Mama Mariya-Chantal Gratia Kabanyiginya, mwene Sylvestre Vyaranse na Victoire Mukaremera akaba n'umubikira wo mu muryango wa bene Paulo b’i Fribourg, umubano w'i Gitega, n'ubwo yahitanywe n’ingwara vyaboneka ko yari imubabaje cane, ariko benshi barashima intahe ikomeye cane asize y'umubikira w'umunyakamwemwe n'urukundo

Mama Marie-Chantal Gratia Kabanyiginya, umubikira abatari bake bahora bafata nk’akarorero k’umunyakamwemwe mu butumwa no mu buzima, yaritavye Imana mw’ijoro ryo ku w’Imana igenekerezo rya 19 Gitugutu 2025, ku bitaro Polyclinique Centrale de Bujumbura (POLYCEB), afubwa inyuma y’indwi, ku wa mbere igenekerezo rya 27 ukwo kwezi nyene, mw’itongo rishingurwamwo abihebeye Imana n’abasaserdoti riri mu kigo c’iseminari nkuru y’i Bujumbura.

Mama Marie-Chantal Gratia Kabanyiginya yashinguwe inyuma y’ukumusezera ubwa nyuma ku bitaro vyitiriwe abasirikare vyo mu Kamenge n’inkuka y’imisa yari irongowe n’Umwepiskopi Mukuru wa Diyoseze Nkuru ya Bujumbura, Nyenicubahiro Musenyeri Gerevazi Banshimiyubusa, ari kumwe n’abandi bepiskopi babiri, uw’inararibonye wo muri iyo Diyoseze nyene, be n’uwa Diyoseze ya Ruyigi, Musenyeri Blaise Nzeyimana.

Mu bandi bari baje kumusezera n'igisabisho c'inkuka y'imisa no kumushingura harimwo kandi n'abihebeye Imana, guhera ku bo mu muryango yahora aranguriramwo ubutumwa, bene Paulo b’i Fribourg, bahagarariwe n'umukuru w'uwo muryango ku rwego rw'isi, Mama Agnes Thérèse Coumba Diène, yaje ava i Fribourg mu Busuisse ku cicaro c'uwo muryango.

Hariho kandi n'abihebeye Imana bo mu miryango itandukanye, ababikira n'abafurera, eka mbere n'abasaserdoti, n'abaryango b'amaraso b'umuhisi, n'abakristu incuti n'abagenzi biwe.

Mama Mariya-Chantal Gratia Kabanyiginya mu buzima no mu butumwa

Mama Mariya-Chantal Gratia Kabanyiginya, mwene Sylvestre Vyaranse na Victoire Mukaremera, yavutse kw’igenekerezo rya 19 ntwarante 1980, avukira i Musenga muri Paruwase Muramba, Diyocèse Muyinga, abatizwa kw’izina rya Mariya Chantal Kabanyiginya, kw’igenekerezo rya 19 ntwarante 1987.

Aho agereye mu bigero, amaze no kurangiza amashure yisumbuye, yarumvise umuhamagaro w’Imana, aca aheba igihugu ciwe c’amavukiro nka Ibrahimu, agenda kubandanya atohoza umuhamagaro wiwe mu muryango w’ababikira bene Paulo b’i Fribourg, mu mubano w’i Yaoundé mu gihugu ca Cameroun, kuva mu mwaka w’2006 gushika mu mwaka w’2009. Yaciye abandanyiriza mu gihugu ca Madagascar ahari inzu y’irerero, kuva mu mwaka w’i 2009, ari ho yaronka izina rishasha, aca yitwa Mama Mariya-Chantal Gratia Kabanyiginya, aca abandanya inyigisho gushika mu mwaka w’2011.

Kw’igenekerezo rya 08 Kigarama 2011 ni ho yagize indagano ziwe za mbere, aho nyene muri Madagascar. Umuryango waciye umuha ubutumwa mu Burundi mu mubano w’i Bujumbura aburangurira  muri Librairie Saint-Paul.

Kuva mu mwaka w’2016 gushika mu w’2019, umuryango waramutumye kwungura  ubwenge muri kaminuza y’Ibiyaga binini (UGL), mu vyigwa vy’ugutunganya ubutunzi (Finances et Comptabilité). Ahejeje amashure yaciye yitegurira indagano za burundu, azigira kw’igenekerezo rya 05 kigarama mu mwaka w’2020.

Mu mwaka  w’i 2024, umuryango waramutumye mu mubano w’i Gitega, wari uherutse kwugururwa, ndetse yabaye mu ba mbere umuryango urungitseyo, arangurira ubutumwa mw’ishami rya Librairie Saint-Paul, akaba ari we kandi yari arihagarariye. Mu kwezi kwa kabiri 2025, umuryango wamushinze kuba umukuru w’uwo mubano mushasha.

Mama Mariya-Chantal Gratia Kabanyiginya yarakunda ibanga yari yaratorewe, kandi akaritwarana urukundo n’akanyamuneza bidasanzwe. Yarangwa kandi n’umutima wo kwitangira ubutumwa nka Paulo Mweranda, kugira ngo inkuru nziza y’urukiza imenyekane. Yarakunda kandi Umuvyeyi Bikira Mariya, akama amwiragiza mu buzima ndetse no mu butumwa yari ashinzwe, ubwo bunywanyi akabugaburiza igisabisho c’ishapure.

Umushaha wa Mama Mariya-Chantal Gratia Kabanyiginya uruhukiye mu Mukama

Mama Mariya-Chantal Gratia Kabanyiginya yitavye Imana ahitanywe n’ingwara yamufashe kuva mu kwezi kwa gatatu, ikaba itigeze imurekura, uretse ko uko iminsi yahera ari ko yagwiza ubukazi, kandi biboneka ko ababaye cane, ariko kandi akabibamwo mu kwemera, kuko yarakunda kwambaza ikigongwe c’Imana. Yaraciye mu bitaro bitandukanye, kandi aho hose abaganga nta ko batagize ngo bagerageze kumufasha, ariko Umukama yabishatse ukundi, imuhamagara mw’ijoro ryo kw’igenekerezo rya 19 Gitugutu 2025, ku munsi w’Imana wahariwe ukumenyesha Inkuru Nziza.

Umukama naninahazwe kuri iyo ngabire y’umuvukanyi yari yararonkeje umuryango w’ababikira bene Paulo b’i Fribourg na Ekleziya, kandi awufashe kwakira ishaka ryiwe. Niyiruhukire mu mahoro, Umukama amuronse urugori yateguriye abamugororkeye.

Michel Nibitanga, CEDICOM

Ivyiyumviro

Rondera

Urutonde rw'Imisa

Mwoba mufise ico mubaza?

Tanga