Ku musi wo gusozera ico gisabisho, ibirori vyo kwakira intsinzi vyari agakura: Umwami w’abami ari ku ngoma mw’Isakramentu ryeranda yaravugirijwe impundu, umurisho w’ingoma uravuga, inzamba n’irumbeti birasamirana, n’ibinyagara vy’ubwoko bwose birasamirizwa mu kanyamuneza kenshi ko kwigina ko impome zugarije ubuzima zari zimaze gusenyuka

Muri Paruwase Mukiza Mweranda yo mu Nyakabiga, guhera ku wa Gatanu igenekerezo rya 23 Nzero 2026 gushika ku wundi wa Gatanu igenekerezo rya 30 Nzero 2026, imisi yose kw’isaha icumi na zibiri zo ku mugoroba (18h00), akanyamuneza ko kugabana intsinzi y’igisabisho ca «Yeriko» cabereye muri iyo Paruwase ni ko karanze abakristu.

Ku musi wo gusozera ico gisabisho, ari wo musi ugira uw’indwi, ico gisabisho catanguye kw'isaha y'icumi z'umuhingamo (16h00), gitangujwe n'inkuka y’imisa yaherejwe na Patiri mukuru wa Paruwase, Patiri Eddy Kwizera, akikijwe n'abasaserdoti basangiye ubutumwa.

Uwo musaseredoti yaribukije abakristu bimwe mu vyaranze ico gisabisho, na cane cane ijambo ry'urufatiro rivuga riti: «Umukama azokwama ari Umwami, we Mana yawe, uko imvyaro zizogenda zirakurikirana» (Izaburi147,10), be n’igisomwa cayoboye urugamba rwa Yeriko cerekana ingene «Imana yarokoye bene Israeli ibaha igisagara ca Yeriko iciye kuri bo nyene», igisomwa cavuye mu gitabu c’umuhanuzi Yozuwe (Yozuwe 6), kikaba caza kirasubirwamwo imisi yose yari igize indwi yose y'ico gisabisho ca Yeriko.

Patiri Eddy Kwizera yabwiye abakristu bo mu Nyakabiga ko Imana, mu kubomora impome zugarije ubuzima bwabo, ica kuri umwe wese muri bo, kandi ko bisaba ko imutegeka akumva, ugakurikiza ijambo ryayo.  

Muri iyo nkuka ya misa nyene, karabaye n'akaryo ko guhereza Imana imitwaro abakristu bari bashiyishikirije babicishije mu nyandiko. Kuri uwo musi w’indwi, ibirori vyo kwakira intsinzi vyari agakura. Umwami w’abami ari ku ngoma mw’Isakramentu ryeranda yaravugirijwe impundu, umurisho w’ingoma uravuga, inzamba n’irumbeti birasamirana, n’ibinyagara vy’ubwoko bwose birasamirizwa mu kanyamuneza kenshi ko kwigina ko impome zugarije ubuzima zari zimaze gusenyuka.

Inyuma y'aho, barafashe akanya barumviriza bimwe mu vyo Umukama yakoreye igihugu ciwe, aho abatari bake bashinze intahe ko bakize indwara zitandukanye, abandi bakavuga ko bagabanye ivyiza vyinshi. Muri bo harimwo n'abari bakurikiranye igisabisho biciye ku buhinga bwa none. Aha twovuga nk’abakristu bane bemeje ko Umukama yabakijije biciye muri ico gisabisho ca Yeriko.

Umusaserdoti akaba yasozereye mu gukeza abakristu ku ntsinzi bagabanye, yongera abemerera ko hazoringanizwa inkuka y’imisa yo gukenguruka ku vyiza vyose vyagabaniwe mu gisabisho ca «Yeriko», gutyo abipfuza bose gushingira intahe Yezu bakazoca bahabwa akaryo.

Arthémon Nimbona, Paruwase Nyakabiga, Paruwase Nyakabiga

Ivyiyumviro

Rondera

Urutonde rw'Imisa

Mwoba mufise ico mubaza?

Tanga