«Ukuri gushirira mu kuyaga (ibikino)» canke «La vérité se manifeste à travers le dialogue» ni icegeranyo c’ibikino vyo gukeburana vyanditswe na Patiri Janvier Nizigiyimana, bigatangazwa mw’iyandikiro rya Nsanzeryaka

Ibibazo bitatu ni vyo vyabereye Patiri Janvier Nizigiyimana imbarutso y’ukwandika ibikino-kiyago  vyo gukeburana yegeranirije mu nyandiko yiwe «Ukuri gushirira mu kuyaga (ibikino)» canke «La vérité se manifeste à travers le dialogue».

Patiri Janvier Nizigiyimana avuga ko  ibikino-kiyago  bene ivyo ari uburyo bushobora kwegeranya abantu bakayaga kuri ivyo bibazo mu mvugo yo gutwenza bafise n’umwizero wo kwumvikana.

Ikibazo ca mbere cakorewe ibi bikino cerekeye amahoro yagiye arahungabana kubera ukutamenya canke ukwikunda: abarundi barabaye mu mutekano muke imyaka myinshi n’aho haja haracamwo agahengwe. Kandi si Uburundi gusa, nta muntu yokwigira sindabibazwa mu kuyarondera mu buryo bwose ashobora gushikira.

Ico kibazo c’amahoro ni co catwaye umwanya munini (ibikino bine kuri bitandatu). Gusoma canke kurorera igikino rero biratuma umuntu  amenya ukuri mu mwanya atuje. Biri mu bigarukana amahoro n’umutekano.

Ikibazo ca kabiri cahanze isi umwanya muremure kandi kikiriko, ni ikiza ca Sida. Bacise Ruhonyanganda. None ibikino bifasha gukura ururimi mu kanwa ngo «Ha guhora wohogomboka», ukarwanya ibiiza bigeramiye abantu.

Ubu hoho hagiyemwo ibindi biiza nka Covid iguma ihinduka n’indwara z’ibihara zitera ubwoba abantu zikababuza  kuramukanya uko bahora, imigenderanire igahungabana, umuntu ukamubona nk’inkwezi y’urupfu.

Ikibazo ca gatatu cerekana uruhara rw’imico n’imigenzo mu Burundi. Aho tugeze ni heza kumbure ntawosubira inyuma, ariko tuhageze twarabaye mu bindi kandi vyarakujije abavyeyi bacu. Ntawovyiyobagiza rero, bigize ubuzima.

Ese ingene vyoroshe kandi bihambaye kuyagira no guhanurana «mu bikino». Bisubiye n’amajambo agoye kuvuga mu bihe bisanzwe, ibikino birayashikiriza mu kujajura, kuko burya «ukuri gushirira mu kuyaga», ibikino na vyo bikaba ari akaryo ko kunywanisha imigenzo mu kujajura.

Mushobora kwisomera ivy’ibi bikino mu gufyonga ngaha: icegeranyo c’ibikino-kiyago vyo gukeburana

Ivyiyumviro

Rondera

Urutonde rw'Imisa

Mwoba mufise ico mubaza?

Tanga