarwaye, ukuremesha abatagira kiraba, be n’ugufasha abibaruka.

Mu Burundi uwo muryango uhafise imibano itanu: mu gisagara c’i Bujumbura, ahari umubano mw’i Ruhero muri Paruwase Katédrale Regina Mundi; muri Paruwase Jenda ahari imibano itatu (uwitiriwe umusozi Carmel, uw’irerero ry’abanovise witiriwe umweranda Jeanne, be n’umubano Magnificat); be no muri paruwase Buziracanda ahariko haratunganywa umubano mushasha.

Odrade Kaze, CEDICOM

Ivyiyumviro

Rondera

Urutonde rw'Imisa

Mwoba mufise ico mubaza?

Tanga