Ivyo babisabwe n'abajejwe ubutumwa bw’ubwibutsamana mu gisata c’incabwenge muri iyo paruwase, mu kiganiro-nyigisho caremeshejwe ku civugo kigira kiti: «Kwigishanya urukundo n'ubushobozi, ubutumwa bw'umwigisha-murezi w'umukatorika mu kwigisha no guteza imbere umunyeshure mu buryo bwuzuye»

Paruwase Kanyosha, ibicishije ku mugwi w’inama ntunganyabutumwa wayo ujejwe ubutumwa bw’ubwibutsamana mu gisata c’incabwenge, ku musi wa Gatandatu igenekerezo rya 31 Nzero 2026 yararemesheje ikiganiro-nyigisho ku bigisha-barezi n’abayobozi b’amashure ari muri zone Kanyosha, ku civugo kigira kiti: Â«Kwigishanya urukundo n'ubushobozi, ubutumwa bw'umwigisha-murezi w'umukatorika mu kwigisha no guteza imbere umunyeshure mu buryo bwuzuye».

Ico kiganiro catanguye ku gihe c'isaha zitatu z'agatondo, mu nzu Â«Umuvyeyi w'ikigongwe» ya Paruwase yagenewe amanama n'imanza, kiremeshejwe n’abakristu batatu: Izaac Gahungu, Gisèle Ndereyimana na Eugène Ngomirakiza, basanzwe bafadikanije ubwo butumwa muri ico gisata.

Gahungu Izahaki, umukuru w’uwo mugwi, yishimikije ijambo ry'Imana ryavuye mu Nkuru Nziza ya Yezu Kristu yanditswe na Matayo ivuga Â«ukuba umunyu n’umuco w’isi» (Matayo 5,13-16), yahamagariye abigisha-barezi n’abayobozi babo kuba umunyu n’umuco w’isi mu butumwa bwabo, bakamurikirwa n’Inkuru Nziza ya Yezu Kristu, kuko Imana ari yo muco umurikira abantu, ukagereranywa n'ukuri n'ubutungane, gutyo babahamagarira kuba abarongozi batazimiza.

Na ho Gisèle Ndereyimana na Eugène Ngomirakiza, muri ico kiganiro, baramenyesheje abari aho ico ari co Â«uburongozi», bongera babamenyesha ko uburongonzi nyambwo ari uburongozi bushingiye ku guhinduka no guhindura aho umuntu abaye.

Aha bamenyesheje ko akarorero keza ari ko karuta vyose.  Abigisha-barezi babahamagariye kwigishanya urukundo n’ubushobozi. Ikindi, ngo borangwa n’imico myiza y’abarundi no kugendera ubukristu, kugira ngo abarerwa babo babonere kuri abo bigisha umuco utazimiza, gutyo babafashe gutera imbere mu buryo bwuzuye.

Na ho ibiranga uburongozi bwiza, ubwa mbere ngo ni ukwisunga uburongozi bwa Yezu Kristu, we ngo yarangwa no guca bugufi no kuba umusuku w'abandi. Babigize gutyo ngo ni ho umurimo umwigisha akora uheza ukamutagatifuza. Bakaba bahamagariye abari aho kurangwa n’imico myiza y’ubuntu, imurikiwe n’ijambo ry’Imana.

Twarayaze n’umwe mu bigisha-barezi bari bitavye izo nyigisho, Christophe Banyankanzi, arangurira umurimo wiwe kw’ishure ryisumbuye ryitiriwe umubano mwiza ryo mu Kanyosha (Lycée de la Convivialité), yamenyesheje ko izo nyigisho hari ico zamwunguye, kuko ngo zihamagarira guhinduka no guhindura aho baba n’aho bakorera, be no guhinduka bo ubwabo (abo bigisha), na cane cane mu kuba akarorero keza, kandi ivyo vyose ngo bakabirangurana urukundo.

Tubamenyeshe ko uwo musi w’igenekerezo rya 31 Nzero wari usanzwe ari umusi uhariwe umweranda Yohani Bosco, uwo na we akaba yaritaho cane urwaruka n’indero, mbere akavuga ko ata rukundo ruhari ata ndero ishoboka. Uwo mweranda rero abigisha barezi bakaba bamwisunga nk’umuvunyi wabo.

Ikindi mwomenya ni uko aho muri zone Kanyosha hari ubukene bw’amashure, kuko muri zone Kanyosha hari amashure yegukira Leta indwi gusa, atanu muri yo akaba ari muri karitiye Gisyo, imwe muri Karitiye Busoro, n’iyindi imwe muri Karitiye Musama. Ni mu gihe muri karitiye Kajiji hoho ata shure rihari, be no muri karitiye Nkenga. Vyongeye kandi, amashure afise ibisata vy’inyuma y’ishure shingiro akaba ni abiri gusa.

Kubera ubwo bukene bw’amashure, ivyo bituma abana usanga ari benshi cane mu mashure, mbere bamwe bamwe bakabura n’aho bicara, ugasanga bicaye hasi, kuko ayandi mashure y’abigenga usanga azimvye, abavyeyi benshi ntibashobore gutwarayo abana babo. Ivyo vyose bikaba bituma habaho n’abana baheba amashure, cane cane muri izo karitiye zitagiramwo ishure shingiro.

Diomède Nyandwi, Paruwase Kanyosha

Ivyiyumviro

Rondera

Urutonde rw'Imisa