Ku musi w'Imana igenekerezo rya 08 Ruhuhuma 2026, wari umusi mpuzamakungu w’ubuzima bw’ukwihebera Imana, uwo musi ukaba warahimbajwe no ku rwego rw’intara y'ubutumwa ya Muramvya, aho abihebeye Imana barangurira ubutumwa muri iyo ntara bahuriye muri Paruwase yitiriwe Umweranda Eduwarudo yo mu Bukeye.

Uwo musi mukuru wahimbajwe ku civugo kigira kiti: «ukwumviriza ijwi risamiranira mu gacerere, kugira ngo ubuzima bw'ukwihebera Imana bwubakirwe ku muzirikanyi».

Ihimbazwa ry’uwo musi mukuru ryatanguriye ku nkuka y’imisa yaherejwe n'icariho c'Umwepiskopi mukuru wa Diyoseze ya Bujumbura mu ntara y'ubutumwa ya Muramvya, Patiri Désiré Ninahazimana, ari kumwe na Patiri Mukuru wa Paruwase Bukeye, n'abandi basaserdoti barangurira ubutumwa muri iyo ntara. Iyo nkuka y’imisa yatangujwe n'urugendo inyuma yo guhezagira amatara.

Inyuma y'inkuka y’imisa, abo bihebeye Imana baciye bahurira mu nzu y'amanama y'ikigo c'irerero ry'abafurera Bene Paulo mu Bukeye ngo biginane bongere bigine umuhamagaro batoranye.

Ku bwa Mama Domitile, umubikira wo mu muryango w’ababikira bene Tereziya, uguhimbaza uwo musi mukuru ni akaryo ko kwibukanya ibanga batoranye, bagasubira kwiyumva, bakivugurura, na ho Furera Laurent akaba ashimira imiryango yabibarutse, kuko ngo ari yo yogi ry'abihebera Imana.

Eric Nduwindavyi, Paruwase Bukeye