Abo benegihugu bibaza ko iryo kena ry’amazi meza yo mu mabomba rishobora kuba riva ku kuntu iyo karitiye iri ahantu hahagaze, kuko ngo nko mu zindi karitiye ziri hepfo hoho amazi araboneka, bakaba basaba Leta mvyeyi ko yogira ico ikoze ngo ako gace karonke amazi

Abenegihugu baba muri karitiye Busoro yo muri zone Kanyosha barafise ubukene budasanzwe bw’amazi meza yo mu mabomba, nk’uko bavyiganiye abari mu mugwi wo kumenyesha amakuru wa Paruwase Kanyosha, aho bagendera iyo karitiye, ku musi w’Imana igenekerezo rya 01 Ruhuhuma 2026.

Karitiye Busoro ni imwe mu zigize zone Kanyosha yo muri komine Mugere, ku mugwa mukuru w’ubutunzi w’igihugu c’Uburundi, Bujumbura. Iyo karitiye ihana urubibe na zone Kiyenzi isanzwe ifise amasoko atari make y’amazi.

Nk’uko abari mu gisata co kumenyesha amakuru muri Paruwase Umuvyeyi w’ikingongwe yo mu Kanyosha bavyiboneye aho bagendera iyo karitiye, haribonekeza ubukene bw’amazi mu gace ka Busoro.

Icibonekeza ni uko amabombo ya REGIDESO yoyo, n’aho usanga hari imihana imwe imwe arimwo, abenegihugu bavuga ko haheze igihe ata n’ima ry’amazi rikoroka. Eka mbere ngo hariho n’imihana imwe imwe abenegihugu baherutse bashira amabomba mu mpangu zabo, ariko gushika ubu bakaba ata mazi barigera baronka.

Abo benegihugu bibaza ko iryo kena ry’amazi meza yo mu mabomba rishobora kuba riva ku kuntu iyo karitiye iri ahantu hahagaze, kuko ngo nka karitiye Musama na Gisyo yo amazi araboneka, n’aho batayaronka imisi yose.

Abo benegihugu bamenyesha ko kugira ngo baronke amazi meza bitaborohera na mba, kuko ngo abatari bake bakoresha amazi y’uruzi Kanyosha, canke bakareka amazi y’imvura mu gihe c’imvura, ibishobora gutera indwara zikwezwe n’isuku rike.

Babandanya bamenyesha ko n’abagerageza kuronka amazi meza ari abifise gusa, bafise uburyo, kuko bobo baca bakoresha amafaranga. Ngo kuronka amazi y’ibomba muri ako gace bitwara amafaranga ashika ku bihumbi bitatu kw’ibido imwe, mbere n’ibihumbi bitanu bivanye n’aho uwuyatumye aherereye.

Abo benegihugu bakaba basaba Leta mvyeyi, nk’uko yaje ari umuvyeyi, ibabere umuvyeyi koko, bakaba bayitera akamo ko yogira ico ikoze ngo ako gace ka Busoro karonke amazi meza.

Tubajije Gad Irambona arongoye iyo karitiye ico avuga kuri ubwo bukene bw’amazi, yamenyesheje ko hariho umugambi w’umukuru w’igihugu w’amazi yimbwa mu kuzimu, ariko ko iyo karitiye ifise ikibanza kimwe gusa, mu gihe abantu bayibamwo bobo barenga ibihumbi mirongo itatu na kimwe.

Uwo arongoye iyo karitiye agatera akamo abajejwe uwo mugambi ko bobaronderera ibindi bibanza bokwimbamwo ayandi mazi, kugira ngo baramire abanyagihugu.

Ariko kandi kubera ko iyo karitiye ihana urubibe na zone Kiyenzi isanzwe ifise amasoko atari make y’amazi, Gad Irambona akabona ko umuti urama ari uko  Leta yobaronsa amazi azananye muri iyo zone ya Kiyenzi.

Mbere ngo hariho n’abanyagihugu bamaze kwiyumvira kuja hamwe ngo bakwege amazi ava muri iyo misozi, n’aho ata kinini abavuna, kubera ko badafise ubushobozi bwo gukwenga amazi menshi. Uwo mutware agaha umwizero abo benegihugu ko abatware ku rwego rwo hasi bazobandanya badodora ngo barabe ko Leta yoheza ikumva ako kamo k’abenegihugu.

Mwomenya ko ico kibazo c’amazi ciboneka kandi no muri karitiye ya Nkenga, bikagaragara ko ari ikibazo gihanze ayo makaritiye uko ari abiri, ariko kandi bikaboneka ko hamwe Leta yobishaka, ayo mazi boyaronka, kuko yoyakwega iyakuye mu misozi ihanamiye ayo makaritiye.

Tubibutse kandi ko aho muri karitiye Busoro, Paruwase Kanyosha yamaze  kwiyumvira umugambi wo kuhubaka isengero ngo ipfunyirize urugendo abakristu, ubu bakaba baharonkera inkuka y’imisa kabiri mu ndwi.

Ikindi mwomenya ni uko uwo mugambi wo gukwenga amazi ava mu misozi ihana urubibe n’izo karitiye ushoboka mu gihe Leta yobifata mu minwe, mbere n’ayandi makaritiye agashikirwa.

Gonzalve Ntashimikiro, Paruwase Kanyosha

Ivyiyumviro

Rondera

Urutonde rw'Imisa