Kw'ishure tabariro rya Kibuye muri Paruwase Rugazi, abakristu baho umusi mukuru wa Kristu Umwami bari bawiteguriye neza mu gisabisho c’imisi icenda (neuvaine), aho mbere mu kugisozera, ku wa Gatandatu igenekerezo rya 22 Munyonyo 2025, hari igikorwa batunganije: baragize urukino rwabafashije gukomeza ubumwe, urukundo n'umuvukano hagati yabo, inyuma y’inkuka y’imisa yo gusozera ico gisabisho.

Agasangwa kuri uwo musi wari umusi muri Ekleziya hari haramutse hahimbazwa umusi mukuru cane wa Bikira Mariya n’umweranda Sisiliya, umuvunyi w’abaririmbiramana, umusaserdoti mwibutsamana w’imimihari n'imigwi y’ubutumwa, Patiri Alain Michel Habarugira, ni we yahereje inkuka y’imisa y'uwo musi.

Uwo musaserdoti yasavye abari aho kudahengeshanya kwitura Umuvyeyi Bikira Mariya, kuko ari we mushikiriza w'inema zose. Kukaba nka kwo, na Sisiliya mweranda ngo ni we yagumye yitura, araheza amufasha kuzigama ubwerentegerwa.

Inyuma y’iyo nkuka y’imisa ni ho hagizwe urukino rw'umupira w'amaguru. Rwari urukino rwa kivandimwe, kuko hari mu ntumbero yo kunywana no gukomeza ubumwe n'urukundo hagati y’abagize imihari n'imigwi igize paruwase ya Rugazi.

Hatanguye gukina abigeme bari mu migwi y’ubutumwa, umugwi wiswe «A» ukina n'uwiswe «B», urukino rurangira binjizanije igitsindo kimwe ku busa, haheruka abahungu na bo nyene bari mu mihari n'imigwi y'ubutumwa, aba bobo urukino bakaba barurangije banganije igitsindo kimwe ku kindi.

Athanasie Nsengiyumva, Paruwase Rugazi