Ku butumire Diyoseze yaheruka gutanga ngo abakristu bitabire bimwe bishemeye iyo ndwi y’urukundo, iryo shirahamwe APRODEM-Girizina ryoryo ngo ntiryashimye «kuza ribazaniye ifi, ahubwo ryaje kubereka ingene bayiroba», nk’uko vyamenyeshejwe n’uwarihagarariye, Salvator Ndabazerutse

Ku kamenyero keza ka Paruwase Kanyosha na Ekleziya muri rusangi ko guhimbaza indwi y’urukundo n’ukubabarana buri mwaka mu gihe ceranda c’ikarema, uyu mwaka iyo ndwi yahimbajwe mu buryo bwihariye mu Kanyosha, kuko ku wa Gatandatu igenekerezo rya 14 Ntwarante 2026, mu gihe Ekleziya yariko irasozera indwi y’urukundo, ishirahamwe APRODEM-Girizina ryitaho ineza y’ibibondo n’abadandaza bato bato ryaje kwifatikanya n’iyo Paruwase mu gushikiriza ibahasha abantu b’amikoro make basanzwe biyungunganya mu gukora urudandazwa ruto ruto, kugira ngo risahirize imitahe yabo, yisununure.

Ico gikorwa catanguye ku gihe c'isaha zitanu n'iminota mirongo itatu (11h30). Iyo mitahe yaronkejwe abantu mirongo ibiri na batanu mu basanzwe bari ku rutonde rw'ab'amikoro make bafashwa na Paruwase Kanyosha. Abatowe mu bandi ni abasanzwe barangura urudandazwa bifashishije imitahe mito mito, bakaba bararonkejwe amafranga yo kubunganira mu kubadugiriza imitahe yo kudandaza.

Salvator Ndabazerutse yasavye abo baronkejwe iyo mfashanyo ko boja hamwe bakagira amashirahamwe bisunze amakaritiye bavamwo, mbere ico gikorwa  bakaba baciye bakirangura mu kuvuganira mu migwi, gutyo baca bavaho biyemeje ko bagiye gukorera hamwe mu guhana ibirimba mu ntumbero yo kwunganirana mu kuduza gose imitahe.

Uwo yari ahagarariye ishirahamwe APRODEM-Girizina yagize ati: «Nk'uko mu gihe c'ikarema Ekleziya ihamagarira abakristu gusenga, kwisonzesha no gusangira, twashimye gusangira n'ab'amikoro make ngo baronke ubushobozi bwo gukora, gutyo n'abana bava muri iyo miryango, agateka kabo kubahirizwe mu gushobora kuronka ico bafungura, amakaye yo kuja kw'ishure, kwivuza, ndetse no kuronka impuzu bambara.»

Na Patiri mukuru wa Paruwase Kanyosha, Patiri Ferdinand Nduwimana yarakengurutse ico gikorwa aho yagize ati: Â«Imana ikunda abantu bose ata n'umwe avuyemwo, nkako kuba uw'amikoro make ntawubihitamwo, yagiriweko ashimira abitangiye ico gikorwa kuba batumbereye muri Paruwase Kanyosha».

Aboronkejwe iyo mitahe, barakengurutse ico gikorwa, aho bamenyesheje ko ngo cabahaye umwizero ko bagiye kwongereza ubushobozi bwo gukora ngo baramire imiryango yabo.

Twobamenyesha ko abaronkejwe imitahe batabaye abasanzwe basengera muri Ekleziya Katolika gusa, kuko habayemwo n'abasengera mu yandi madini.

Diomède Nyandwi, Paruwase Kanyosha

Ivyiyumviro

Rondera

Urutonde rw'Imisa