Uburyo bubereye bwo gukenguruka nk'indongozi z'igihugu cashize Imana imbere si ukwiyeza agatima, ahubwo ni ukugira urukundo, atari rwa rundi rw'abapagani bakunda abo basanganywe gusa, ahubwo rwiyugururira bose, be no gusaba Imana imbabazi aho bayisasako akarimi gusa (Nyenicubahiro Musenyeri Gerevazi banshimiyubusa)

Umuryango w'Umukuru w'igihugu c'Uburundi, wifatanije n'abagize Leta y'ico gihugu, baraye batanguye igikorane c'igisabisho c'ugukengurukira Imana ku vyiza yakoreye ico gihugu muri uyu mwaka w'2025 dusozereye, nk'uko yama ibigira uko umwaka utashe. Ico gikorane c'imisi itatu catanguye kuri uyu wa mbere igenekerezo rya 29 Kigarama kikazosozerwa ku musi wa nyuma w'umwaka, ku wa Gatatu igenekerezo rya 31 ukwo kwezi nyene.

Indongozi z'igihugu zari zitabiriye ico gisabisho ku bwinshi

Igisabisho c'inkuka y'imisa y'ubukengurutsi cuguruye ico gikorane caherejwe muri Katedrale Regina Mundi, kiyobowe n'Umwepiskopi Mukuru wa Diyoseze Nkuru ya Bujumbura, Nyenicubahiro Musenyeri Gerevazi banshimiyubusa.

Iyo nkuka y’imisa yitabwe  n’indongozi zitandukanye, duhereye ku Mukuru w’igihugu Nyenicubahiro Evariste Ndayishimiye n’umuryango wiwe, Icegera c’Umukuru w’igihugu n’Umutambukanyi wiwe, Umukuru w’Inama nkenguzamateka, umushikiranganji wa mbere n’Umutambukanyi wiwe, hamwe n’izindi ndongozi zitandukanye zigize Reta y’Uburundi. Eka isengero yari igwiriyemwo ahanini abagize Leta.

Umuryango w'umukuru w'igihugu kumwe n'abagize Leta baratambiye Imana mu misa, bongera baranayishikanira amashikanwa agizwe n'ivyimburwa, nk'ubundi buryo nyene bwo gukenguruka. Umukuru w'igihugu n'umutambukanyi wiwe, bo ubwabo ni na bo nyene bagiye imbere y'ishengero ryari aho, baba ari bo bashikiriza igisabisho rusangi c'ugukengurukira Imana ku vyiza yakoreye Uburundi muri uyu mwaka w'2025 no kuyitura igihugu na Leta ku bw'umwaka wimirije w'2026.

Umwepiskopi ahanura abarundi gukenguruka mu buryo Imana ishima

Imbere y'ugushikiriza ubwo bukengurutsi n'ico gisabisho, Umwepiskopi mukuru wa Diyoseze yari yabanje kubafasha kuzirikana uburyo bubereye bwo gukenguruka, nk'indongozi z'igihugu cashize Imana imbere, kiyubaha kandi kirajwe ishinga no kugendera mw'ishaka ryayo. Ni na ho yabasaba ko, mu gushimira Imana ko yabashikanye ku mpera z'uwo mwaka bakiri bazima, bomenya ivyo bakwiye gukenguruka, atari nka bimwe vy'abapagani biyeza agatima. Ati: «Ukumenya Imana nyakwo si ivyiyerekanira mu majambo gusa, kuko n'amashetani ari amashetani aremeza ko azi Imana.»

Ikindi yabasavye ni ukugira urukundo, atari rwa rundi rw'abapagani bakunda abo basanganywe gusa, ahubwo rwiyugururira bose, be no gusaba Imana imbabazi aho bavuze ko bayikunda, ariko bayisasako akarimi, badakunda bene wabo. Akaba yagiriyeko yipfuriza iyo Leta nyene kumenya ivyo ikwiye gukenguruka atari nka bimwe vy'abapagani biyeza agatima, yongera yipfuriza indongozi z'igihugu kujanisha ukwemera Imana n'ingiro mu buzima bwa misi yose mu gukunda bose badacaguye.

Ivyo umuryango w'umukuru w'igihugu wasabiye Uburundi

Mu gisabisho rusangi, umukuru w'igihugu n'umutambukanyi wiwe barakengurutse ibitari bike mu vyo Imana yahaye Uburundi ngo bitunge abarundi be n’indongozi zitorewe n’abenegihugu. Barongeye barasabira n'igihugu n’indongozi zaco n'abenegihugu ngo Imana igihe amahoro yayo, abansi ibahindure abakunzi.

Bareretse Imana kandi n'imigambi bagiye kurangura mu mwaka w'2026, barayisaba akavura n'akayaga keza no guhezagira ivu ry'Uburundi ngo ibiterwa bimere kandi bizane umwimbu ushimishije. Ntibibagiye no gusabira ingo zose zugarijwe n'ingorane zitandukanye ngo Imana izironse ivyiza vyayo, maze urukundo n'umwizero bisage mu mitima yabo.

Mwomenya ko ico gikorane caciye kibandanyiriza ku kibuga c'umupira kiri kw'ishure ry'ubuhinga E.T.S-Kamenge, ku muhingamo. Umukuru w'igihugu n'umutambukanyi wiwe bari kumwe n'izindi ndongozi, hamwe n'abenegihugu bavuye mu makomine atandukanye agize intara ya Bujumbura.

Michel Nibitanga, CEDICOM

Ivyiyumviro

Rondera

Urutonde rw'Imisa

Mwoba mufise ico mubaza?

Tanga