Bavukanyi, twaraye twinjiye mu kwezi kwa Gitugutu kwahariwe Irozari. None tugiye kuhakura iki gishasha ko na kare twahora tuguhimbaza? Duhamagariwe kuvuga Ishapule, kwambaza Umuvyeyi Bikira Mariya ngo adusabire uguhinduka gushitse.

Ishapule iradufasha gusenga, guha umwanya ukwiye Imana. Ishapule ituma twiyumva nk’abana bo mu nzu bayagira Umuvyeyi abakunda. Ukuvuga Ishapule bidutuma tuguma tuzirikana amabanga y’ukwigira umuntu kwa Kristu be n’ay’ugucungurwa kwacu.

Umumalayika Gabrieli atumwe n’Imana yararamukije Bikira Mariya ati: «Mwaramutse, wewe wuzuye inema, Umukama muri kumwe» (Luk.1,28). Iyi ndamutso ku wemera irahambaye, kuko itwereka vyinshi: iratwereka ko mu vyaremwe vyose ata kindi kiremwa catewe iryo teka ryo kuramutswa nk’ukwo.

Bikira Mariya yarahejeje arakira ishaka ry’Imana, aho yavuga ati: «Ni bibe nk’uko ubishaka.» Bikira Mariya rero ntashaka kwisangiza iyo ndamutso y’Ijuru; urwo yakunzwe ashaka kurutwereka, twebwe twamwiherewe nk’Umuvyeyi. Ashaka kudusanga iwacu, aho tuba, aho tugendera, aho dukorera imirimo yacu, aho duhurira mu gusenga, ku rugendo..., tukahagabanira inema n’imihezagiro vyiwe.

Muze rero tuvuge Ishapule mu nzu iwacu, mu mibano yacu. Abantu bamwe bamwe muri iki gihe ntibashaka ko umwanya wobapfako ubusa, igikorwa uko kiri kose gifata umwanya.

Egome umwanya uragoye, kandi ni uwo kwubahiriza; ariko abafata akanya ko guteramana n’Umuvyeyi mu gisabisho c’Irozari ntibaba batakaje umwanya. Akanya duhaye Umuvyeyi ntikaba gapfuye ubusa, tuharonkera inema nyinshi kandi zihebuje zibandanya zidukomeza mu nzira y’ubweranda twatanguye itujana mw’Ijuru.

Dusenge turi kumwe n’Umuvyeyi Bikira Mariya Umugabekazi w’irozari adusabire ku mwana wiwe Yezu Kristu.

Marie Rose Ngendakumana, CEDICOM