Umugoroba ushira ijoro ryo kuri uyu wa kabiri igenekerezo rya 06 Nzero 2026 waranzwe n’akanyamuneza ku muryango wa Diyoseze Nkuru ya Bujumbura no ku miryango y’amaraso y’abatumwa babiri b’Umukama, Nyenicubahiro Musenyeri Evariste Ngoyagoye, Umwepiskopi w'inararibonye wa Diyoseze, na Patiri Adriano Ntabona, na we nyene inararibonye y'umusaserdoti, bari bagorobeje bahimbaza bongera bigina isabukuru y’imyaka 60 bamaze batiwe mu busaserdoti busuku.

Urwo rubanza rukaba rwatangujwe n’inkuka y’imisa yaherejwe muri paruwase mvyeyi ya Diyoseze, Paruwase Katedrale Regina Mundi, imbere y’uko rubandanyiriza mu nyubakwa y’imisi mikuru yitiriwe i Kana, aho nyene muri Katedrale Regina mundi, aho bano babiri baboneyeho kumenyesha ivy’ubucuti bwabo be n’ibihe vy’inkoramutima kuri bo vyaranze urugendo rwabo rw’ubutumwa.

Ururirimbo rwo kwipfuriza isabukuru nziza abo bubahwa b'inararibonye b'Ekleziya y'i Burundi bayipfurijwe mu gahogo ka Nyenicubahiro Musenyeri Gerevazi Banshimiyubusa, Umwepiskopi mukuru wa Diyoseze Nkuru ya Bujumbura, aba bubahwa baranguriyemwo ubutumwa kandi basanzwe kuri ubu baruhukiyemwo ak'iza bukuru.

Ivyo birori vyari vyatewe iteka kandi n'umukuru w'inama y'Abepiskopi Katolika b'i Burundi CECAB, Nyenicubahiro Musenyeri Johachim Ntahondereye, be n'umuserukizi wa Papa mu Burundi, Nyenicubahiro Musenyeri Dieudonné Datonou. Abari bagorobeje biginwa bari bashigikiwe kandi n'abagize imiryango yabo y'amaraso.

Ugusangira urugendo rw'ubusaserdoti kwa Musenyeri Evariste Ngoyagoye na Patiri Adriyano Ntabona, ukwatirwa ku musi umwe be n'uguhurira no ku bindi bitari bike mu butumwa no mu buzima vyaratumye bunga ubucuti butigeze bucika gushika na mango aya.

Musenyeri Evariste Ngoyagoye ati: «Uyu Patiri Ntabona twarabanye neza, twatanguye mu mwaka w’1954, kuva bajana kw’isemirari y’i Mugera, kubandanya ku y’i Burasira, eka mbere no hanze y’igihugu i Roma». Mu nyuma ngo baratandukanye gato, ariko mu nyuma, mu mwaka w’1973 barasubira guhurira kuri Katedrale Regina Mundi, uwo mwepiskopi akiri umusaserdoti, yagizwe Patiri mukuru w’iyo paruwase.

Mu nyuma yarungitswe muri Diyoseze y’i Bubanza kuyibera umwepiskopi, uwundi asigaye, ariko ngo bagahurira mu nama y’abepiskopi, Patiri Ntabona ayibereye Umunyamabanga. Ngo baca barasubira gukorana hafi na hafi cane, gushika n’ubu aho bompi bari mu karuhuko k’iza bukuru.

Ariko kandi, aba bompi ngo barafise n'ivyo bibuka mu buzima bwabo bw'ubutumwa. Ku ruhande rumwe ni aho bashima urugero bashitseko rwo gutagatifuza igihugu c'Imana c'i Burundi mu gushikiriza ijambo ry’Imana mu buryo butari buke bigisha ikatikisimu no mu nkuka z’imisa no gusabira abakristu ngo babe beranda biciye mu masakramentu. «Tworaba abantu twagiye turafasha ngo basubize hamwe n’Imana si bake, hanyuma rero no kurongora Diyoseze canke paruwase, twaragize uko dushoboye», ni kwo Musenyeri Ngoyagoye yavuze.

Ku rundi ruhande na ho ariko ngo barafise n'intambamyi bagiye barahura na zo mu butumwa nyene. Intambamyi bagarutseko ni iy’iburabuzwa rya Ekleziya ku ntwaro ya Bagaza. Musenyeri Evariste Ngoyagoye ngo hariho abigeze gushaka kubumvisha ko kabaye, ariko abishura ko kazoza k’Ekleziya kari mu minwe y’Imana; ico gihe ngo uwayiburabuza ntiyamaze amezi arenga atatu adakinjuye ku ntwaro, Ekleziya iraheza irabandanya.

Mu nama nkuru y'Abepiskopi Katolika b'i Burundi CECAB barakeje bongera barakengurukira izi nararibonye za Ekleziya ko ngo zabaye kirumara muri urwo rwego rw'Ekleziya y'i Burundi no ku muryango wose w'igihugu c'Imana gishagaje mu Burundi.

Yaribukije aho Musenyeri Evariste Ngoyagoye yayibereye umuyobozi kandi yisubiriza, n’aho Patiri Adriyano Ntabona yayibereye Umunyamabanga, mbere ngo akaja aranatanga n’intumbero ibereye mu gutumbereza neza ibintu. Iyo nama y’abepiskopi ngo irafise n’ibinyamakuru imukesha vyaranga ibikorwa vyayo. Ngo barahimbawe kubona baragumije ibanga, gushika n’uno musi.

Musenyeri Evariste Ngoyagoye yavutse ku wa 3 Nzeri 1942 mw’i Jenda, mu ntara ya Bujumbura, yatirwa mu busaserdoti ku wa 6 Nzero 1966, i Roma, yatiwe na papa Paulo-VI, batiriwe rimwe ari abasaserdoti 3 b'abarundi, we na Patiri Adriano Ntabona be n'uwundi musaserdoti ubu yarengutse i Bukama, Patiri Mathias Ntakimazi.

Na ho Patiri Adrien Ntabona, umusaserdoti akaba n'umwigisha muri kaminuza, umwanditsi w'ikirundi, yavutse mu mwaka w'1939. Arazwi ku vy'imico n'akaranga vy'Uburundi, ariko na cane cane ku vy'uko ari we yatanguje paruwase Mutima w'Ubwitonzi yo ku Mutanga yakira umuce w'abakristu biga muri za kaminuza aho yigishije igihe kitari gito muri kaminuza y'Uburundi, ifasha vy'umwihariko abanyeshure baza kwiga muri kaminuza ya Leta bavuye irya n'ino mu ntara z'igihugu. Ni na ho iyo Paruwase benshi bayita kwa Ntabona.

Zino nararibonye zibiri, guhimbaza iyi sabukuru y'ubusaserdoti bwazo, zikaba ziterereza igisabisho ngo Umukama abandanye azibungabunga mu bweranda.

Michel Nibitanga, CEDICOM