Bavukayi, ku musi wa Gatatu
igenekerezo rya 11 Ruhuhuma 2026, ku musi wo guhimbaza Bikira Mariya
umugabekazi w’i Lurdes, kuri iyo tariki nyene ni ho duhimbaza umusi
mpuzamakungu ugira uwa 34 wahariwe abarwaye. Ku rwego rwa Diyoseze Nkuru ya
Bujumbura ukazohimbarizwa muri Paruwase Bukwavu.
Icivugo c’uyu mwaka kikaba ari:
«Kugira impuhwe n’ikigongwe nk’Umunyasamariya: Kunda
mu kwikorera ububabare bwa mwene wanyu».
Ni icivugo catowe na Nyenubweranda Papa Leon-XIV (Luk.10,29-37).
Ni
icivugo kitwereka ishusho y’Umunyasamariya yerekanye urukundo mu gufata umuntu
yari amerewe nabi, yari yaguye mu mutego w’abasuma. Ngo amubone, amutera
ikigongwe, aramwegera, apfuka inguma ziwe, azisukako amavuta n’umuvinyu,
araheza amushira ku gitwazi ciwe, aja kumwakira indaro, aramubungabunga.
Umunyasamiriya
yashatse kugaragaza rwa rukundo kuri mugenzi wacu. Urukundo nyarwo rugaragarira
mu bikorwa biboneka vy’ikigongwe dukorera bene wacu bari mu bubabare
bw’indwara, abari mu bukene, abari mu bunyakamwe no kuba bonyene, baratawe.
Aya
majambo Yezu atubwiye ashatse kuremesha abantu bababaye n’abarushe ku mutima no
ku mubiri. Yezu natwe aduhamagarira kwitaho abo bose bababaye ngo tubabe hafi,
tubaremurure mu vyo dushoboye.
Kuri
uwo musi, Ekleziya iraduha akaryo keza ko kwiyibutsa ingene yitwararika abakitswe
n’amagara. Erega
ngaha kw’isi hari igihe tuzazanirwa, ingorane zikatubana amananiza. Hari igihe
ingingo z’umubiri ziduhinduka, amagara akadukika, indwara ikatwaka umwidegemvyo
n’ubushobozi bw’ugutunganya ubuzima bwacu no kwikenura.
Indwara irafise ico igabanya
ku buryo bwacu bwo kwiyumvamwo igihagararo ca muntu. Muri bene ivyo bihe umuntu
arakeneye uwumuremesha ku mutima, akumva ko akunzwe kandi akakirwa uko ari.
Mbere no ku mubiri hari abakenera ikibunganira mu bushobozi bwo kwivuza no
kwikenura mu buryo butandukanye.
Ese umutima w’urukundo Yezu
yatwigishije twowerekanira cane cane mu bikorwa vyo kuremeshanya, gushigikirana
no gutabarana mu bihe bigoye, tutibagiye kuremesha abarwaye.
Bavukanyi, dusabe Yezu
umutima w’urukundo nk’uwiwe ngo dushobore kwitwararika bene wacu aho turi hose
ngo tuzoshobore gutorana ubuzima budahera.
Marie Rose Ngendakumana,
CEDICOM
Aleluya, aleluya.
Umukama yavuze ati: «Ewe Toma, wemeye kuko umbonye.
Hahiriwe abazokwemera ata co barinze kubona.»
Aleluya.
Â
Ivyo dusoma mu Nkuru Nziza ya Yezu Kristu nk’uko yashikirijwe na Yohani (20, 19-31)
Imisi umunani iheze, Yezu araza
Ku mugoroba w’uyo musi ari wo mubarwa wa mbere w’indwi, mu nzu yarimwo abigishwa, bari bakinze inzugi ku gutinya Abayuda. Niho rero Yezu yaza, ahagarara hagati muri bo, ababwira ati: «Nimugire amahoro!» Avuze atyo, abereka ibiganza vyiwe n’urubavu rwiwe. Abatumwa ngo babone Umukama, barahimbarwa.
Yongera ababwira ati: «Nimugire amahoro! Kumwe Data yantuma, nanje ni ko
ndabatumye.» Ababwiye ivyo, arabahuha ati : « Nimuronke Mutima Mweranda. Abo
muzorekurira ibicumuro, bazoba babirekuriwe, abo muzobigumizako na bo,
bizobagumako.»
Aho Yezu yaza, Toma, umwe wo muri bamwe Cumi na babiri, ari we bita Didimo,
ntiyari muri bo. Abandi bigishwa bamubwiye bati: «Twabonye Umukama», abishura
ati: «Ntiboneye mu biganza vyiwe intoboro za ya misumari, ngo nshire urutoke mu
ntoboro zayo, n’urushi mu rubavu rwiwe, sinzokwemera.»
Imisi umunani iheze, abigishwa basubira guteranira muri ya nzu, na Toma bari
kumwe. Yezu araza, inzugi zugaye, ahagarara hagati muri bo ati: «Nimugire
amahoro!» Hanyuma abwira Toma ati: «Shira urutoke ngaha: ng’ibi ibiganza vyanje;
zana urushi rwawe kandi urushire mu rubavu rwanje: ureke rero kuba ikigaba, ariko
wemere.»
Toma amwishura ati: «Mukama wanje, Mana yanje!» Yezu na We amwishura ati:
«Ewe Toma, wemeye kuko umbonye: hahiriwe abazokwemera ata co barinze kubona.»
Hari n’ibindi bimenyetso vyinshi bitanditswe muri iki gitabu Yezu yagiriye imbere y’abigishwa biwe. Ivyo rero vyanditswe ngo mwemere ko Yezu ari Kristu Umwana w’Imana, kugira kandi ngo muvyemeye, muronke ubuzima kw’izina ryiwe.
Radio Maria
Eglise Catholique
Radio Vatican
Foyer de Charit