Kimwe mu bikorwa vyo kwitegurira iyo yubile izoba muri uyu mwaka turimwo w'2026, mu kwezi kw'indwi, ni umwiherero waremeshejwe n'Umwibutsamana w'imigwi n'imihari muri Paruwase Kamenge, ku civugo kivuga kiti: «Urukundo rwa Kristu ruratugobera»

Abahurikiye mu mugwi w’abaririmbiramana witiriwe «Mukiza Mweranda» wo kw’ishure tabariro rya Gishingano muri Paruwase Guido Maria Conforti yo mu Kamenge, ku wa Gatandatu igenekerezo rya 7 Ruhuhuma 2026 bari baramutse bagira umwiherero wo kwitegurira guhimbaza yubile y'imyaka 50 uwo mugwi umaze uvutse.

Uwo mwiherero waranzwe ahanini n’inyigisho yatanzwe na Patiri Rénovat Bikorimana, Umwibutsamana w'imigwi n'imihari muri Paruwase Kamenge, ku civugo kivuga kiti: «Urukundo rwa Kristu ruratugobera.»

Uwo mwibutsamana yavuze ko ico civugo ca yubile ari na co abo baririmbiramana bazirikanye muri iyo nyigisho. Ku bwiwe, ngo mu kuzirikana ico civugo bokibonamwo urukundo rwa Kristu rubaduhutagiza, maze bagaheza bazirikanamwo Yezu Kristu we nyene Rukundo rudahemuka, yakunze abantu bose urutiziganya gushika anabapfire.

Yabananije yigisha ico ari co «yubile», be n’ibiranga uwitegurira yubile. Ngo arangwa n’ico yamaze, ico yamariye abandi, kandi ngo akakimara ahimbawe, kubera ko Imana iba yaramuzigamye muri iyo myaka yose.

Yabandanije asaba abo baririmbiramana kwiga gusaba ibisumba ibindi, ubwitonzi, nka bumwe buvuga mu nkuru ya Salomon asaba Umukama ikiruta ikindi, nk’uko iyo nkuru ivugwa mu gitabu ca mbere  c'Abami (1Abami 3,4-14).

Ikindi yabasavye ni ukurangwa n'umutima uca bugufi nk'umwami Dawudi, we ngo yamenya ko yacumuye agaca bugufi, agasaba ikigongwe Imana. Kanatsinda yubile ngo ni n’umwaka w'ikigongwe, umwaka wo gusaba no gutanga ikingongwe, vyumvikana ko babanza kwisuzuma, bakirimbura ku mutima no ku mubiri.

Patiri Rénovat Bikorimana yasozereye ashimira abo baririmbiramana biyumviriye guhimbaza iyo yubile babanje kwinagura. Akaba yarabasavye ko ico civugo n'izina bitirirwa bokwama babigendera.

Tubamenyeshe ko iyo yubile izoba muri uyu mwaka turimwo w'2026, mu kwezi kw'indwi.

Rodrigue Nicintije, Paruwase Kamenge

Ivyiyumviro

Rondera

Urutonde rw'Imisa