Abanyeparuwase barashoboye kurangura ibikorwa vyo kwiteza imbere mu buzima busanzwe, nko kugura amatongo ku mashure tabariro yose be n’itongo rinini ryo kuri paruwase ryaguzwe ku ngurane y’ibanki iriko irihwa n'abakristu, bongera bubaka n'ingoro y'Imana kw'ishure tabariro ry'i Butega

Ku musi wa kane igenekerezo rya 2 ukwezi kwa Gitugutu 2025, abakristu bo muri Paruwase yitiriwe Petero mweranda yo ku Muberure bazindukanye akanyamuneza k’aho bigina isabukuru y'imyaka ine iheze iyo paruwase ivutse. Abo bakristu bakaba bishimira ibikorwa vyo kwiteza imbere baranguye, vyaba ivy’iterambere ry’umutima n’iryo mu buzima busanzwe.

Ibirori nyezina vyatanguye ku gihe c’isaha zitandatu, bitangurira ku rugendo rw'abari mu mihari n'imigwi y’ubutumwa, imbere y’uko haba inkuka y’imisa yaherejwe na patiri mukuru, Patiri Pierre Nsengiyumva.

Uwo musaserdoti yabanje kwifuriza abanyeparuwase isabukuru nziza, n’insiguro yo guhimbaza isabukuru, ko ari akaryo keza ko kwirimbura, aho vyagenze nabi hagakosorwa, aho vyagenze neza na ho hagakomezwa. Araheza ashikiriza ijambo nyamukuru ry’uwo musi mu mice ibiri: ivyashoboye kurangurwa mw’iterambere mu nzira y’ubweranda be n’ivyaranguwe mu bikorwa vyo kwiteza imbere mu buzima busanzwe.

Ku muce ugira uwa mbere w’ibikorwa bijanye no gutera imbere mu nzira y’ubweranda, patiri mukuru yavuze ko ahanini ari ubutumwa umusaserdoti aba asanzwe arangura, na bwo bukaba ari ubwo kwigisha, gutagatifuza no kuyobora imitima. Aha yaribukije ko hariho inyigisho zitari nke zatanzwe mu buryo butandukanye, zaba izitangirwa mu mibano mito mito, mu mihari no mu migwi y’ubutumwa, zaba kandi n’izitangwa ku bakristu muri rusangi.

Ku muce ugira uwa kabiri w’ingene abanyeparuwase bashoboye kurangura ibikorwa vyo kwiteza imbere mu buzima busanzwe, patiri mukuru yaravuze igikorwa co kugura amatongo ku mashure tabariro yose, be n’itongo rinini ryo kuri paruwase rishikana ihegitare zitandatu, ryaguzwe ku ngurane y’ibanki, ubu abakristu baka bari mu gikorwa co kuriha iyo ngurane. Yaravuze kandi n’igikorwa kiriko kirarangurwa co kwubaka ingoro y'Imana kw'ishure tabariro ry'i Butega, be n’urwubako rw’utuzu twa surwumwe twa kijambere.

Mu gusozera, Patiri Pierre Nsengiyumva yarashimiye cane abo bose bagize ico bakora ngo paruwase ibandanye ishinga imizi. Mu bo yashimiye harimwo abarongoye Diyoseze bo bashinze paruwase, be n’abasaserdoti bafashanya mu butumwa, be n’abakristu kuko ngo ari bo bakora ibikorwa vyose vy’iterambere rya paruwase, atibagiye n’abakunzi ba paruwase, abari hafi n'abari kure.

Twaregereye umwe mu bakristu ba paruwase bari baje muri uwo musi mukuru, umukristu Bernard Havyarimana, maze aratubwira ivyo yashimye muri iyo myaka ine irangiye baronse paruwase. Yavuze ko ashima ingene abasaserdoti babasanga ku mashure tabariro kubaronsa inkuka z'imisa ku bwinshi, n’ingene babagendera mu mibano rimwe mu mezi atatu.

Ku bijanye n’iterambere mu buzima busanzwe na ho, ngo arashima ukuntu abasaserdoti babafashije gutarura ikiraro hamwe no kwubaka amasengero yo kw’ishure tabariro ry'i Burenza n'iry’i Butega, ivyo vyose ngo bakaba babikesha abasaserdoti ku mwete wo gukora bereka abakristu.

Tubibutse ko paruwase Muberure yavutse mu mwaka w’2021, hari kw'igenekerezo rya 2 Gitugutu, ivyawe na Paruwase kamenge. Hejuru y’ivyo yaranguye muri iyi myaka ine iheze, irafise kandi n’imigambi itegekanijwe, haba ku bijanye no gutera imbere mu bweranda canke mu buzima busanzwe, nk’uko bimenyeshwa na patiri mukuru, Patiri Pierre Nsengiyumva.

Mu vy’iterambere mu bweranda harimwo ivy’uko abakristu botera intambwe mu kumenya Imana, mu gukomeza urukundo, mu kurekuriranira n'ibindi, na ho ku bijanye n’imigambi yimirije y’iterambere mu buzima busanzwe, hakaba ata kindi gikorwa gitegekanijwe atari ukuriha itongo ryaguzwe mu ngurane, iryo na ryo ngo rikazorihwa mu myaka ine, ubu hakaba haheze umwaka umwe ririhwa.

Alice Nirambe, Paruwase Muberure

Ivyiyumviro

Rondera

Urutonde rw'Imisa

Mwoba mufise ico mubaza?

Tanga