Kuri
uyu wa Gatatu igenekerezo rya 11 Ruhuhuma 2026, muri Ekleziya Katolika bari
baramutse bahimbaza umusi mpuzamakungu wahariwe abarwaye. Ni umusi udasanzwe ku
barangurira ubutumwa mu gisata ca Caritas, bari kumwe n’indemesha z’abarwayi be
n'abari mu mibano mito mito.
Ku
rwego rwa Paruwase yitiriwe Umweranda Guido Maria Conforti yo mu Kamenge, na ho
nyene uwo musi wahimbarijwe, aho hakozwe igikorwa kidasanzwe co kuvuza bababaye
gusumba abandi mu barwaye bari mu mibano mito mito, abakuze eka mbere n'abana,
batowe ku mashure yose akukira Paruwase Kamenge.
Mu
buryo bw’uguhimbaza icese uwo musi, igikorwa co kuremesha abarwayi cabereye kw'ivuriro
rito ryo mu Mirango (centre de santé Mirango) riri kw'ibarabaraba rya 11, aho
bita kwa Buyengero.
Ico
gikorwa catanguye mu gatondo ka kare, aho umurongoye umugwi wa Caritas muri
Paruwase Kamenge, Jean Marie Ndarurinze, ari kumwe n'abo bafashanya ubwo
butumwa, kumwe n'abarongoye imibano muri Paruwase Kamenge, baraba ko abarwaye bafise
bose bashitse.
Ivyo
biheze haciye hakurikira ugushikiriza uwurongoye iryo vuriro imfashanyo bari
bibangikanije, kugira ngo babihereze abarwayi bivanye n’ivyo umwe wese akeneye,
nk'imiti, impanuro, n'ibindi, hisunzwe indwara agwaye.
Inyuma
yo kuvuza abo barwayi no kubarihira imiti, haciye hahurikira kubashikiriza
imfashanyo igizwe n'ibiro 5 vy'ibiharage hamwe n'ibiro 2 vy'umuceri kuri umwe umwe
wese, bongera babipfuriza ko urukiza rw'Umukama rwobashikira.
Twobamenyesha
ko abarwayi bagiriwe ubwo bufasha ari abatororokanijwe mu mibano itandukanye yo
ku mashure tabariro agize iyo Paruwase ya Kamenge ari yo Nyambuye, Gishingano, Winterekwa,
Muyaga na Nyabagere.
Sapius
Kubwayo, Paruwase Kamenge
Aleluya, aleluya.
Umukama yavuze ati: «Ewe Toma, wemeye kuko umbonye.
Hahiriwe abazokwemera ata co barinze kubona.»
Aleluya.
Â
Ivyo dusoma mu Nkuru Nziza ya Yezu Kristu nk’uko yashikirijwe na Yohani (20, 19-31)
Imisi umunani iheze, Yezu araza
Ku mugoroba w’uyo musi ari wo mubarwa wa mbere w’indwi, mu nzu yarimwo abigishwa, bari bakinze inzugi ku gutinya Abayuda. Niho rero Yezu yaza, ahagarara hagati muri bo, ababwira ati: «Nimugire amahoro!» Avuze atyo, abereka ibiganza vyiwe n’urubavu rwiwe. Abatumwa ngo babone Umukama, barahimbarwa.
Yongera ababwira ati: «Nimugire amahoro! Kumwe Data yantuma, nanje ni ko
ndabatumye.» Ababwiye ivyo, arabahuha ati : « Nimuronke Mutima Mweranda. Abo
muzorekurira ibicumuro, bazoba babirekuriwe, abo muzobigumizako na bo,
bizobagumako.»
Aho Yezu yaza, Toma, umwe wo muri bamwe Cumi na babiri, ari we bita Didimo,
ntiyari muri bo. Abandi bigishwa bamubwiye bati: «Twabonye Umukama», abishura
ati: «Ntiboneye mu biganza vyiwe intoboro za ya misumari, ngo nshire urutoke mu
ntoboro zayo, n’urushi mu rubavu rwiwe, sinzokwemera.»
Imisi umunani iheze, abigishwa basubira guteranira muri ya nzu, na Toma bari
kumwe. Yezu araza, inzugi zugaye, ahagarara hagati muri bo ati: «Nimugire
amahoro!» Hanyuma abwira Toma ati: «Shira urutoke ngaha: ng’ibi ibiganza vyanje;
zana urushi rwawe kandi urushire mu rubavu rwanje: ureke rero kuba ikigaba, ariko
wemere.»
Toma amwishura ati: «Mukama wanje, Mana yanje!» Yezu na We amwishura ati:
«Ewe Toma, wemeye kuko umbonye: hahiriwe abazokwemera ata co barinze kubona.»
Hari n’ibindi bimenyetso vyinshi bitanditswe muri iki gitabu Yezu yagiriye imbere y’abigishwa biwe. Ivyo rero vyanditswe ngo mwemere ko Yezu ari Kristu Umwana w’Imana, kugira kandi ngo muvyemeye, muronke ubuzima kw’izina ryiwe.
Radio Maria
Eglise Catholique
Radio Vatican
Foyer de Charit