Ihangiro rizogume ari rya rindi: kubandanya mufatanye mu nda mu kwubaka Ekleziya-muryango no mu gushingira intahe ukuri n’urukundo vya Yezu Kristu, kuko ari vyo bizokiza Uburundi n’isi nzima (Nyenicubahiro Musenyeri Gerevazi Banshimiyubusa)

Wa mwaka mweranda wa yubile y'imyaka 2025 Ekleziya ya Yezu Kristu imaze kw'isi waraye usozerewe ku rwego rw'amadiyoseze kw'isi ku musi witiriwe Umuryango mweranda w'i Nazareti, kuri uyu w'Imana igenekerezo rya 28 Kigarama 2025. Ku rwego rwa Diyoseze Nkuru ya Bujumbura, uwo mwaka wasozerewe ku Nkuka y'imisa yaherejwe ku gihe c'isaha zine, muri ya paruwase mvyeyi ya Diyoseze nyene yaja irakira ingendo nyeranda, Paruwase Katedrale Regina Mundi.

Isozerwa rya yubile mu yindi migirwa itatu

Imigirwa itatu ni yo yari iramutse ihimbazwa kuri uwo musi muri Diyoseze Nkuru ya Bujumbura: ukwo gusozera umwaka mweranda wa yubile ku rwego rwa diyoseze ngaho kuri Katedrale Regina Mundi, be n’ugukengurukira Imana ku vyiza Imana yagabiye igihugu cayo kiri muri iyo Diyoseze mu mwaka w'2025 wariko usozerwa n'ukwipfurizanya umwaka mushasha mwiza w'2026 wari wimirije, vyabereye ku kirimba c’Umwepiskopi mukuru mu Gihosha.

Nyenicubahiro Musenyeri Gerevazi Banshimiyubusa, mu bumwe bw'isangirabutumwa n'isangirangendo n'Umwepiskopi Mukuru w'Inararibonye, Nyenicubahiro Musenyeri Evariste Ngoyagoye n'abandi basaserdoti barangurira ubutumwa muri iyo Diyoseze, barifatanije n'abaserukiye umuryango wa Diyoseze wose barangurira ubutumwa mu maparuwase no mu bisata bitandukanye vya Diyoseze, be n'abihebeye Imana, abafurera n'ababikira.

Umwepiskopi yarakeje abakristu ku nema za yubile bagabanye 

Mw'ijambo nyamukuru ry'uwo musi, Umwepiskopi mukuru wa Diyoseze, ahanini yashimikiye ku gusozera umwaka mweranda wa yubile y'imyaka 2025 Ekleziya, hejuru y'ukuzirikana ku musi mukuru w'Umuryango mweranda w'i Nazareti wari uramutse uhimbazwa muri Ekleziya.

Yabanje gukeza imice itandukanye y'abanyamuryango wa Diyoseze yagiye iragira ingendo nyeranda bakurakuranwa mu mwaka wose kuza kwironkera inema za yubile bagabanye, yongera arabakengurukira ku kigoro bagize kandi hari mu bihe bigoye vy’ukwiyunguruza, atibagiye gukengurukira n'abawuhimbarije mu maparuwase iwabo, be n'abasaserdoti babifashijemwo mu gutegura imigwi bari bashinzwe.

Abashinzwe kwakira abaza muri yubile babitunganije neza

Mu bo yashimiye kandi harimwo abasaserdoti ba Paruwase yakiriye abasangirangendo b’umwizero, Paruwase Katedrale Regina Mundi, na cane cane Patiri mukuru, Patiri Félix Fupi, be na Patiri Steve Mike Niyonkuru yari yashinzwe kwakira abaje muri iyo yubile. Ngo barabitunganije neza ku buryo imigwi yose yabishoboye yakiriwe kandi igafashwa bimwe bishimishije.

Umwepiskopi akaba yarasavye abakristu kugendera ivyo bagabanye muri iyo yubile, mu buzima bwabo bwose. Ihangiro ngo riguma ari rya rindi: kubandanya bafatanye mu nda mu kwubaka Ekleziya-muryango no mu gushingira intahe ukuri n’urukundo vya Yezu Kristu, kuko ngo ari vyo bizokiza Uburundi bwabo n’isi nzima.

Tubibutse ko uyu mwaka wa yubile y'Ekleziya waraye usozerewe wari wuguruwe ku wa 29 Kigarama 2024, kuri iyo Paruwase mvyeyi nyene ya Diyoseze, Paruwase Katédrale Regina Mundi. Ku rwego rw'Ekleziya kw'isi na ho, ku cicaro c'Ekleziya i Vatikano, ukaba wari wuguruwe ku wa 24 Kigarama 2024. Uzosozerwa ku wa 6 Nzero 2026, hazoba ari ku musi mukuru w'ukumenyekana kw'Umukama, Épiphaniya.

Michel NIBITANGA, CEDICOM

Ivyiyumviro

Rondera

Urutonde rw'Imisa

Mwoba mufise ico mubaza?

Tanga