Nyenicubahiro Musenyeri Gerevazi Banshimiyubusa yavuze ko ibituma akengurukira Imana kuri iyo myaka yari amaze mw'ibanga rw'ubwepiskopi ari uko azirikana ko Imana itamuremeye ubusa; ngo iyo Mana yamuremye imufiseko umugambi mwiza wo kuyikorera nk'umutumwa wayo

Umuryango wa Diyoseze Nkuru ya Bujumbura, ku wa Gatandatu igenekerezo rya 20 Nyakanga 2025 wiriwe mu kanyamuneza ko kwigina yubile y’imyaka 25 Nyenicubahiro Musenyeri Gerevazi Banshimiyubusa, Umwepiskopi Mukuru wayo, amaze yatiriwe iryo banga. Kuri uwo musi kandi, uwo Mwepiskopi Mukuru yaratanze n’ubwahuro bwo kwugurura umwaka mushasha w’ubutumwa w’2025-2026, ku civugo nyene cahahora ku mwaka uheze: «Dukomeze Ekleziya muryango mu kugira ubumwe n’urukundo no mu gusangira neza ivyo Imana iduha!»

Urubanza rwatangujwe n’inkuka y’imisa yaherejwe muri paruwase mvyeyi ya Diyoseze, Paruwase Katedrale Regina Mundi, mu kibanza co hanze, ahahereranye n’isengero ntoyi.

Ekleziya kw'isi mu bumwe na Musenyeri Gerevazi muri ivyo birori

Abepiskopi batari bake bari bahishikiye gushigikira mugenzi wabo. Uri abagize inama y’abepiskopi Katolika b’i Burundi, umuserukizi wa Papa mu Burundi, Nyenicubahiro Musenyeri Dieudonné Datonou, be n’uwaserukiye inama y’Abepiskopi Katolika bo mu Rwanda, Musenyeri Papias Musengamana, Umwepiskopi wa Diyoseze Byumba.

Ivyo birori vyari vyatewe iteka kandi n'abubahwa batari bake, guhera ku mukuru w'igihugu n'umutambukanyi wiwe, n'abandi bafise amabanga ahambaye mu gihugu, n'isinzi ry'abakrustu baje bazananye mu madiyoseze yagiye arayobora.

Musenyeri Gerevazi arazirikana ko Imana yamuremye imufiseko umugambi

Nyenicubahiro Musenyeri Gerevazi Banshimiyubusa yaravuze ko ibituma akengurukira Imana kuri iyo myaka amaze mw'ibanga rw'ubwepiskopi ari uko azirikana ko Imana itamuremeye ubusa. Ngo arategera ko iyo Mana imufiseko umugambi mwiza wo kuyikorera nk'umutumwa wayo. Akaba yarasavye umuryango w'Imana w'abari aho kwama bamusabira.

Imyaka 25 mw'ibanga si mike, vyari bikwiye ko bamukeza. Kandi abatari bake baramukeje nyene. Aha twovuga nka Nyenubweranda Papa Léon-XI, abicishije ku muserukizi wise mu Burundi. Yavuze ko....

Abandi bamukenje ni abepiskopi b'i Burundi basangiye ibanga, bakaba bamukeje baciye ku Mwepiskopi wa Diyoseze ya Ngozi, Musenyeri Georges Bizimana. Ngo baramukengurukira ku butumwa yaranguye muri iyo myaka yose, na cane cane igihe yari arongoye inama y'abepiskopi Katolika b'i Burundi.

Abakristu ba Diyoseze Nkuru ya Bujumbura arongoye ubu bobo baserukiwe n'icegera c'uwo Memwepiskopi Mukuru, Musenyeri Anatole Ruberinyange. Akaba yavuze ko igisabisho afise ku mutima ari uko Imana yoshikana uwo Mwepiskopi Mukuru ku yindi ntambwe ikurira iyo ariko ubu.

Musenyeri Gerevazi, urukundo rwa Kristu ruramuhutagiza mu butumwa

Nyenicubahiro Musenyeri Gerevazi Banshimiyubusa yavutse ku wa 9 Nyakanga 1952, i Gisuru muri Diyoseze ya Ruyigi. Yatiwe mw'ibanga ry'ubusaserdoti mu mwaka w'1981. Imbere y'ukwatirwa mu bwepiskopi, muri Nyakanga 2000, yari amaze hafi igice c'umwaka ari Umwepiskopi samuragwa muri Diyoseze ya Ngozi, yahavuye ayobora nk'umwepiskopi kuva mu mwaka w'2003, aho yamaze imyaka 18. Diyoseze Nkuru ya Bujumbura na yo akaba ayirimwo nk'Umwepiskopi Mukuru wayo kuva mu mwaka w'2018. 

Ku civugo c'ubwungere c’uwo Mwepiskopi kigira kiti: «Urukundo rwa Kristu ruraduhutagiza», urwo rukundo nyene nta nkeka ko ari rwo rutuma arangurana ishaka ubutumwa bwiwe bwo kwigisha, kuyobora no gutagatifuza igihugu c’Imana aragijwe, ivyo bikiserurira ku kuntu atunganyana ubwenge n’ubwitonzi indinganizo n’ibisata vyose vy’ubutumwa bwa Diyoseze no kubizeza incabwenge zibushitse.

Nk’abandi bungere bose, Musenyeri Gerevazi Banshimiyubusa kandi, mu bumwe n’Ekleziya, aratanga uruhara rwiwe mu buryo bwishimiwe mu manama y’abepiskopi, haba ku rwego rw’igihugu canke mu karere Uburundi buherereyemwo, eka no mu bumwe bw’Ekleziya kw’isi, gushika ku cicaro cayo i Vatikano, mu bumwe n’Umwungere w’Ekleziya kw’isi. Turetse kuba umunyamuryango w’inama y’Abepiskopi Katolika b’i Burundi, CECAB, yarigeze no kuyiyobora, kuva mu mwaka w’2010 gushika mu w’2016.

Urukundo rwa Kristu ruramuhutagiza kandi no mu guserura urukundo rwa Kristu mu bantu. Biraboneka ko ari Umwungere afitiye imbonakazoza ishemeye ishengero ry’Imana ayoboye, kandi ibintu vyose abikorana ukwigengesera. Benshi barakunze kumwumvana kandi amajambo atwenza, ariko ntikuba ari ukwijajurira gusanzwe, yamara haba harimwo n’inyigisho z’ubwenge n’ukugaragaza ubugwaneza bwiwe, ari na ho benshi mu bakristu bamubona nk’Umwungere w’icitegererezo.

Odrade Kaze, CEDICOM

Ivyiyumviro

Rondera

Urutonde rw'Imisa

Mwoba mufise ico mubaza?

Tanga