Mu gihe abarenga 130 bamenye ikibazo ca Leta gitanga uburenganzira bwo kubandanya ivyigwa muri Kaminuza, Patiri Lambert Nishimagizwe yabahamagariye kubandanya bungura ubumenyi no kugendera ubuntu n’indero rukristu bamanye

Imikangara irenga 130 yo kw’ishure «Ishure ryisumbuye ryitiriwe umubano mwiza», ryo mu Kanyosha yararonse impapuro z’umutsindo ku musi wa gatanu igenekerezo rya 27 Ruhuhuma 2026. Ibirori vyatanguriye ku nkuka y’imisa yo gukengurukira Imana yari irongowe na Patiri Lambert Nishimagizwe, umwe mu basaseredoti barangurira ubutumwa muri Paruwase kanyosha akaba mbere n’umurezi kuri iryo shure, iruhande yo kuba umwibutsamana mu mashure akukira Ekleziya Katolika ari ku butaka bwa Paruwase Muvyeyi w’ikigongwe yo mu Kanyosha.

Imikangara yaraye ironse impapuro z’umutsindo ni abanyeshure barangije umwaka w’ishure w’2024-2025 mu bisata bitatu: igisata c’indimi, igisata c’imibano n’igisata c’ubushakashatsi.

Patiri Lambert Nishimagizwe yarakeje iyo mikangara kuri iyo ntambwe bari bagezeko inyuma y’uburuhe n’amajoro menshi baraye bariko banigana n’ivyigwa. Yabahamagariye guhimbarirwa iryo teka Imana ibateye, yongera abasaba kuyikengurukira no gukengurukira abavyeyi n’abarezi baterereye muri urwo rugendo rutari ruto bagize.

Mu gihe abarenga 130 bamenye ikibazo gitanga uburenganzira bwo kubandanya ivyigwa muri Kaminuza, Patiri Lambert Nishimagizwe yabahamagariye kutagarukirize ngaho, ahubwo bakabandanya bungura ubumenyi, kuko ngo ibisigaye ari vyo vyinshi. Ikindi yabasavye ni ukugendera ubuntu n’indero rukristu bamanye, na cane cane mu kwigenza neza, mu kwubaha Imana n’abantu, mu kubaha amabwirizwa y’Ekleziya n’ay’igihugu.

Inyuma y’iyo nkuka y’imisa, haciye hakurikira itangwa ry’impapuro z’umutsindo mu nzu y’imisi mikuru ya Paruwase Kanyosha. Ivyo birori vyari vyatewe iteka na patiri mukuru wa Paruwase, Patiri Ferdinand Nduwimana, ari kumwe patiri Lambert Nishimagizwe, umwibutsamana w’amashure akukira Ekleziya muri iyo Paruwase, na Patiri Audace, be n’umukuru wa komite y’abavyeyi barereye kuri iryo shure, Déogratias Ninyibuka, n’umugenduzi w’amashure muri komine Mugere.

Umuyobozi w’ishure, umupfasoni Denise Karagira, mw’ijambo yashikirije, yarakeje iyo mikangara, aboneraho kubahamagarira kubandanya amashure muri Kaminuza no kubandanya barangwa n’indero nziza baronse.

Abo baronse izo mpapuro z’umutsindo baserukiwe n’umwigeme Marie Louange Maribayimana. Kw’izina rya bagenzi biwe yarakengurukiye abavyeyi babibarutse, abarezi  babashikanye kuri iyo ntambwe bateye, be na paruwase Kanyosha yabahaye iryo shure ryiza kandi yama ibaba hafi mu nyigisho ndoramana no mu kubasabira.

Tubibutse ko «Ishure ryisumbuye ryitiriwe umubano mwiza», ryo mu Kanyosha ari rimwe mu mashure akukira Ekleziya Katolika ari muri Paruwase Kanyosha ryakiriye abanyeshure ba mbere mu mwaka w’2004-2005 aho ryatanguranye abanyeshure n’abo mu mwaka w’indwi n’abo mu mwaka w’icumi na rimwe.

Iryo shure ryubatswe na patiri Arconada German Van Del, umumisiyonari yavukiye mu gihugu ca Espagne, akaba yabaye mu Burundi kuva mu mwaka w’1964 (ubu yararengutse i Bukama). Mu myaka ishika mirongo itanu yamaze mu gihugu c’Uburundi akaba yarateje imbere abantu mu kwubaka amavuriro, amashure hamwe n’iyindi migambi y’iterambere.

Izina «Ishure ryisumbuye ryitiriwe umubano mwiza», uwo musaserdoti yarihisemwo kubera ko yashaka kunywanisha abanyakanyosha, ubona ko hari hahitiye amagume, abari badasangiye ubwoko batasiba kwicana. Mu gihe iryo shure ryatanguranye abanyeshure 240, ubu rigeze ku barenga 1200.

Gonzalve Ntashimikiro, Paruwase Kanyosha

Ivyiyumviro

Rondera

Urutonde rw'Imisa