Ku bwa Patiri mukuru wa Paruwase Kamenge, imibano rukristu irafasha abakristu gutegera ubutumwa bafise muri Ekleziya, igafasha kandi kunywana vy'ukuri kw’abasangiye ukwemera mu kubakura mu kivunga

Ku wa kabiri igenekerezo rya 3 Ntwarante 2026, muri Paruwase yitiriwe Umweranda Guido Maria Conforti yo mu Kamenge hari hagorobeje haba inyigisho ku mibano mito mito rukristu yo ku gasengero kari ku mutumba wa Mirango, inyigisho zo kunagura iyo mibano.

Izo nyigisho zabaye kuva kw'isaha icumi z'umuhingamo (16h00), zifatiye kw'ijambo ry'urufatiro rivuga riti: «Umuryango wa mbere w'abemera umaze kuvuka bakiri bake cane, uko bahora bakora». Zatanzwe na Patiri mukuru wa Paruwase Patiri Philbert Ntahimpera.

Patiri mukuru yabwiye abari aho ko umubano rukristu ari ubundi buryo bwo kumenyesha Inkuru Nziza. Yabanje kwibutsa amamuko y’ivy’imibano rukristu, ko ari muri Amerika y'epfo, aho usanga Paruwase imwe ingana n’Uburundi, umusaserdoti bikamugora ingene atunganya paruwase canke ngo ayigendere yose ayimare. Ngo ni kwo guca biyumvira ubu bundi buryo bwo gusenga, ari bwo bwitwa «imibano rukristu». Mu Burundi na ho ngo ivy’imibano rukristu vyahashitse mu mwaka w’1926.

Ku bwa Patiri mukuru wa Paruwase Kamenge, imibano rukristu irafasha gutegera ubutumwa abakristu bafise muri Ekleziya, igafasha kandi kunywana vy'ukuri kw’abasangiye ukwemera mu gukura abakristu mu kivunga ikabashira aho bashobora gutegera neza no kunoganza Ijambo ry'Imana.

Patiri Philbert Ntahimpera yarangije akebura abantu ko umubano ugizwe n'abantu babana hafi na hafi, ku buryo umwe agize ikibazo, bagenzi biwe babwirizwa kunyaruka kuhashika n’ingoga.

Médiatrice Manirakiza, Paruwase Kamenge

Ivyiyumviro

Rondera

Urutonde rw'Imisa

Mwoba mufise ico mubaza?

Tanga